ఇండియన్ ప్రీమియర్ లీగ్ (IPL 2027) మినీ ఆక్షన్‌కు సమయం దగ్గరపడుతుండటంతో క్రికెట్ వర్గాల్లో వేలం వేడి మొదలైంది. ముఖ్యంగా మాజీ ఛాంపియన్ కోల్‌కతా నైట్ రైడర్స్ (KKR) ఫ్రాంచైజీ రాబోయే సీజన్ కోసం జట్టులో భారీ ప్రక్షాళనకు సిద్ధమవుతోంది. గత సీజన్లలో ఆశించిన స్థాయిలో రాణించలేకపోవడంతో మేనేజ్‌మెంట్ కీలక నిర్ణయాలు తీసుకునేందుకు పావులు కదుపుతోంది. ఈసారి యువ ఆటగాళ్లకు పెద్దపీట వేస్తూ, భారీ ధర పలికి నిరాశపరిచిన కొందరు స్టార్ ఆటగాళ్లకు ఉద్వాసన పలకాలని కేకేఆర్ యాజమాన్యం భావిస్తున్నట్లు తెలుస్తోంది.

ఈ భారీ మార్పులలో భాగంగా కేకేఆర్ తమ ప్రధాన భారత ఆటగాళ్ల కోర్‌ను మాత్రం చెక్కుచెదరకుండా పటిష్టంగా ఉంచుకోవాలని చూస్తోంది. జట్టు బ్యాటింగ్ విభాగంలో కీలకమైన ఫినిషర్ రింకూ సింగ్, మిస్టరీ స్పిన్నర్ వరుణ్ చక్రవర్తి, మరియు యువ పేస్ సంచలనం హర్షిత్ రాణా జట్టులో కొనసాగడం దాదాపు ఖాయంగా కనిపిస్తోంది. వీరితో పాటు ఆల్ రౌండర్ రమణ్‌దీప్ సింగ్, పేసర్ వైభవ్ అరోరా, యంగ్ బ్యాటర్ అంగ్‌క్రిష్ రఘువంశీ కూడా తమ నిలకడైన ప్రదర్శనతో ఫ్రాంచైజీ నమ్మకాన్ని నిలబెట్టుకుని రిటెన్షన్ జాబితాలో తమ స్థానాలను సుస్థిరం చేసుకున్నారు.

అలాగే జట్టుకు ఎన్నో ఏళ్లుగా వెన్నెముకగా నిలుస్తున్న సీనియర్ కరేబియన్ ఆల్ రౌండర్ సునీల్ నరైన్ సేవలను కేకేఆర్ మరోసారి వినియోగించుకోనుంది. నరైన్‌తో పాటు అనుభవజ్ఞుడైన భారత బ్యాటర్ మనీష్ పాండే, ఆల్ రౌండర్ అనుకూల్ రాయ్‌లను కూడా జట్టులోనే అట్టిపెట్టుకునే అవకాశాలు మెండుగా ఉన్నాయి. విదేశీ ఆటగాళ్ల కోటాలో విధ్వంసకర బ్యాటర్ రోవ్‌మన్ పావెల్, న్యూజిలాండ్ ఓపెనర్ ఫిన్ అలెన్ పేర్లు కూడా కేకేఆర్ రిటెన్షన్ లిస్ట్‌లో బలంగా వినిపిస్తున్నాయి.

అయితే, గత వేలంలో భారీ ధరలు పెట్టి కొనుగోలు చేసిన కొందరు ఆటగాళ్లు మాత్రం కేకేఆర్ పర్స్‌కు పెను భారంగా మారారు. ముఖ్యంగా రూ. 25.20 కోట్ల రికార్డు ధరకు సొంతం చేసుకున్న ఆస్ట్రేలియా స్టార్ ఆల్-రౌండర్ కామెరూన్ గ్రీన్ గత సీజన్‌లో కేవలం 322 పరుగులు చేసి, 7 వికెట్లు మాత్రమే తీసి తీవ్రంగా నిరాశపరిచాడు. అదేవిధంగా రూ. 18 కోట్ల భారీ వ్యయంతో జట్టులోకి తీసుకున్న శ్రీలంక యార్కర్ల స్పెషలిస్ట్ మతీషా పతిరణ ఫిట్‌నెస్ సమస్యల కారణంగా సీజన్ మొత్తంలో కేవలం 8 బంతులు మాత్రమే బౌలింగ్ చేయగలిగాడు. ఈ ఇద్దరిని రిలీజ్ చేయడం ద్వారా కేకేఆర్ ఏకంగా రూ. 43.20 కోట్ల భారీ పర్స్ బ్యాలెన్స్‌ను తిరిగి పొందాలని చూస్తోంది.

ఇది కూడా చదవండి : ఐపీఎల్ 2027: రూ. 14.2 కోట్ల స్టార్ ఆటగాడిని రిలీజ్ చేయనున్న సీఎస్‌కే!

మరోవైపు, సీనియర్ భారత ఆటగాడు అజింక్య రహానే విషయంలోనూ కేకేఆర్‌కు కీలక మార్పు తప్పడం లేదు. రూ. 1.50 కోట్ల ధరతో గత రెండు సంవత్సరాలుగా కేకేఆర్‌కు ప్రాతినిధ్యం వహించి, జట్టుకు కెప్టెన్‌గా కూడా వ్యవహరించిన రహానే.. ఐపీఎల్ 2026 ముగిసిన తర్వాత ఆటకు వీడ్కోలు పలికాడు. దీంతో అతను రిటెన్షన్ రేసు నుంచి పూర్తిగా తప్పుకోవడంతో జట్టుకు కొత్త నాయకుడిని ఎంచుకోవాల్సిన పరిస్థితి ఏర్పడింది.

ఇక జట్టులో సరైన అవకాశాలు దక్కని మరికొందరు ఆటగాళ్లను కూడా వదిలించుకోవాలని కేకేఆర్ నిర్ణయించుకుంది. రూ. 2 కోట్ల ధరకు కొనుగోలు చేసిన న్యూజిలాండ్ ఆల్ రౌండర్ రచిన్ రవీంద్ర ఎక్కువ సమయం బెంచ్‌కే పరిమితం కావడంతో అతన్ని రిలీజ్ చేసే అవకాశం ఉంది. వీరితో పాటు రూ. 75 లక్షల చొప్పున ధర పలికిన రాహుల్ త్రిపాఠి, పేసర్ నవ్‌దీప్ సైనీలను కూడా వేలంలోకి వదిలిపెట్టి, భారీ పర్స్ బ్యాలెన్స్‌తో మినీ ఆక్షన్‌లో సరికొత్త వ్యూహాలతో బరిలోకి దిగేందుకు కోల్‌కతా నైట్ రైడర్స్ సన్నద్ధమవుతోంది.

మీకు నచ్చవచ్చు :కివీస్ సిరీస్‌కు ముందు షాకింగ్ సీన్: కోహ్లీని ముప్పుతిప్పలు పెట్టిన కుర్రాడు!

చరిత్ర సృష్టించిన మనీషా భన్వాలా.. ప్రపంచ రెజ్లింగ్‌లో తొలి గోల్డ్ మెడల్!

 

[Kolkata Knight Riders, KKR IPL 2027, IPL 2027 Mini Auction, Rinku Singh, Cameron Green, Matheesha Pathirana, Varun Chakravarthy, Sunil Narine, KKR Retention List, KKR Player Releases]