బ్యాంకులో మన డబ్బు భద్రంగా ఉంటుందని భావిస్తాం, కానీ అదే బ్యాంక్ సాంకేతిక లోపాలు, నిర్లక్ష్యంతో అత్యవసర నిధులను నెలల తరబడి నిలిపివేస్తే ఆ బాధ వర్ణనాతీతం. యునైటెడ్ కింగ్‌డమ్‌లోని ఒక చిన్న పల్లెటూరు చర్చి కమిటీకి సరిగ్గా ఇటువంటి విచిత్రమైన, కష్టతరమైన అనుభవమే ఎదురైంది. బ్రిటన్‌లోని ప్రముఖ లాయిడ్స్ బ్యాంక్ (Lloyds Bank) చేసిన చిన్న పొరపాటు, చూపించిన అలసత్వం వల్ల ఒక గ్రామీణ చర్చి నిధులు పొందలేక తీవ్ర ఇబ్బందులు ఎదుర్కొంది. గత సంవత్సరం నవంబర్‌లో లాయిడ్స్ బ్యాంక్ తమ పారిష్ చర్చి ఖాతాను మూసివేస్తున్నామని, దాని స్థానంలో కొత్త బిజినెస్ ఖాతాను తెరవాలని చర్చి ట్రెజరర్‌కు సమాచారం అందించింది. ఈ నూతన ఖాతా ప్రక్రియను కేవలం ఆన్‌లైన్ ద్వారా మాత్రమే పూర్తి చేయాల్సి ఉంటుంది. అయితే, బ్యాంక్ ఆన్‌లైన్ సిస్టమ్‌లోని సాంకేతిక లోపం వల్ల ట్రెజరర్‌తో పాటు లోకల్ బ్యాంక్ బ్రాంచ్ సిబ్బంది కూడా కొత్త ఖాతాను తెరవలేకపోయారు. దీంతో బ్రాంచ్ అధికారుల సలహా మేరకు, మార్చి నెల ప్రారంభంలో ట్రెజరర్ మరొక బ్యాంకులో నూతన ఖాతాను తెరిచారు. అప్పటి నుండి పాత ఖాతాలో ఉన్న బ్యాలెన్స్‌ను కొత్త ఖాతాలోకి బదిలీ చేయాలని లాయిడ్స్ బ్యాంకును నిరంతరం అభ్యర్థిస్తూనే వచ్చారు.

కానీ బ్యాంక్ యజమాన్యం నుంచి ఎలాంటి సానుకూల స్పందన రాలేదు. ప్రతిసారీ బ్రాంచ్‌ను సందర్శించాలని, కొద్ది వారాల్లో డబ్బు జమ అవుతుందని అధికారులు దాటవేత ధోరణి ప్రదర్శించారు. అంతటితో ఆగకుండా, ట్రెజరర్ సమర్పించిన గుర్తింపు పరిశీలన (Identity Verification) పత్రాలను బ్యాంక్ పోగొట్టుకుందని, అందుకే ఈ ఫైల్‌ను ప్రాధాన్యత జాబితాలో అత్యంత కిందకి నెట్టివేశామని చెప్పడం గమనార్హం. కాగా, కేవలం 60 ఇళ్ళు ఉన్న ఒక చిన్న గ్రామంలో, కేవలం 10 మంది సభ్యులు మాత్రమే ఉన్న చర్చి సంఘానికి నిలిచిపోయిన ఆ £5,500 (సుమారు 5.5 లక్షల రూపాయలకు పైగా) చాలా పెద్ద మొత్తం. చర్చికి అత్యవసరంగా కావలసిన మరమ్మతులు పూర్తి చేయడానికి, అలాగే కరెంట్ బిల్లులు చెల్లించడానికి వేరే దారి లేక చర్చి సభ్యుల నుండి అప్పుగా డబ్బులు సేకరించాల్సి వచ్చింది.

ఈ దారుణమైన నిర్లక్ష్యంపై మీడియా మరియు కస్టమర్ ఛాంపియన్స్ దృష్టికి విషయం వెళ్ళడంతో లాయిడ్స్ బ్యాంక్ ఒక్కసారిగా ఉలిక్కిపడింది. పబ్లిక్ మీడియాలో ఈ విషయం వెలుగులోకి వస్తుందని గ్రహించిన వెంటనే బ్యాంక్ వేగంగా స్పందించింది. తమ కమ్యూనికేషన్ వ్యవస్థలో లోపాలు ఉన్నాయని అంగీకరిస్తూ ఒక క్షమాపణ లేఖను పంపింది. అలాగే సద్భావానకి (Goodwill) చిహ్నంగా £400 పరిహారం మరియు నిలిచిపోయిన కాలానికి వడ్డీ కింద £96 చెల్లిస్తామని ఆఫర్ చేసింది.

 

 

 

Lloyds Bank blocks 5500 pounds account balance, parish church funds frozen lloyds bank delay.