TeluguOne Health
● # Tweets

Download the TeluguOne App

Choose your platform to continue

నిద్రవేళలు, అస్తవ్యస్తంగా ఉన్నాయా? మగవారి గుండె ఆరోగ్యంపై కీలక హెచ్చరిక

Published on: Fri Nov 20, 2026 8:22AM

40 ఏళ్లు దాటిన మగవారికి ఇది కచ్చితంగా తెలుసుకోవాల్సిన షాకింగ్ హెల్త్ అలర్ట్. అంతర్జాతీయ పురుషుల దినోత్సవం సందర్భంగా 'బీఎంసీ కార్డియోవాస్కులర్ డిజార్డర్స్' జర్నల్‌లో ప్రచురితమైన 10 ఏళ్ల సుదీర్ఘ అధ్యయనం నిద్రకూ, గుండె ఆరోగ్యానికీ మధ్య ఉన్న కీలక సంబంధాన్ని బయటపెట్టింది. ముఖ్యంగా 40 నుంచి 60 ఏళ్ల మధ్య వయసున్న పురుషులు రోజూ ఒకే సమయానికి కాకుండా వేర్వేరు సమయాల్లో నిద్రపోతుంటే, అది వారి గుండె ఆరోగ్యంపై తీవ్ర ప్రభావం చూపుతుందని తాజా పరిశోధన స్పష్టం చేస్తోంది.

సాధారణంగా మంచి నిద్ర అంటే రాత్రి కనీసం 8 గంటల పాటు ప్రశాంతంగా నిద్రపోవడం అనుకుంటాం. 40 ఏళ్లు దాటిన మగవారు ఆఫీసు ఒత్తిళ్లు, కుటుంబ బాధ్యతల మధ్య రాత్రిళ్లు ఆలస్యంగా పడుకున్నా, ఉదయం లేట్‌గా లేచి ఆ 8 గంటల లెక్కను పూర్తి చేస్తున్నామని భావిస్తారు. కానీ నిద్ర సమయం స్థిరంగా లేకపోవడం గుండెను నిశ్శబ్దంగా దెబ్బతీసే ప్రమాదకర అలవాటుగా మారుతోందని నిపుణులు హెచ్చరిస్తున్నారు.

ఈ 10 ఏళ్ల పరిశోధనలో శాస్త్రవేత్తలు 46 ఏళ్ల వయసున్న 3,231 మంది నిద్రవేళలను నిశితంగా పరిశీలించారు. వారి నిద్ర, మేల్కొనే సమయాలను నమోదు చేసి పదేళ్ల పాటు వైద్య రికార్డులను ట్రాక్ చేయగా, ఆ కాలంలో 128 మంది తీవ్రమైన గుండె సంబంధిత సమస్యల బారిన పడ్డారు. వీరిలో కొందరికి గుండెపోటు, స్ట్రోక్, హార్ట్ ఫెయిల్యూర్ రాగా, మరికొందరు గుండె సంబంధిత సమస్యలతో ప్రాణాలు కోల్పోయారు.

బాడీ మాస్ ఇండెక్స్ (BMI), కొలెస్ట్రాల్ వంటి ఇతర అంశాలను పక్కన పెట్టి చూసినా, గుండె సమస్యలు వచ్చిన వారందరిలో ఒకే సాధారణ అంశం కనిపించింది. వారంతా రోజూ ఒకే సమయానికి నిద్రపోయేవారు కాదు; ఒకరోజు రాత్రి 10 గంటలకు, మరోరోజు ఒంటిగంటకు, ఇంకోరోజు 11 గంటలకు అంటూ నిద్రవేళలు అస్తవ్యస్తంగా మారాయి. నిద్రవేళలు మారడంతో పాటు రోజుకు 8 గంటల కంటే తక్కువగా నిద్రపోయే పురుషుల్లో గుండె జబ్బుల ముప్పు రెట్టింపు అయినట్లు పరిశోధకులు గుర్తించారు. ఉదయం లేచే సమయం మారడం కంటే రాత్రి పడుకునే సమయం మారడమే అసలు సమస్య అని యూనివర్సిటీ ఆఫ్ ఔలు పరిశోధకురాలు, అధ్యయన ప్రధాన రచయిత డాక్టర్ లారా నౌహా తెలిపారు.

ఇది కూడా చదవండి:చలిలో, ప్రతి చిన్నదానికీ చిరాకా? మీ బాడీ క్లాక్ ఏం చెబుతోంది?

మన శరీరం 'సర్కాడియన్ రిథమ్' అనే 24 గంటల అంతర్గత జీవ గడియారం ఆధారంగా పనిచేస్తుంది. విశ్రాంతి, మేల్కొనే సమయాలు, హార్మోన్ల హెచ్చుతగ్గులు, గుండె లయ, రక్తపోటు (BP) వంటివన్నీ దీని అధీనంలోనే ఉంటాయని యూటీహెల్త్ హ్యూస్టన్ నిద్ర వైద్య నిపుణురాలు డాక్టర్ సుధ తల్లవజ్జుల వివరించారు. ఆఫీసు పనులు, మొబైల్ వాడకం వల్ల నిద్రవేళలు మారితే ఈ జీవ గడియారం గతి తప్పి, ఒత్తిడి హార్మోన్లు, అడ్రినలిన్ పెరిగి గుండె వేగం, బీపీపై ప్రభావం పడుతుందని కార్డియాలజిస్ట్ డాక్టర్ గ్రాంట్ బెయిలీ పేర్కొన్నారు.

నిద్రలో ఉన్నప్పుడే మన శరీరం అంతర్గత మరమ్మతులు చేసుకుంటూ హార్మోన్ల సమతుల్యతను కాపాడుతుంది. అందుకే 40 ఏళ్లు దాటిన పురుషులు కేవలం గంటల లెక్క కాకుండా, ప్రతిరోజూ ఒకే సమయానికి పడుకునే క్రమశిక్షణను అలవర్చుకోవాలి. చిన్నగా అనిపించే ఈ నిద్ర అలవాటును ఇప్పుడే సరిదిద్దుకుంటే, భవిష్యత్తులో గుండె జబ్బుల ముప్పు నుంచి మీ గుండెను సురక్షితంగా కాపాడుకోవచ్చు.

మీకు నచ్చవచ్చు:స్నానం చేసిన వెంటనే, చర్మం లాగుతున్నట్టా? కారణం ఇదే!

                               జన్యు, నిర్ధారణ నుంచి చికిత్స దాకా: అరుదైన వ్యాధుల పిల్లలకు కొత్త మార్గం

 

 

 

Men Over 40 Health, Sleep Habit Heart Risk, Cardiovascular Health Tips, Heart Attack Prevention, Sleep And Heart Disease, Doctor Health Advice, Health Tips In Telugu.