దేశంలోనే అతిపెద్ద జీవిత భీమా సంస్థ లైఫ్ ఇన్సూరెన్స్ కార్పొరేషన్ ఆఫ్ ఇండియా (LIC) తన కోట్లాది మంది పాలసీదారులకు ఊహించని షాక్ ఇచ్చింది. డిజిటల్ విధానంలో ప్రతి నెలా లేదా సంవత్సరానికి ఒకసారి ఎల్‌ఐసీ ప్రీమియం చెల్లించే వారి కోసం ఒక ముఖ్యమైన సదుపాయాన్ని హఠాత్తుగా నిలిపివేసింది. ఎల్‌ఐసీ తన అధికారిక వెబ్‌సైట్ మరియు కస్టమర్ పోర్టల్ ద్వారా ఇన్సూరెన్స్ ప్రీమియంలను క్రెడిట్ కార్డులను ఉపయోగించి చెల్లించే ఆప్షన్‌ను సైలెంట్‌గా తొలగించింది. ఈ నిర్ణయం వల్ల క్రెడిట్ కార్డ్ రివార్డ్ పాయింట్లు, క్యాష్‌బ్యాక్ ఆఫర్లు పొందుతూ క్రెడిట్ కార్డుల ఆధారంగా ప్రీమియంలు చెల్లించే లక్షలాది మంది పాలసీదారులు తీవ్ర ఇబ్బందులు ఎదుర్కొనే పరిస్థితి ఏర్పడింది. ప్రస్తుతం ఎల్‌ఐసీ పోర్టల్‌లో లాగిన్ అయినప్పుడు యూజర్లకు కేవలం నెట్ బ్యాంకింగ్, డెబిట్ కార్డ్ మరియు యూపీఐ (UPI) చెల్లింపు మార్గాలు మాత్రమే అందుబాటులో కనిపిస్తున్నాయని సోషల్ మీడియాలో నెటిజన్లు ఆందోళన వ్యక్తం చేస్తున్నారు.

ఈ ఆకస్మిక మార్పు వెనుక పేమెంట్ గేట్‌వే సంస్థలతో ఏర్పడిన ఆర్థిక విభేదాలే ప్రధాన కారణమని తెలుస్తోంది. ఇప్పటివరకు ఎల్‌ఐసీ ఆన్‌లైన్ డిజిటల్ ట్రాన్సాక్షన్ల కోసం బిల్‌డెస్క్ (BillDesk) అనే ప్రముఖ పేమెంట్ గేట్‌వే సేవలను ఉపయోగిస్తూ వచ్చింది. అయితే క్రెడిట్ కార్డ్ ద్వారా జరిగే లావాదేవీలపై బిల్‌డెస్క్ వసూలు చేసే ఎంసిఆర్ లేదా సర్వీస్ ఛార్జీల విషయంలో ఎల్‌ఐసీ యాజమాన్యానికి, బిల్‌డెస్క్ సంస్థకు మధ్య సమ్మతి కుదరలేదని వార్తలు వస్తున్నాయి. గతంలో ఎల్‌ఐసీ తన వెబ్‌సైట్‌లో డెబిట్ కార్డ్‌లు, నెట్ బ్యాంకింగ్ మరియు యూపీఐ లావాదేవీలకు 0% అదనపు రుసుము వసూలు చేస్తామని, కానీ క్రెడిట్ కార్డ్‌ల వినియోగానికి మాత్రం కన్వీనియన్స్ ఫీజు లేదా ప్రాసెసింగ్ ఛార్జీలు వర్తిస్తాయని స్పష్టంగా పేర్కొంది. ప్రస్తుతం సర్వీస్ ఫీజుల వివాదం కారణంగానే ఈ ఆప్షన్‌ను నిలిపివేశారని సమాచారం.

 

 

 

lic online policy premium payment changes,lic credit card payment option removed.