వినాయక నిమజ్జనాల నేపథ్యంలో సీఎం రేవంత్ రెడ్డి, హీరో నాని, దర్శకుడు ఓదెల శ్రీకాంత్ చేసిన విజ్ఞప్తులపై తెలంగాణ డీజీపీ సీవీ ఆనంద్ స్పందించారు. వారి ట్వీట్లను గమనించినట్లు పేర్కొంటూ స్పందించారు. “గమనించాను సర్” అంటూ సీఎం రేవంత్ రెడ్డి, నాని, ఓదెల శ్రీకాంత్‌లను ట్యాగ్ చేసిన డీజీపీ.. ప్రస్తుతం రాష్ట్రవ్యాప్తంగా వినాయక నిమజ్జనాలు ముమ్మరంగా కొనసాగుతున్నాయని తెలిపారు. వినాయక చవితి నిమజ్జనాల్లో భాగంగా పదో రోజు కావడంతో హైదరాబాద్‌తో పాటు రాష్ట్రంలోని పలు ప్రాంతాల్లో భారీ సంఖ్యలో విగ్రహాల నిమజ్జనం జరగనుందని సీవీ ఆనంద్ పేర్కొన్నారు. ముఖ్యంగా హుస్సేన్ సాగర్‌లో వేలాది విగ్రహాల నిమజ్జనం నేపథ్యంలో నగరంలో భారీగా జనసందోహం ఏర్పడే అవకాశం ఉందన్నారు.

హుస్సేన్ సాగర్‌కు సమీపంలోనే ఆర్టీసీ క్రాస్‌రోడ్స్ ప్రాంతం ఉండటంతో.. నిమజ్జనాల సమయంలో అక్కడ వాహనాల రాకపోకలు, ప్రజల రద్దీ మరింత పెరిగే అవకాశం ఉందని డీజీపీ వివరించారు. సీఎం రేవంత్ రెడ్డి, నాని, ఓదెల శ్రీకాంత్ చేసిన విజ్ఞప్తిని అర్థం చేసుకుంటున్నామని సీవీ ఆనంద్ తెలిపారు. అయితే, కార్యక్రమాన్ని హైదరాబాద్ నగర పోలీసులు సమర్థంగా నిర్వహించగలరా? అవసరమైన భద్రతా ఏర్పాట్లు, అదనపు బలగాలను మోహరించగలరా? అనే అంశాలపై నగర పోలీసు అధికారులతో చర్చించాల్సి ఉంటుందని చెప్పారు.

అదే సమయంలో గతంలో చోటుచేసుకున్న తొక్కిసలాట ఘటనను కూడా పరిగణనలోకి తీసుకోవాల్సి ఉంటుందని డీజీపీ గుర్తుచేశారు. దాదాపు రెండేళ్ల క్రితం జరిగిన ఆ ఘటనలో ఓ మహిళ మృతి చెందగా.. ఓ చిన్నారి శాశ్వత వైకల్యానికి గురైన విషయాన్ని దృష్టిలో ఉంచుకుని భద్రతాపరమైన నిర్ణయాలు తీసుకోవాల్సి ఉంటుందని స్పష్టం చేశారు. భారీ సంఖ్యలో భక్తులు తరలివచ్చే అవకాశం ఉన్న నేపథ్యంలో ప్రజల భద్రతకు అత్యంత ప్రాధాన్యం ఇవ్వాల్సి ఉంటుందని డీజీపీ తెలిపారు. అందుబాటులో ఉన్న పోలీసు బలగాలు, ట్రాఫిక్ పరిస్థితులు, ఇతర భద్రతా అంశాలను సమీక్షించిన అనంతరం తుది నిర్ణయం తీసుకునే అవకాశం ఉందని ఆయన స్పందన ద్వారా స్పష్టమవుతోంది.

 

 

 

[ Ganesh Immersion, Hyderabad Ganesh Visarjan, DGP CV Anand, CM Revanth Reddy, Hero Nani, Odela Sreekanth, Hussain Sagar, Hyderabad Police, Ganesh Nimajjanam, Hyderabad Traffic, CP Sajjanar, Telugu One, Telugu News ]