భారతదేశ రక్షణ సాంకేతిక రంగ చరిత్రలో  ఒక అద్భుతమైన ప్రస్థానానికి నాంది పడింది. స్వదేశీ పరిజ్ఞానంతో రూపకల్పన చేసిన అత్యాధునిక స్వయంప్రతిపత్తి యుద్ధ విమానాన్ని (యుఏవి) ఐరోపా ఖండంలో తయారు చేసేందుకు ఒక ప్రైవేట్ రక్షణ రంగ సంస్థ సిద్ధమైంది. బెంగళూరు కేంద్రంగా కార్యకలాపాలు నిర్వహిస్తున్న  ఫ్లయింగ్ వెడ్జ్ డిఫెన్స్ అండ్ ఏరోస్పేస్ (ఎఫ్ డబ్ల్యుడీఏ)  అనే సంస్థ.. తన ప్రతిష్టాత్మక యుద్ధ విమానమైన  కాల్ భైరవ ను పోర్చుగల్ దేశంలో ఉత్పత్తి చేయనున్నట్లు అధికారికంగా వెల్లడించింది. మన దేశంలో పూర్తి స్థాయిలో డిజైన్ చేయబడిన ఒక అధునాతన రక్షణ ప్లాట్‌ఫారమ్, యూరప్ గడ్డపై తయారవుతుండడం ఇదే మొట్టమొదటిసారి. 

ఈ చారిత్రాత్మక ప్రాజెక్ట్ ప్రధానంగా మూడు ముఖ్యమైన దశల కలయికగా సాగనుంది. భారత మేధస్సుకు ప్రతిరూపమైన డిజైన్, ఐరోపా దేశానికి చెందిన అత్యాధునిక ఉత్పాదక నైపుణ్యాలు, అలాగే అంతర్జాతీయ స్థాయిలో దీని విస్తరణ అనే త్రివిధ వ్యూహంతో ఈ కార్యక్రమం ముందుకు సాగుతోంది. ఇప్పటివరకు విదేశీ రక్షణ సాంకేతికతను దిగుమతి చేసుకోవడానికే పరిమితమైన  ఇండియా,  ఇప్పుడు అంతర్జాతీయ మార్కెట్లకు రక్షణ పరికరాలను సరఫరా చేసే స్థాయికి ఎదగడంలో ఇది ఒక కీలకమైన ముందడుగు.

 కాల్ భైరవ విశేషాలు, సాంకేతిక సామర్థ్యాలు

ఈ ప్రాజెక్టులో అత్యంత కీలకమైన  కాల్ భైరవ అనేది ఒక మీడియం ఆల్టిట్యూడ్ లాంగ్ ఎండ్యూరెన్స్ (ఎమ్ఏఎల్ఈ) రకానికి చెందిన స్వయంప్రతిపత్తి కలిగిన మానవరహిత యుద్ధ విమానం. శత్రువుల స్థావరాలపై అత్యంత ఖచ్చితత్వంతో దాడులు చేయడం, సరిహద్దుల్లో నిఘా సమాచారాన్ని సేకరించడం,  ఒకే సమయంలో బహుళ డ్రోన్లను సమన్వయం చేసుకుంటూ సాగే  స్వార్మ్ ఆపరేషన్లను నిర్వహించడం దీని ప్రధాన ఉద్దేశం. సాధారణ డ్రోన్ల తరహాలో కాకుండా.. ఇది ఆధునిక యుద్ధ రంగ అవసరాలకు అనుగుణంగా సరికొత్త సాంకేతికతతో రూపొందింది.

దీనికి సంబంధించిన సాంకేతిక వివరాలను పరిశీలిస్తే..  ఇది   3,000 కిలోమీటర్ల మేర సుదూర పరిధిలో ప్రయాణించగలదు. అంతేకాకుండా, నిరంతరాయంగా 30 గంటలకు పైగా గగనతలంలోనే ఉండి తన లక్ష్యాన్ని చేధించగల అద్భుతమైన సహనశక్తి దీని సొంతం. కృత్రిమ మేధస్సు (ఏఐ) ఆధారంగా శత్రువుల లక్ష్యాలను స్వయంచాలకంగా గుర్తించే వ్యవస్థ, అత్యంత సురక్షితమైన ఎన్‌క్రిప్టెడ్ కమ్యూనికేషన్ ఛానెల్స్,  స్వార్మ్ కోఆర్డినేషన్ వంటి హంగులు ఇందులో ఉన్నాయి. ఈ ప్రత్యేకతల కారణంగానే ఇది సంప్రదాయ నిఘా పరికరాల కంటే ఎంతో భిన్నమైనదిగా నిలుస్తోంది.

