మహారాష్ట్రలోని ఛత్రపతి శంభాజీనగర్ పరిధిలో అత్యంత హృదయవిదారక ఘటనా ఒకటి వెలుగు చూసింది. కంటికి రెప్పలా పెంచుకున్న కుమారుడిని కాపాడుకోవాలనే తాపత్రయం ఆ తల్లిదండ్రుల ప్రాణాలనే తీసింది. తీవ్ర ఆవేదనతో కొండపై నుంచి దూకేందుకు సిద్ధమైన కొడుకును సురక్షితంగా వెనక్కి లాగేందుకు ప్రయత్నించిన తల్లిదండ్రులు, ప్రమాదవశాత్తు లోయలో పడి ప్రాణాలు కోల్పోయారు. ఈ ఘటనతో స్థానికంగా తీవ్ర శోకసంద్రం అలుముకుంది.

మృతులు ఛత్రపతి శంభాజీనగర్‌ జిల్లాలోని దేవలాయ్ ప్రాంతానికి చెందిన ఒకే కుటుంబ సభ్యులుగా పోలీసులు ప్రాథమికంగా గుర్తించారు. ఆ ఇంట్లోని 18 ఏళ్ల యువకుడు కుటుంబంలో తలెత్తిన కొన్ని మనస్పర్థలు లేదా వ్యక్తిగత కారణాలతో తీవ్ర మనస్తాపానికి గురయ్యాడు. ఈ క్రమంలో సమీపంలోని ఖవ్దా కొండ ప్రాంతానికి చేరుకుని ఆత్మహత్య చేసుకుంటానంటూ హెచ్చరిస్తూ కొండ అంచున నిలబడ్డాడు.

సమాచారం అందుకున్న వెంటనే అటు తల్లిదండ్రులు, గ్రామస్థులు  స్థానిక పోలీసులు హుటాహుటిన అక్కడకు చేరుకున్నారు. యువకుడిని శాంతింపజేసేందుకు, కిందకు తీసుకువచ్చేందుకు సుమారు మూడు గంటల పాటు తీవ్రస్థాయిలో ప్రయత్నాలు సాగాయి. పోలీసులు, స్థానికులు ఎంత నచ్చజెప్పినా ఆ యువకుడు వెనక్కి తగ్గేందుకు నిరాకరిస్తూ కొండ అంచునే ఉండిపోవడంతో అక్కడ తీవ్ర ఉత్కంఠ నెలకొంది.

పరిస్థితి చేయిదాటిపోతుండటంతో ఆందోళన చెందిన తండ్రి, ధైర్యం చేసి కొండ అంచు వరకు వెళ్లి కొడుకును సురక్షితంగా వెనక్కి లాగేందుకు ప్రయత్నించాడు. అయితే ఊహించని విధంగా ఇద్దరూ అదుపుతప్పి లోయలోకి పడిపోయారు. కళ్లముందే భర్త, కుమారుడు లోయలో పడిపోవడాన్ని చూసిన తల్లి తీవ్రమైన మానసిక దిగ్భ్రాంతికి గురై, నియంత్రణ కోల్పోయి క్షణాల వ్యవధిలోనే ఆ కొండపై నుండి కిందకు పడిపోయింది.

ఘటనా స్థలంలోనే ముగ్గురు తీవ్ర గాయాలపాలై ప్రాణాలు విడిచారు. పోలీసులు అక్కడే ఉన్నప్పటికీ, అంతా కంటిరెప్పపాటు కాలంలో జరిగిపోవడంతో ప్రమాదాన్ని నివారించలేకపోయారు. గంటల తరబడి సాగిన ఈ ఉత్కంఠ చివరకు ఒకే కుటుంబానికి చెందిన ముగ్గురి ప్రాణాలను తీయడంతో అక్కడున్న వారంతా కన్నీరుమున్నీరయ్యారు.

ప్రస్తుతం ఘటనకు సంబంధించిన దృశ్యాలు సామాజిక మాధ్యమాల్లో వ్యాపించడంతో ఈ దుర్ఘటన తీవ్ర సంచలనంగా మారింది. కష్ట సమయాల్లో క్షణికావేశంలో తీసుకునే నిర్ణయాలు మొత్తం కుటుంబాలను ఎలా బలితీసుకుంటాయనే దానికి ఈ ఘటన నిదర్శనంగా నిలిచింది.

ఈ ప్రమాదంపై పోలీసులు కేసు నమోదు చేసుకుని దర్యాప్తు ప్రారంభించారు. మృతదేహాలను పోస్ట్‌మార్టం నిమిత్తం సమీప ప్రభుత్వ ఆసుపత్రికి తరలించారు. క్షణికావేశంలో ఆత్మహత్య బెదిరింపులకు పాల్పడే యువతకు, కౌన్సెలింగ్ మరియు అవగాహన కల్పించాల్సిన అవసరం ఉందని ఈ ఘటన తర్వాత స్థానిక సామాజికవేత్తలు అభిప్రాయపడుతున్నారు.

Maharashtra Tragedy, Chhatrapati Sambhajinagar Incident, Khavda Hill Accident, Family Dies Falling From Hill, Devalai Area News