"వయసు అనేది కేవలం ఒక సంఖ్య మాత్రమే" అనే మాటను దక్షిణాఫ్రికా లెజెండరీ స్పిన్నర్ ఇమ్రాన్ తాహిర్ మరోసారి అక్షరాలా నిజం చేసి చూపించారు. 47 ఏళ్ల వయసులోనూ మైదానంలో యువ ఆటగాళ్లకు ఏమాత్రం తగ్గని ఉత్సాహంతో, అద్భుతమైన ఫిట్‌నెస్‌తో రికార్డుల వేట కొనసాగిస్తున్నారు. కరీబియన్ ప్రీమియర్ లీగ్ (CPL) 2026లో భాగంగా జరిగిన 31వ మ్యాచ్‌లో గయానా అమెజాన్ వారియర్స్ కెప్టెన్‌గా బరిలోకి దిగిన ఇమ్రాన్ తాహిర్, సెయింట్ లూసియా కింగ్స్‌పై తన స్పిన్ మాయాజాలంతో చారిత్రాత్మక బౌలింగ్ ప్రదర్శన నమోదు చేశారు. ఈ మ్యాచ్‌లో కేవలం 4 ఓవర్లు బౌలింగ్ చేసి 17 పరుగులు మాత్రమే ఇచ్చి ఏకంగా 5 వికెట్లు పడగొట్టడం విశేషం.

ఈ అసాధారణ ప్రదర్శనతో తాహిర్ తన సుదీర్ఘ టీ20 కెరీర్‌లోనే అత్యుత్తమ బౌలింగ్ గణాంకాలను నమోదు చేశారు. అంతకుముందు టీ20 లీగ్స్‌లో 21 పరుగులు ఇచ్చి 5 వికెట్లు తీయడమే ఆయన కెరీర్ బెస్ట్‌గా ఉండేది, కానీ ఇప్పుడు 17 పరుగులకే 5 వికెట్లు తీసి తన సొంత రికార్డును తానే తిరగరాశారు. CPL చరిత్రలోనే ఒక జట్టుకు కెప్టెన్‌గా వ్యవహరిస్తూ 5 వికెట్లు పడగొట్టిన తొలి బౌలర్‌గా ఇమ్రాన్ తాహిర్ అరుదైన చరిత్ర సృష్టించారు. అంతేకాకుండా, ఫ్రాంచైజీ టీ20 క్రికెట్ చరిత్రలోనే 5 వికెట్ల ఘనత సాధించిన అత్యంత పెద్ద వయస్కుడిగా (47 ఏళ్లు) తాహిర్ సరికొత్త ప్రపంచ రికార్డును తన పేరిట లిఖించుకున్నారు. CPL టోర్నీలో ఆయనకు ఇది రెండోసారి 5 వికెట్ల ప్రదర్శన కాగా, ఓవరాల్ టీ20 కెరీర్‌లో మాత్రం ఇది ఆరోసారి కావడం విశేషం.

తాహిర్ దెబ్బకు సెయింట్ లూసియా కింగ్స్ బ్యాటింగ్ లైనప్ కుప్పకూలిపోయింది. ప్రత్యర్థి జట్టు 20 ఓవర్లు కూడా పూర్తిస్థాయిలో ఆడలేక, 18.5 ఓవర్లలోనే కేవలం 119 పరుగులకు ఆలౌట్ అయింది. అనంతరం 120 పరుగుల స్వల్ప లక్ష్యంతో బరిలోకి దిగిన గయానా అమెజాన్ వారియర్స్ జట్టు 18.3 ఓవర్లలో 6 వికెట్లు కోల్పోయి 122 పరుగులు చేసి విజయాన్ని అందుకని సెమీస్ ఆశలను సజీవంగా ఉంచుకుంది. మ్యాచ్‌ను పూర్తిగా తమ వైపు తిప్పేసి, ప్రపంచ రికార్డు నెలకొల్పిన ఇమ్రాన్ తాహిర్‌కు 'మ్యాన్ ఆఫ్ ది మ్యాచ్' అవార్డు లభించింది. ఏజ్ అనేది పర్‌ఫార్మెన్స్‌కు అడ్డుకాదని నిరూపిస్తూ, 47 ఏళ్ల వయసులోనూ మైదానమంతా పరుగెడుతూ సెలబ్రేట్ చేసుకుంటున్న తాహిర్ జాతరను చూసి క్రికెట్ ప్రపంచం ఫిదా అవుతోంది.

 

 

 

[Imran Tahir, CPL 2026, Caribbean Premier League, Guyana Amazon Warriors, Saint Lucia Kings, T20 Cricket, Imran Tahir 5 Wickets, Imran Tahir Records, CPL 2026 Match, Cricket Records]