ఇంటికి అనూహ్యంగా అతిథులు వచ్చినప్పుడు లేదా పండుగ సమయాల్లో హడావుడిగా రుచికరమైన స్వీట్ తయారు చేయాలంటే చాలా మందికి టెన్షన్ పడుతుంటారు. సాధారణంగా గోధుమ రవ్వ ఉడకడానికి కాస్త ఎక్కువ సమయం తీసుకుంటుంది కాబట్టి, దీన్ని వండటం కష్టమనే భావన చాలామందిలో ఉంటుంది. అయితే ప్రెజర్ కుక్కర్‌ను ఉపయోగించడం ద్వారా కేవలం 10 నుండి 15 నిమిషాల్లోనే వెన్నలా కరిగిపోయే మెత్తటి గోధుమ రవ్వ హల్హాను ఎంతో సులభంగా సిద్ధం చేసుకోవచ్చు. మైదా, పంచదార జోలికి వెళ్లకుండా కేవలం స్వచ్ఛమైన బెల్లం, కమ్మటి నేతితో చేసే ఈ వంటకం రుచితో పాటు ఆరోగ్యానికి కూడా ఎంతో మేలు చేస్తుందని ఆరోగ్య నిపుణులు సూచిస్తున్నారు.

ఈ అద్భుతమైన స్వీట్ తయారీ కోసం ముందుగా 1 కప్పు లావు గోధుమ రవ్వ, 1 కప్పు తురిమిన బెల్లం, ఉడికించడానికి 3 కప్పులు మరియు బెల్లం కరిగించడానికి 1 కప్పు చొప్పున మొత్తం 4 కప్పుల నీటిని సిద్ధం చేసుకోవాలి. అలాగే దీనికి సరిపడా 4 నుండి 5 టేబుల్ స్పూన్ల స్వచ్ఛమైన నెయ్యి, 2 టేబుల్ స్పూన్ల జీడిపప్పు, బాదం పలుకులు, గుప్పెడు సన్నగా తరిగిన ఎండు కొబ్బరి ముక్కలు, ఫూల్ మఖానా మరియు అర టీస్పూన్ యాలకుల పొడిని ముందుగానే పక్కన పెట్టుకోవాలి. ఈ కొలతలు పక్కాగా పాటిస్తే హల్వా గుడిలో ప్రసాదంలా అత్యంత రుచికరంగా వస్తుంది.

తయారీ ప్రక్రియలో భాగంగా ముందుగా స్టవ్‌పై కుక్కర్ పెట్టి 1 టేబుల్ స్పూన్ నెయ్యి వేసి వేడెక్కనివ్వాలి. అందులో జీడిపప్పు, బాదం, ఎండు కొబ్బరి ముక్కలు, ఫూల్ మఖానా వేసి దోరగా వేయించి ఒక గిన్నెలోకి తీసుకుని పక్కన పెట్టుకోవాలి. అదే కుక్కర్‌లో మరో 2 టేబుల్ స్పూన్ల నెయ్యి వేసి 1 కప్పు గోధుమ రవ్వను చేర్చాలి. మంటను సన్నగా లేదా మీడియం ఫ్లేమ్‌లో ఉంచి, రవ్వ మంచి గోల్డెన్ బ్రౌన్ కలర్‌లోకి మారి కమ్మటి సువాసన వెలువడే వరకు సుమారు 10 నిమిషాల పాటు బాగా వేయించాలి.

రవ్వ చక్కగా వేగిన తర్వాత 3 కప్పుల నీళ్లు పోసి గరిటెతో బాగా కలపాలి. ఆ తర్వాత కుక్కర్ మూత పెట్టి మీడియం ఫ్లేమ్‌పై సరిగ్గా 3 విజిల్స్ రానిచ్చి స్టవ్ ఆఫ్ చేయాలి. రవ్వ ఉడికేలోపు పక్క స్టవ్‌పై మరో పాత్రలో 1 కప్పు తురిమిన బెల్లం, 1 కప్పు నీళ్లు వేసి బెల్లం పూర్తిగా కరిగే వరకు మరిగించాలి. దీనికి ఎలాంటి తీగ పాకం అవసరం లేదు, బెల్లం కరిగితే సరిపోతుంది.

ఇది కూడా చదవండి:మిల్లెట్ ఇడ్లీలు, గట్టిగా మారుతున్నాయా? ఈ సీక్రెట్ టిప్స్ పాటించండి!

కుక్కర్‌లోని ఆవిరి పూర్తిగా పోయాక మూత తీసి చూస్తే రవ్వ మెత్తగా ఉడికి ఉంటుంది. ఇప్పుడు కరిగించిన బెల్లం నీటిని టీ జల్లెడ ద్వారా వడకడుతూ ఉడికిన రవ్వలో పోయాలి. స్టవ్ ఆన్ చేసి మీడియం మంటపై రవ్వ బెల్లం పాకాన్ని పూర్తిగా పీల్చుకునేలా కలుపుతూ ఉడికించాలి. ఈ సమయంలో మధ్యమధ్యలో ఒక్కో టేబుల్ స్పూన్ చొప్పున నెయ్యి వేస్తూ కలపడం వల్ల హల్వా అంచుల నుండి నెయ్యి వదులుతూ ముద్దలా దగ్గరపడుతుంది.

చివరగా హల్వా చక్కగా దగ్గరపడ్డాక ముందుగా వేయించి పెట్టుకున్న జీడిపప్పు, బాదం, కొబ్బరి, ఫూల్ మఖానా పలుకులను మరియు అర టీస్పూన్ యాలకుల పొడిని వేసి బాగా కలపాలి. అంతే, నోట్లో వేస్తే నేతి పరిమళం, బెల్లం కమ్మదనంతో వెన్నలా కరిగిపోయే కమ్మటి గోధుమ రవ్వ హల్వా క్షణాల్లో సిద్ధమవుతుంది. పక్షులు, ప్రత్యేక వేడుకల్లో లేదా అతిథులు వచ్చినప్పుడు ఈ సింపుల్ రెసిపీతో అందరి ప్రశంసలు అందుకోవడం ఖాయం.

మీకు నచ్చవచ్చు:జిమ్‌కు వెళ్లేపని లేకుండా, ఇంట్లోనే ఫిట్‌గా ఉండే సరికొత్త ట్రెండ్.. కోజీ కార్డియో!

                               భారతదేశానికి ,జంబుద్వీపం అనే పేరు ఎలా వచ్చింది? ఆసక్తికరమైన చరిత్ర!

 

 

Broken Wheat Halwa, Godhuma Ravva Halwa, Dalia Halwa Recipe, Quick Pressure Cooker Sweets, Indian Dessert Recipes, Easy Festival Sweets, Food Articles In Telugu.