టెక్నాలజీ ప్రపంచంలో సరికొత్త విప్లవానికి గూగుల్ శ్రీకారం చుట్టింది. ప్రీమియం స్మార్ట్‌ఫోన్ విపణిలో తన మార్కును మరింత బలంగా వేస్తూ, అత్యంత ప్రామాణికమైన ఫ్లాగ్‌షిప్ మోడల్‌గా 'గూగుల్ పిక్సెల్ 11' ను గ్లోబల్ మార్కెట్లోకి తీసుకొచ్చింది. గతేడాది మోడల్ కంటే £80 పెరిగి, ప్రపంచవ్యాప్తంగా £879 ($899 / €999 / A$1,499) ప్రారంభ ధరతో మార్కెట్లోకి వచ్చిన ఈ ఫోన్, తన ఆకట్టుకునే ఫీచర్లతో సామ్‌సంగ్ గెలాక్సీ S26 మరియు ఐఫోన్ 17 లకు గట్టి పోటీనిస్తోంది. ఈ ధర వద్ద ఏకంగా 256GB బేస్ స్టోరేజ్‌ను అందించడం దీని ప్రధాన ఆకర్షణగా నిలుస్తోంది. డిజైన్ పరంగా గత తరం పిక్సెల్ పోలికలను కొనసాగించినప్పటికీ, కెమెరా బార్ మందాన్ని ఏకంగా 40 శాతానికి తగ్గించి అత్యంత స్లిమ్ మరియు ప్రీమియం లుక్‌ను సొంతం చేసుకుంది. 6.3 అంగుళాల 120Hz FHD+ OLED డిస్‌ప్లేతో, 422ppi పిక్సెల్ డెన్సిటీతో వచ్చే ఈ స్క్రీన్ అత్యంత ప్రకాశవంతంగా, స్మూత్ స్క్రోలింగ్ అనుభూతిని ఇస్తుంది. సెక్యూరిటీ విషయంలో ఇన్‌స్క్రీన్ ఫింగర్‌ప్రింట్ స్కానర్‌తో పాటు బ్యాంకింగ్ యాప్‌లకు సపోర్ట్ చేసే వేగవంతమైన ఫేస్ అన్‌లాక్ వ్యవస్థను ఇందులో పొందుపరిచారు.ఈ స్మార్ట్‌ఫోన్ గుండెకాయ వంటి గూగుల్ సొంత టెన్సర్ G6 ప్రాసెసర్, పరీక్షల్లో గత తరం కంటే 20 శాతం వేగవంతమైన పనితీరును కనబరిచింది. దీనికి 12GB RAM జతకావడంతో రోజువారీ పనులు, మల్టీటాస్కింగ్ మరియు మిడ్-లెవెల్ గేమింగ్ చాలా సునాయాసంగా సాగిపోతాయి. బ్యాటరీ విభాగంలో గూగుల్ అతిపెద్ద పురోగతి సాధించింది. సాధారణ వాడకంలో 54 గంటల సుదీర్ఘ బ్యాటరీ లైఫ్‌ను ఇది అందిస్తుంది. ఇందులో ఏకంగా 7 గంటల కంటే ఎక్కువ స్క్రీన్-ఆన్ టైమ్ లభిస్తుండటం విశేషం. 30W లేదా అంతకంటే ఎక్కువ పవర్ అడాప్టర్‌తో కేవలం 30 నిమిషాల్లోనే 53 శాతం చార్జ్ అయ్యే ఈ ఫోన్, పూర్తి చార్జింగ్‌కు 90 నిమిషాల కన్నా తక్కువ సమయాన్నే తీసుకుంటుంది. అంతేకాకుండా, 25W Qi2.2 వైర్‌లెస్ ఛార్జింగ్ మరియు మ్యాగ్నెటిక్ యాక్సెసరీలకు ఇది అద్భుతంగా సపోర్ట్ చేస్తుంది. నిరంతర చార్జింగ్ సైకిల్స్‌లో కూడా బ్యాటరీ మన్నిక తగ్గకుండా, 1,000 పూర్తి ఛార్జ్ సైకిల్స్ తర్వాత కూడా 80 శాతం కెపాసిటీని నిలబెట్టుకునేలా దీనిని రూపొందించారు.ఆండ్రాయిడ్ 17 ఆపరేటింగ్ సిస్టమ్‌తో పనిచేసే ఈ పిక్సెల్ 11 స్మార్ట్‌ఫోన్‌కు గూగుల్ ఏకంగా ఆరు సంవత్సరాల పాటు, అంటే ఆగస్టు 2033 వరకు సుదీర్ఘ ఓఎస్ మరియు సెక్యూరిటీ అప్‌డేట్లను ప్రకటికంచడం వినియోగదారులకు లభించే అతిపెద్ద భరోసా. ఇందులో పొందుపరిచిన ప్రోయాక్టివ్ ఆర్టిఫిషియల్ ఇంటెలిజెన్స్ ఫీచర్లు రోజువారీ జీవితాన్ని మరింత సులభతరం చేస్తాయి. మెసేజింగ్ యాప్‌లలో ఉండే 'మ్యాజిక్ క్యూ' లేదా 'జెమిని ప్రోయాక్టివ్ అసిస్టెన్స్' మన షెడ్యూల్స్, ఫ్లైట్ వివరాలు, రెస్టారెంట్ సజెషన్లను దానంతట అదే చాట్‌లో చూపిస్తుంది. ఓపెన్‌టేబుల్ ద్వారా టేబుల్ బుకింగ్స్ చేయడం లాంటి కృత్రిమ మేధ సామర్థ్యాలు కూడా ఇందులో ఉన్నాయి. కీబోర్డులోని 'రాంబ్లర్' వాయిస్ టైపింగ్ ఫీచర్ మనం మాట్లాడేటప్పుడు వచ్చే ఆటంకాలను, సుదీర్ఘ ఉచ్చారణలను ఆటోమేటిక్‌గా తొలగించి, స్పష్టమైన మరియు సంపూర్ణమైన వాక్యాలుగా మార్చి టైప్ చేస్తుంది.

 

 

 

pixel 11 specs camera battery features,google pixel 11 price and specifications.