దేశ యువత భవిష్యత్తును కాపాడేందుకు కేంద్ర ప్రభుత్వం అత్యంత కఠినమైన నిర్ణయాలు తీసుకుంటోందని, ఇందులో భాగంగా గుజరాత్ రాష్ట్రంలో మాదకద్రవ్యాల బెడదను పూర్తిగా రూపుమాపేందుకు డిసెంబర్ 31, 2028 నాటికి స్పష్టమైన గడువు విధించినట్లు కేంద్ర హోం  సహకార మంత్రి అమిత్ షా స్పష్టం చేశారు. 

అహ్మదాబాద్‌లో జరిగిన ఓ ప్రత్యేక కార్యక్రమంలో పాల్గొన్న ఆయన, దేశాన్ని తీవ్రంగా కలవరపెడుతున్న డ్రగ్స్ ముప్పుపై ఉక్కుపాదం మోపేందుకు 'జీరో టాలరెన్స్' (Zero Tolerance) విధానాన్ని అనుసరిస్తున్నామని తేల్చిచెప్పారు. దేశవ్యాప్తంగా నిర్దేశించుకున్న 2029 జాతీయ లక్ష్యానికి ముందే, సరిగ్గా ఒక సంవత్సరం ముందుగానే అంటే డిసెంబర్ 2028 నాటికి గుజరాత్‌ను సంపూర్ణ డ్రగ్స్ రహిత రాష్ట్రంగా తీర్చిదిద్దాలని ఆయన పిలుపునిచ్చారు. 

నక్సలిజం రహిత భారత్‌ను ఆవిష్కరించిన విధంగానే, పౌరుల సమష్టి కృషితో డ్రగ్స్ రహిత దేశాన్ని సాధించడం మన తదుపరి ప్రధాన బాధ్యత అని ఆయన ఉద్ఘాటించారు. ఈ మహమ్మారి యువత మెదళ్లను, శారీరక సామర్థ్యాలను దెబ్బతీస్తూ దేశ భవిష్యత్తును గుల్ల చేస్తోందని ఆయన ఆందోళన వ్యక్తం చేశారు.

ఈ పోరులో కేవలం ప్రభుత్వాలు మాత్రమే కాకుండా తల్లిదండ్రులు, ఉపాధ్యాయులు మరియు ప్రతి సాధారణ పౌరుడు భాగస్వాములు కావాలని అమిత్ షా కోరారు. డ్రగ్స్ విక్రయాలు ఎక్కడైనా జరిగితే వాటిని నిర్భయంగా సమాచారం అందించేందుకు వీలుగా డిసెంబర్ 1 నుండి ప్రత్యేకంగా '1033' టోల్-ఫ్రీ హెల్ప్‌లైన్ కంట్రోల్ రూమ్ సేవలను అందుబాటులోకి తీసుకురానున్నట్లు ఆయన ప్రకటించారు. 

ఈ నంబరుకు ఫోన్ చేసి సమాచారం అందించే ప్రతి ఒక్కరి వివరాలు అత్యంత గోప్యంగా ఉంచబడతాయని, నిఘా వర్గాలు తక్షణమే రంగంలోకి దిగి సమాచారం అందిన కొద్ది గంటల్లోనే కఠిన చర్యలు తీసుకుంటాయని భూపేంద్ర పటేల్ ప్రభుత్వం తరఫున ఆయన హామీ ఇచ్చారు. పిల్లలలో ప్రవర్తనాపరమైన మార్పులు, అలసట లేదా ఇతర ప్రమాదకర లక్షణాలు కనిపిస్తే ఉపాధ్యాయులు వెంటనే తల్లిదండ్రులను అప్రమత్తం చేయాలని సూచించారు.

సామాజిక భయాలు లేదా పరువు ప్రతిష్టల పేరుతో పిల్లలలోని వ్యసన సమస్యలను ఎవరూ కప్పిపుచ్చుకోవద్దని అమిత్ షా తీవ్రంగా హితవు పలికారు. మలేరియా లేదా క్షయ (TB) వంటి ప్రాణాంతక వ్యాధులు వస్తే ఎలాంటి సంకోచం లేకుండా ఆసుపత్రికి వెళ్తామని, మరి డ్రగ్స్ వ్యసన చికిత్స విషయంలో ఎందుకు మొహమాటం పడాలని ఆయన ప్రశ్నించారు. 

ఒకవేళ ఇవాళ మనం సిగ్గుపడి దాస్తే, రేపు మన పిల్లల జీవితాలను కోల్పోవాల్సి వస్తుందని ఆయన హెచ్చరించారు. డ్రగ్స్ రవాణా చేసే సిండికేట్లపై నిరంతరం నిఘా ఉంచుతూ, యువతను ఈ రొంపి నుంచి బయటపడేయడానికి ప్రభుత్వం అన్ని చర్యలు తీసుకుంటోందని, పౌరులందరూ సమైక్యంగా ముందుకు వచ్చి గుజరాత్‌ను 2028 నాటికి పూర్తిగా డ్రగ్స్ రహిత రాష్ట్రంగా మార్చడంలో ప్రభుత్వంతో కలిసి రావాలని ఆయన పిలుపునిచ్చారు.

ఇది కూడా చదవండి: రూ.500 అప్పు చెల్లించలేదని కిరాతకం.. వ్యక్తిపై మరిగే నూనెతో దాడి.!

 

[ Gujarat drug free target 2028 Amit Shah, 1033 helpline number, zero tolerance against drugs, India drug free campaign, drug menace eradication, Telugu One, Telugu News ]