అంతర్జాతీయ భాగస్వామ్యం: పోర్చుగల్ ఎంపిక వెనుక వ్యూహం

ఈ భారీ ప్రాజెక్టును విజయవంతం చేయడం కోసం ఎఫ్ డబ్ల్యుడీఏ సంస్థ, ఐరోపాకు చెందిన ప్రముఖ సాంకేతిక దిగ్గజం  స్కెచ్‌పిక్సెల్ ఎల్‌డిఎ  అనే కంపెనీతో చేతులు కలిపింది. ప్రపంచవ్యాప్తంగా ప్రసిద్ధి చెందిన ఎఫ్-16  వంటి యుద్ధ విమానాల కోసం అడ్వాన్స్‌డ్ సిమ్యులేషన్ వ్యవస్థలను రూపొందించడంలో ఈ పోర్చుగీస్ సంస్థకు సుదీర్ఘ అనుభవం ఉంది. ఈ ఇరు సంస్థల భాగస్వామ్యం ద్వారా అత్యాధునిక సిమ్యులేషన్ టెక్నాలజీలు, కృత్రిమ మేధస్సు సమీకరణ, అత్యంత వేగవంతమైన కమ్యూనికేషన్ వ్యవస్థల అనుసంధానం అలాగే ఇంటర్‌ఆపరబిలిటీ వంటి రంగాల్లో పరస్పర సహకారం లభించనుంది.

అయితే, ఈ అంతర్జాతీయ ఉత్పాదక ఒప్పందంలో   గమనార్హమైన విషయం ఏమిటంటే..  ఈ యుద్ధ విమానానికి సంబంధించిన ప్రాథమిక మేధోసంపత్తి హక్కులు  పూర్తిగా   FWDA వద్దే భద్రంగా ఉంటాయి. ఐరోపా భాగస్వామ్య సంస్థ కేవలం దీని ఉత్పత్తి ప్రక్రియలోనూ, సాంకేతికతను జోడించడంలోనూ,   గ్లోబల్ స్టాండర్డ్స్ అందుకోవడంలోనూ మాత్రమే తన నైపుణ్యాలను అందించనుంది. దీనివల్ల సాంకేతికతపై యాజమాన్య హక్కులు ఇండియాకే సొంతమవుతాయి.

 ఆపరేషన్ 777..   గ్లోబల్ విస్తరణ ప్రణాళిక

ఈ అంతర్జాతీయ ఉత్పాదక వ్యూహాన్ని ఫ్లయింగ్ వెడ్జ్ డిఫెన్స్ సంస్థ తన దీర్ఘకాలిక లక్ష్యమైన ఆపరేషన్ 777 లో భాగంగా ప్రవేశపెట్టింది. ప్రపంచవ్యాప్తంగా ఉన్న రక్షణ మార్కెట్లను చేజిక్కించుకునేందుకు రూపొందించిన భారీ ప్రణాళిక ఇది. ఈ వ్యూహం ప్రకారం, ప్రపంచంలోని ఏడు ఖండాలలో గల దాదాపు 77 దేశాలలో తయారీ, అసెంబ్లింగ్,  విస్తరణ భాగస్వామ్య నెట్‌వర్క్‌లను ఏర్పాటు చేయాలని ఆ సంస్థ లక్ష్యంగా పెట్టుకుంది. ఈ గ్లోబల్ నెట్‌వర్క్‌లో పోర్చుగల్‌లో ఏర్పాటు చేయబోయే హబ్ మొదటి కీలక కేంద్రంగా సేవలందించనుంది.

ఈ రకమైన అంతర్జాతీయ విస్తరణ అనేది ఒక  ఇండియన్ రక్షణ రంగ స్టార్టప్ సంస్థ,  గ్లోబల్ డిఫెన్స్-టెక్ హౌస్‌గా ఎదగాలనే బలమైన ఆకాంక్షను నిరూపిస్తోంది. ప్రపంచ రక్షణ రంగంలో భారత్ కేవలం ఒక వినియోగదారు దేశంగానే కాకుండా, అంతర్జాతీయ సరఫరా వ్యవస్థలో ఒక ముఖ్యమైన భాగస్వామిగా మారేందుకు ఇటువంటి వ్యూహాత్మక అడుగులు ఎంతగానో తోడ్పడతాయి.

వ్యూహాత్మక ప్రాధాన్యత..  మార్కెట్ అవకాశాలు

గత కొన్ని దశాబ్దాలుగా భారతదేశం తన వైమానిక,  రక్షణ అవసరాల కోసం రష్యా, ఫ్రాన్స్, అమెరికా వంటి అగ్రదేశాలపైనే అధికంగా ఆధారపడుతూ వస్తోంది. ఇటువంటి చారిత్రక నేపథ్యంలో, ఒక భారత ప్రైవేట్ డీప్-టెక్ స్టార్టప్ ఏకంగా ఐరోపా ఖండంలోనే తన ఉత్పత్తి కేంద్రాన్ని నెలకొల్పడం అనేది అటు ప్రతీకాత్మకంగానూ, ఇటు వ్యూహాత్మకంగానూ చాలా పెద్ద పరిణామం. ఇది కేవలం భారతదేశ ఎగుమతి సామర్థ్యాన్ని పెంచడమే కాకుండా,   దేశీయ సాంకేతిక పరిజ్ఞానం అంతర్జాతీయ ప్రమాణాలకు ఏమాత్రం తీసిపోదని ప్రపంచానికి చాటిచెబుతోంది.

