తుపాకీ చూపించి, మద్యం తాగించి.. మహారాష్ట్రలో దారుణం..!

మహారాష్ట్రలో కలకలం రేపిన ఒక దారుణ సంఘటనలో, కుటుంబ వివాదాన్ని పరిష్కరిస్తామంటూ నమ్మించి 22 ఏళ్ల వివాహితపై సామూహిక అత్యాచారానికి పాల్పడిన ఘటన వెలుగులోకి వచ్చింది. ఈ షాకింగ్ ఘటనకు సంబంధించి బీజేపీ మాజీ ఎమ్మెల్యే నరేంద్ర పవార్‌తో పాటు బర్తరఫ్ అయిన పోలీస్ ఉద్యోగి శైలేష్ పాటిల్‌పై పద్ఘా పోలీస్ స్టేషన్‌లో కేసు నమోదైంది. బాధితురాలు ఇచ్చిన ఫిర్యాదు ప్రకారం, తన భర్తతో ఉన్న వివాదాన్ని పరిష్కరించుకునేందుకు ఆమె సహాయం కోరగా, ఈ ఘాతుకానికి తెరలేపారు. సెప్టెంబర్ 13న వివాదాన్ని పరిష్కరిస్తానని చెప్పి నరేంద్ర పవార్ ఆమెను కళ్యాణ్‌లోని తన కార్యాలయానికి పిలిచారు. 

అక్కడి నుంచి పవార్, శైలేష్ పాటిల్ కలిసి ఆ మహిళను భివండి తాలూకాలోని బాప్‌గావ్‌లో ఉన్న ఒక ఫామ్‌హౌస్‌కు తీసుకెళ్లారు. ఆ ఫామ్‌హౌస్‌లో శైలేష్ పాటిల్ ఆయుధంతో బెదిరించి ఆమెకు బలవంతంగా మద్యం తాగించాడని, ఆ తర్వాత నరేంద్ర పవార్ ఆమెపై లైంగిక దాడికి పాల్పడ్డాడని బాధితురాలు తన ఫిర్యాదులో పేర్కొన్నారు. పవార్ అక్కడి నుంచి వెళ్ళిపోయిన అనంతరం శైలేష్ పాటిల్ కూడా ఆమెపై లైంగిక దాడి చేశారని వెల్లడించారు. తెల్లవారుజామున సుమారు 4 గంటల సమయంలో పాటిల్‌కు చెందిన కేర్‌టేకర్ బాధితురాలిని ఆమె ఇంటి వద్ద దింపినట్లు సమాచారం. 

ఈ దారుణం జరిగిన తర్వాత తీవ్ర భయాందోళనకు గురైన మహిళ, సెప్టెంబర్ 16న కళ్యాణ్-డొంబివ్లీ మున్సిపల్ కార్పొరేషన్‌కు చెందిన కాంగ్రెస్ కార్పొరేటర్ కంచన్ కులకర్ణిని ఆశ్రయించింది. తన వద్ద ఉన్న వీడియోలు, మొబైల్ వాట్సాప్ చాట్‌లను ఆమెకు చూపించి జరిగిన అన్యాయాన్ని వివరించింది. అనంతరం కార్పొరేటర్ కులకర్ణి బాధితురాలిని వెంటపెట్టుకుని అదే రాత్రి పద్ఘా పోలీస్ స్టేషన్‌కు వెళ్లి ఫిర్యాదు అందజేశారు. 

మహారాష్ట్ర డీజీపీ సదానంద్ డేట్‌ను సంప్రదించిన తర్వాత పోలీసుల నుంచి స్పష్టమైన ఆదేశాలు రావడంతో, పోలీసులు నరేంద్ర పవార్, శైలేష్ పాటిల్‌పై సామూహిక అత్యాచారం మరియు ఆయుధంతో బెదిరింపుల కింద కేసు నమోదు చేశారు. నిందితులను వెంటనే అరెస్టు చేయాలని, లేనిపక్షంలో పెద్ద సంఖ్యలో మహిళలతో కలిసి పోలీస్ స్టేషన్ ఎదుట ఆందోళన చేపడతామని కార్పొరేటర్ హెచ్చరించారు. ప్రస్తుతం ఈ సంచలన కేసుపై పోలీసులు లోతైన దర్యాప్తు కొనసాగిస్తున్నారు.

 

 

[ Kalyan gang rape case, former bjp mla narendra pawar, narendra pawar booked, bhiwandi crime news, kalyan crime news, maharashtra news ]