వంద రోజుల్లో హామీల అమలుపై బీఆర్‌ఎస్‌ వ్యంగ్యాస్త్రాలు..!

తెలంగాణ భవన్‌లో బీఆర్‌ఎస్‌ ఆధ్వర్యంలో జరిగిన మాక్‌ అసెంబ్లీ రాజకీయ వర్గాల్లో తీవ్ర ఆసక్తిని, చర్చను రేకెత్తిస్తోంది. అసలు సభను తలపించేలా సాగిన ఈ కార్యక్రమంలో మాజీ మంత్రి తలసాని శ్రీనివాస్ యాదవ్ ముఖ్యమంత్రి పాత్ర పోషించి అందరినీ ఆశ్చర్యపరిచారు. జహీరాబాద్ ఎమ్మెల్యే మాణిక్ రావు ఈ మాక్ అసెంబ్లీకి శాసనసభ స్పీకర్‌గా వ్యవహరించారు. ప్రజా సమస్యలపై బీఆర్‌ఎస్‌ సభ్యులు సభలో ప్లకార్డులు ప్రదర్శిస్తూ ప్రభుత్వ తీరుపై తీవ్ర నిరసన తెలిపారు. ఈ సందర్భంగా సీఎం పాత్రలో కనిపించిన తలసాని శ్రీనివాస్ యాదవ్ కాంగ్రెస్‌ ప్రభుత్వం ఇచ్చిన ఎన్నికల హామీలు, వాటి అమలు తీరుపై తనదైన శైలిలో వ్యంగ్యాస్త్రాలు సంధించారు. 

కాంగ్రెస్ పార్టీ అధికారంలోకి రాకముందు వంద రోజుల్లోనే అన్ని హామీలు అమలు చేస్తామని ఊరూవాడా ఊదరగొట్టిందని, కానీ తాము అధికారంలోకి వచ్చాక ఏ వంద రోజుల్లో అమలు చేస్తామని స్పష్టంగా చెప్పామా అంటూ ఆయన చేసిన వ్యాఖ్యలు సభలో నవ్వులు పూయించాయి. "మేము వంద రోజుల్లో హామీలు అమలు చేస్తామని అన్నాం.. కానీ అది ఏ వంద రోజుల్లో అని ఎక్కడైనా చెప్పామా? ఐదేళ్లు కాదు, ఏకంగా 25 ఏళ్లు మేమే అధికారంలో ఉంటాం. ఎప్పుడో ఒకప్పుడు మా హామీలు అమలు చేస్తాంలే" అంటూ తలసాని ఎద్దేవా చేశారు. సభలో సభ్యులు కేవలం సబ్జెక్ట్ గురించి మాత్రమే కాకుండా ఏ విషయమైనా మాట్లాడుకోవచ్చంటూ ఆయన చేసిన చమత్కారాలు ఆహూతులను అలరించాయి. 

తనకు కూడా చాలా సమస్యలున్నాయని, ఢిల్లీతో సమస్యలు, పార్టీలో సమస్యలు, ఆఖరికి బీఆర్‌ఎస్‌తో కూడా ప్రశాంతత లేకుండా పోయిందంటూ ఆయన చేసిన వ్యాఖ్యానాలు రాజకీయ వర్గాల్లో వైరల్ అవుతున్నాయి. ఇక ప్రపంచంలోనే అతిపెద్ద ఎత్తిపోతల పథకాల్లో (లిఫ్ట్ ఇరిగేషన్) ఒకటైన కాళేశ్వరం ప్రాజెక్టును ఇందిరాగాంధీ నిర్మించారంటూ ఆయన చేసిన చారిత్రక వ్యాఖ్య సభలో నవ్వులు తెప్పించడంతో పాటు కాంగ్రెస్ వైఫల్యాలను ఎత్తిచూపింది.

 

రాష్ట్రంలో కాంగ్రెస్‌ ప్రభుత్వం అధికారంలోకి రావడానికి వంద రోజుల్లో అన్నీ ఇస్తామంటూ ప్రజలను నమ్మించి, తీరా మోసంతోనే గద్దెనెక్కిందని బీఆర్‌ఎస్‌ నేతలు తీవ్రస్థాయిలో ధ్వజమెత్తారు. ఈ మాక్ అసెంబ్లీ ద్వారా ప్రభుత్వ వైఫల్యాలను ప్రజల్లోకి బలంగా తీసుకెళ్లాలని గులాబీ దళం వ్యూహరచన చేస్తోంది. హామీల అమలులో జరుగుతున్న జాప్యంపై ప్రజలకు సమాధానం చెప్పాలని డిమాండ్ చేస్తూ బీఆర్‌ఎస్‌ నేతలు చేపట్టిన ఈ వినూత్న నిరసన కార్యక్రమం ఇప్పుడు రాష్ట్ర రాజకీయాల్లో హాట్ టాపిక్‌గా మారింది.

 

 

 

[ Mock Assembly, Talasani Srinivas Yadav, BRS, Congress promises, 100 days rule, Kaleshwaram project, KCR, KTR BRS Party, CM Revanth reddy]