భారతీయ జనతా పార్టీ (BJP) ఎంపీ ప్రముఖ నటి కంగనా రనౌత్ మరోసారి గాంధీ-నేహ్రూ కుటుంబ చరిత్రపై తీవ్ర స్థాయిలో విమర్శలు గుప్పించారు. సోషల్ మీడియా వేదికగా వైరల్ అవుతున్న ఒక పాత వీడియో క్లిప్‌ను ప్రస్తావిస్తూ ఆమె చేసిన వ్యాఖ్యలు ప్రస్తుతం రాజకీయ వర్గాలలో తీవ్ర సంచలనం సృష్టిస్తున్నాయి. 

1981 నాటి ఒక కుటుంబ సమావేశానికి సంబంధించిన ఈ వీడియోలో ఇందిరా గాంధీ, రాజీవ్ గాంధీ, సోనియా గాంధీ, మేనక గాంధీతో పాటు రాహుల్, ప్రియాంక గాంధీలు కూడా కనిపిస్తున్నారు. అయితే, ఆ వీడియోలో సంజయ్ గాంధీ భార్య మేనక గాంధీ ఒంటరిగా, తీవ్రమైన క్షోభతో కుటుంబానికి దూరంగా నిలబడటాన్ని కంగనా ప్రస్తావించారు. 

సంజయ్ గాంధీ విమాన ప్రమాదంలో మరణించి సుమారు ఒక సంవత్సరం కావస్తున్న తరుణంలో, ఆ కుటుంబ సమావేశంలో మేనక పట్ల ఎవరూ స్పందించకపోవడం తనను కలచివేసిందని ఆమె ఆవేదన వ్యక్తం చేశారు. భర్తను కోల్పోయి, చిన్నారితో ఉన్న మేనక గాంధీని ఆ సమయంలో కుటుంబం నుంచి బయటకు పంపించేశారని కంగనా తీవ్ర ఆరోపణలు చేశారు. 

ఇందిరా గాంధీ నుంచి ఒక చిన్న చిరునవ్వు లేదా కంటి చూపు కోసం ఒక గాయపడిన చిన్నారిలా మేనక ఎదురుచూసినా, ఆమెకు కేవలం నిర్లక్ష్యమే ఎదురైందని, చివరికి ఆమె ఆ కుటుంబంలో అస్తిత్వం కోల్పోయినట్లుగా కనిపించిందని కంగనా పేర్కొన్నారు. 

ఇది కూడా చదవండి: జమ్మూకశ్మీర్‌లో ఉగ్రదాడి: సీఆర్పీఎఫ్ క్యాంప్‌పై కాల్పులు..ముగ్గురు జవాన్లకు గాయాలు.!

ఇదే సమయంలో, విదేశాల్లో ఒక కేఫ్‌లో పెద్ద కుమారుడు రాజీవ్ గాంధీని యాదృచ్ఛికంగా కలిసిన ఒక "రహస్య విదేశీ వ్యక్తి" (సోనియా గాంధీ) కుటుంబంలో ఎలా ఇమడగలిగారంటూ ఆమె వివాదాస్పద వ్యాఖ్యలు చేశారు. విదేశీ మూలాలున్న సోనియా గాంధీ ఆ తరువాత కాలంలో రాజకీయంగా చక్రం తిప్పి ప్రభుత్వానికి నాయకత్వం వహించే స్థాయికి ఎలా చేరుకోగలిగారంటూ కంగనా అనేక అనుమానాలు లేవనెత్తారు.   

ఒకవైపు సంజయ్ గాంధీకి ఇందిరా గాంధీ రాజకీయ శిక్షణ ఇస్తున్న కీలక సమయంలోనే ఆయన అనుమానాస్పద స్థితిలో మరణించారని, ఆ వెంటనే మేనక గాంధీని కుటుంబం నుంచి వెలేశారని కంగనా గుర్తుచేశారు. ఆ పరిణామాల తర్వాత ఇందిరా గాంధీ, రాజీవ్ గాంధీలు కూడా వరుస హత్యలకు గురయ్యారని ఆమె పేర్కొన్నారు.

 ఈ వరుస విషాదాల నేపథ్యంలో, చివరికి ఎటువంటి రాజకీయ నేపథ్యం లేని ఒక విదేశీ మహిళ దేశ ప్రభుత్వానికి అధిపతిగా ఎలా మారగలిగారంటూ కంగనా "ఎంత సౌకర్యవంతంగా ఉంది" అంటూ ఎద్దేవా చేశారు. గాంధీ కుటుంబంలో జరిగిన వరుస మరణాలు మరియు ఆ పరిణామాల మధ్య సోనియా గాంధీ రాజకీయ ప్రవేశంపై కంగనా రనౌత్ చేసిన ఈ తాజా వ్యాఖ్యలు ప్రస్తుతం సోషల్ మీడియాలో విపరీతంగా వైరల్ అవుతూ జాతీయ రాజకీయాల్లో పెద్ద ఎత్తున చర్చకు దారితీశాయి.   

మీకు నచ్చవచ్చు: మాజీ ఉపరాష్ట్రపతి జగదీప్ ధన్‌ఖడ్‌కు తీవ్ర అస్వస్థత.. ఎయిమ్స్‌లో అత్యవసర చికిత్స.!

 

[ Kangana Ranaut, Sonia Gandhi, Maneka Gandhi, Gandhi family, Indira Gandhi, Indian politics ]