విమాన ప్రయాణం రద్దయినప్పుడు టికెట్ ధరతో పాటు దానిపై వసూలు చేసిన జీఎస్‌టీ (GST) డబ్బులు తిరిగి వస్తాయా లేదా అనే అంశంపై గూడ్స్ అండ్ సర్వీసెస్ ట్యాక్స్ అప్పిలేట్ ట్రిబ్యునల్ (GSTAT) ఎర్నాకులం బెంచ్ ఇచ్చిన చారిత్రాత్మక తీర్పు ప్రయాణికులకు మరియు విమానయాన సంస్థలకు ఎంతో ఊరటనిచ్చింది. సాధారణంగా విమానాలు రద్దయినప్పుడు ఎయిర్‌లైన్స్ సంస్థలు టికెట్ డబ్బులు వెనక్కి ఇస్తుంటాయి, కానీ పన్ను రూపంలో కట్టిన జీఎస్‌టీ నిబంధనల పేరుతో ఉంచుకోవచ్చా అనే సందేహాలకు ఈ తీర్పు ద్వారా స్పష్టత వచ్చింది. ప్రయాణికులకు పూర్తి ