హైదరాబాద్ నగరం మరో ఘనమైన క్రీడా ఉత్సవానికి సిద్ధమైంది. భాగ్యనగరాన్ని ఫ్యాషన్, ఫిట్‌నెస్ రాజధానిగా నిలిపే 15వ ఎడిషన్  ఎన్‌ఎమ్‌డీసీ హైదరాబాద్ మారథాన్ 2026  (NMDC Hyderabad Marathon 2026) ఆగస్టు 29 మరియు 30 తేదీల్లో అత్యంత వైభవంగా జరగనుంది. తెలంగాణ ప్రభుత్వం, ఎన్‌ఎమ్‌డీసీ లిమిటెడ్, ఐడీఎఫ్‌సీ ఫస్ట్ బ్యాంక్ భాగస్వామ్యంతో హైదరాబాద్ రన్నర్స్ సొసైటీ నిర్వహిస్తున్న ఈ మెగా ఈవెంట్ దేశంలోనే రెండో అతిపెద్ద మారథాన్‌గా గుర్తింపు పొందింది. ప్రపంచ అథ్లెటిక్స్ (World Athletics Label) గుర్తింపు పొందిన ఈ పరుగులో భారత్‌తో పాటు విదేశాల నుంచి సుమారు 32,000 మందికి పైగా రన్నర్లు పాల్గొనబోతున్నారు. నాలుగు విభాగాల్లో నిర్వహించే ఈ క్రీడా సంబరంలో విజేతల కోసం ఏకంగా రూ. 45 లక్షల భారీ ప్రైజ్ మనీని నిర్వాహకులు కేటాయించారు.  ఈ మారథాన్ వేడుక రెండు రోజుల పాటు నగరంలో అట్టహాసంగా సాగనుంది. ఆగస్టు 29న ఉదయం 7:00 గంటలకు హైటెక్ సిటీ వద్ద 5 కిలోమీటర్ల సరదా రన్ ప్రారంభమవుతుంది. ఈ 5K రన్ మెటల్ చార్మినార్, నోవాటెల్ ఎంట్రన్స్ మీదుగా సాగి తిరిగి ప్రారంభ స్థానానికి చేరుకుంటుంది. అసలైన సవాలు ఆగస్టు 30న మొదలవుతుంది. ఆ రోజు ఉదయం 7:00 గంటలకు 10 కిలోమీటర్ల రన్ హైటెక్స్ నుంచి గచ్చిబౌలి స్టేడియం వరకు సాగుతుంది. 21.1 కిలోమీటర్ల హాఫ్ మారథాన్ తెల్లవారుజామున 5:30 గంటలకు పీపుల్స్ ప్లాజా నుంచి ప్రారంభమై రాజ్ భవన్ రోడ్, బంజారాహిల్స్, దుర్గం చెరువు కేబుల్ బ్రిడ్జ్ మరియు గచ్చిబౌలి ఐటీ కారిడార్ మీదుగా సాగి గచ్చిబౌలి స్టేడియం వద్ద ముగుస్తుంది.  ఇక ఈ ఉత్సవానికి ప్రధాన ఆకర్షణ అయిన 42.2 కిలోమీటర్ల పూర్తి మారథాన్ (Full Marathon) ఆగస్టు 30 తెల్లవారుజామున 4:30 గంటలకే నెక్లెస్ రోడ్‌లోని పీపుల్స్ ప్లాజా వద్ద అత్యంత ఉత్సాహంగా ప్రారంభమవుతుంది. రన్నర్లు హుస్సేన్ సాగర్ లేక్ చుట్టూ 9.5 కిలోమీటర్లు తిరిగిన తర్వాత రాజ్ భవన్ రోడ్, పంజాగుట్ట, కేబీఆర్ పార్క్, జూబ్లీహిల్స్ చెక్‌పోస్ట్, దుర్గం చెరువు కేబుల్ బ్రిడ్జి, మైండ్‌స్పేస్, బయోడైవర్సిటీ జంక్షన్, మరియు హైదరాబాద్ సెంట్రల్ యూనివర్సిటీ (HCU) క్యాంపస్ లోపలి ప్రశాంతమైన మార్గాల గుండా పరుగెడుతూ చివరకు గచ్చిబౌలి జీఎంసీ బాలయోగి స్టేడియం వద్ద తమ రేస్‌ను పూర్తి చేస్తారు.  

 

 

 

nmdc hyderabad marathon august 29 30,hyderabad marathon routes and timings.