మరోవైపు, నాటో   కూటమికి సంబంధించిన సాంకేతిక పర్యావరణ వ్యవస్థలకు,  ఆయా దేశాల మార్కెట్లకు దగ్గరగా ఉండడం వల్ల ఈ ప్రాజెక్టుకు అనేక ప్రయోజనాలు చేకూరనున్నాయి. దీనివల్ల వివిధ దేశాల రక్షణ వ్యవస్థలతో కలిసి పనిచేసే ఇంటర్‌ఆపరబిలిటీ సామర్థ్యం పెరుగుతుంది. అలాగే పాశ్చాత్య దేశాల ప్రమాణాల ప్రకారం కఠినమైన పరీక్షలు నిర్వహించడానికి,  అంతర్జాతీయ మార్కెట్లలోకి సులభంగా ప్రవేశించడానికి కొత్త ద్వారాలు తెరుచుకుంటాయి.

భారత ప్రైవేట్ రక్షణ రంగంలో నూతన పరిణామం

ఈ సరికొత్త పరిణామం భారతదేశంలోని ప్రైవేట్ రక్షణ రంగం ఒక పరిణతి చెందిన దశకు చేరుకుందనే విషయాన్ని స్పష్టం చేస్తోంది. ఒకప్పుడు దేశీయ రక్షణ ఉత్పాదక రంగం అనేది కేవలం ప్రభుత్వ రంగ సంస్థల  పరిధికే పరిమితమై ఉండేది. కానీ ప్రస్తుతం మారుతున్న కాలంతో పాటు ప్రైవేట్ రంగంలోని డీప్-టెక్ స్టార్టప్‌లు సైతం ఆర్టిఫిషియల్ ఇంటెలిజెన్స్, అటానమీ, సిమ్యులేషన్, అలాగే లాంగ్-ఎండ్యూరెన్స్ ప్లాట్‌ఫారమ్‌ల వంటి అత్యంత సంక్లిష్టమైన సాంకేతిక రంగాలలోకి ధైర్యంగా అడుగుపెడుతున్నాయి.

 ఇటువంటి అత్యాధునిక రక్షణ ప్రాజెక్టులు అంతర్జాతీయ స్థాయిలో దీర్ఘకాలం పాటు విజయవంతం కావాలంటే కొన్ని సవాళ్లను అధిగమించాల్సి ఉంటుంది. వివిధ దేశాలకు సంబంధించిన కఠినమైన నియంత్రణలు, రక్షణ ఉత్పత్తుల ఎగుమతి నిబంధనలు, సాంకేతిక విశ్వసనీయత,  అత్యున్నత భద్రతా ప్రమాణాలను నిరంతరం పాటించడం అత్యంత ముఖ్యం. వీటిని సమర్థవంతంగా మేనేజ్ చేసినప్పుడే అంతర్జాతీయ మార్కెట్లో స్థిరమైన వృద్ధి సాధ్యమవుతుంది.

భవిష్యత్తు అంచనాలు

కాల్ భైరవ యుద్ధ విమానాన్ని పోర్చుగల్‌లో ఉత్పత్తి చేయాలనే నిర్ణయం కేవలం ఒక వాణిజ్య ఒప్పందం మాత్రమే కాదు, ఇది భారత మేధోశక్తి అంతర్జాతీయ తయారీ రంగంతో ఎలా సమ్మిళితం కాగలదో చూపించే ఒక అద్భుతమైన ఉదాహరణ. ఈ ప్రాజెక్ట్ ఒకవైపు భారతదేశపు సాంకేతిక నైపుణ్యాలను ప్రపంచ వేదికపై సగర్వంగా నిలబెడుతుండగా..  మరోవైపు స్వయంప్రతిపత్తి కలిగిన ఆధునిక యుద్ధ వ్యవస్థల అంతర్జాతీయీకరణకు సంబంధించిన నైతిక, వ్యూహాత్మక, అలాగే అంతర్జాతీయ చట్టపరమైన అంశాలపై సరికొత్త చర్చకు దారితీస్తోంది. భవిష్యత్తులో ఈ ప్రాజెక్ట్ సాధించే విజయాలు భారతీయ ప్రైవేట్ రక్షణ రంగానికి మరిన్ని గ్లోబల్ అవకాశాలను తెచ్చిపెడతాయని నిపుణులు భావిస్తున్నారు.

-సీతారాం కంఠంనేని

ఈ విశ్లేషణ మీకు నచ్చినట్లయితే, దయచేసి https://www.teluguone.com పోర్టల్ ను  ఫాలో అవ్వండి. లైక్ చేయండి. షేర్ చేయండి. మీ విలువైన అభిప్రయాలను తెలియజేయండి.