భాగ్యనగరంలో శాంతిభద్రతలపై నగర ప్రజల ఆందోళన..!

హైదరాబాద్ నగరంలో ఇటీవల వరుసగా చోటుచేసుకుంటున్న దారుణ సంఘటనలు సాధారణ ప్రజలను తీవ్ర భయాందోళనలకు గురిచేస్తున్నాయి. పగటిపూట కూడా ఎటువంటి భయం లేకుండా నడిరోడ్లపై జరుగుతున్న దాడులు, హత్యలు నగరవాసులను కలవరపెడుతున్నాయి. ముఖ్యంగా భద్రతపై సామాన్యుల్లో నానాటికీ అభద్రతాభావం పెరుగుతోంది. కేవలం పది రోజుల వ్యవధిలో రాజేంద్రనగర్, మాదన్నపేట, నాగోల్ ప్రాంతాలతో పాటు తాజాగా ఫలక్‌నుమాలో జరిగిన హత్యలు నగరంలో శాంతిభద్రతల పరిస్థితిని ప్రశ్నార్థకం చేస్తున్నాయి. జనసంచారం ఎక్కువగా ఉండే ప్రధాన రహదారులపైనే దుండగులు ఈ దుశ్చర్యలకు పాల్పడటం స్థానికులను తీవ్రంగా దిగ్భ్రాంతికి గురిచేస్తోంది.

ఈ వరుస ఉదంతాల నేపథ్యంలో నగర ప్రజలు బిక్కుబిక్కుమంటూ కాలం వెల్లదీయాల్సిన దుస్థితి నెలకొంది. అత్యవసర పనుల మీద ఇళ్ల నుంచి బయటకు వెళ్లేవారు తిరిగి క్షేమంగా ఇంటికి చేరుకుంటామా లేదా అనే ఆందోళనను వ్యక్తం చేస్తున్నారు. చిన్నపాటి ట్రాఫిక్ సిగ్నల్స్ వద్ద లేదా స్వల్ప వాగ్వాదాల సమయంలోనూ అవతలి వ్యక్తులు ఏక్షణాన దాడి చేస్తారోనని భయపడి కిమ్మనకుండా ఉండిపోవాల్సి వస్తోందని వాపోతున్నారు. రోజురోజుకు పెరుగుతున్న ఈ నేరాల పట్ల ప్రజల్లో తీవ్ర నిరసన వ్యక్తమవుతోంది. రద్దీ ప్రాంతాల్లోనూ ఇలాంటి అసాంఘిక కార్యకలాపాలు పునరావృతం కాకుండా పోలీసులు కఠిన చర్యలు తీసుకోవాలని వారు కోరుతున్నారు.

ప్రధాన కూడళ్ల వద్ద పెట్రోలింగ్‌ను ముమ్మరం చేయాలని, రాత్రి వేళల్లోనే కాకుండా పగటిపూట కూడా నిఘా నేత్రాలను మరింత పెంచాలని నగరవాసులు విజ్ఞప్తి చేస్తున్నారు. శాంతిభద్రతలను పటిష్టంగా అమలు చేసి ప్రజల్లో ఆత్మైస్థైర్యాన్ని నింపాల్సిన అవసరం ఎంతైనా ఉందని నిపుణులు అభిప్రాయపడుతున్నారు. ఇటువంటి నేరాలకు పాల్పడే వారిపై చట్టపరంగా అత్యంత కఠిన శిక్షలు అమలు చేస్తేనే నేరస్థుల్లో భయం పుడుతుందని ప్రజలు అభిప్రాయపడుతున్నారు. తద్వారా భవిష్యత్తులో ఇలాంటి దారుణాలు పునరావృతం కాకుండా అడ్డుకట్ట వేయవచ్చని భావిస్తున్నారు. పోలీసులు తక్షణమే స్పందించి నగరంలో భద్రతా వాతావరణాన్ని పునరుద్ధరిస్తారని ప్రజలు ఆశగా ఎదురుచూస్తున్నారు.

 

 

[ Hyderabad murders, HYD crime news, law and order in Hyderabad, Falaknuma murder, Hyderabad local news Telugu, CM Revanth reddy, CP Sajjanar, DGP C.V. Anand, Hyderabad police, Telugu One, Telugu News ]