ఆర్టిఫిషియల్ ఇంటెలిజెన్స్ రంగంలో మళ్లీ తన ఆధిపత్యాన్ని నిరూపించుకోవడానికి ప్రముఖ చిప్‌మేకర్ ఇంటెల్ సరికొత్త వ్యూహంతో ముందుకు వచ్చింది. ఏజెంటిక్ ఏఐ వర్క్‌లోడ్స్ కోసం ప్రత్యేకంగా రూపొందించిన మూడు కొత్త ఆర్కిటెక్చర్లను హాట్ చిప్స్ 2026 సదస్సులో ఇంటెల్ ప్రపంచానికి పరిచయం చేసింది. ట్రాన్సిస్టర్ స్థాయి నుంచే కంప్యూటింగ్‌ను కొత్తగా డిజైన్ చేస్తున్నామని ఇంటెల్ చీఫ్ టెక్నాలజీ ఆఫీసర్ పుష్కర్ రణడే స్పష్టం చేశారు. ఈ సందర్భంగా 'డైమండ్ రాపిడ్స్', 'క్రెసెంట్ ఐలాండ్', మరియు 'వైల్డ్‌క్యాట్ లేక్' పేరుతో ఈ మూడు శక్తివంతమైన హార్డ్‌వేర్ ఆర్కిటెక్చర్ల వివరాలను వెల్లడించారు.

ముందుగా డేటా సెంటర్ల రంగాన్ని ఊపేసేందుకు వస్తున్న 'డైమండ్ రాపిడ్స్' ఆర్కిటెక్చర్ గురించి చూస్తే, ఇంటెల్ దీనిని 'జియాన్ 7' బ్రాండ్ పేరుతో మార్కెట్లోకి తీసుకురానుంది. ఇది ఏకంగా 256 ప్రాసెసింగ్ కోర్‌లను కలిగి ఉండటం విశేషం. దీనికి తోడు 1.28GB ల్యాస్ట్ లెవెల్ క్యాష్ మెమరీ, 16 మెమరీ ఛానెల్స్, 128 PCIe 6 లేన్లు మరియు CXL 3.0 సాంకేతికతకు మద్దతు ఇస్తుంది. ఇంటెల్ సొంత 18A-P ప్రాసెస్ నోడ్‌పై నిర్మించిన 16-కోర్ చిప్‌లెట్లను ఉపయోగించి ఈ ఫ్లాగ్‌షిప్ ప్రోసెసర్‌ను తీర్చిదిద్దారు. 2027 నాటికి అందుబాటులోకి రానున్న ఈ ప్రాసెసర్ ద్వారా మార్కెట్లో పోటీని తీవ్రం చేయాలని ఇంటెల్ భావిస్తోంది.

ఇక రెండోది 'క్రెసెంట్ ఐలాండ్' పేరుతో తీసుకొచ్చిన ఆర్టిఫిషియల్ ఇంటెలిజెన్స్ ఇన్ఫరెన్స్ గ్రాఫిక్స్ కార్డ్ (GPU). ఇది ఏఐ ప్రాసెసింగ్‌లో విప్లవాత్మక మార్పులు తెచ్చేలా రూపకల్పన చేయబడింది. 350 వాట్ల శక్తితో పనిచేసే ఈ ఎయిర్-కూల్డ్ కార్డ్ Xe3P గ్రాఫిక్స్ ఆర్కిటెక్చర్‌పై నడుస్తుంది. ఇందులో 32 గ్రాఫిక్స్ కోర్లు మరియు 256 థర్డ్-జెనరేషన్ XMX ఇంజన్లు ఉన్నాయి. దీనికి 32MB యునిఫైడ్ L2 క్యాష్ మెమరీని అమర్చారు. హై బ్యాండ్‌విడ్త్ మెమరీకి (HBM) బదులుగా తక్కువ ధరకు లభించే LPDDR5X మెమరీని ఉపయోగించడం ఇక్కడ గమనించదగిన అంశం. ఇంటెల్ బ్రాండెడ్ కార్డులు 160GB కెపాసిటీని కలిగి ఉంటే, థర్డ్ పార్టీ పార్టనర్లు అభివృద్ధి చేసే వర్షన్లలో 480GB వరకు మెమరీ సపోర్ట్ అందుబాటులో ఉంటుంది.

 

 

 

intel agentic ai hardware next gen architectures,intel xeon 7 diamond rapids specs.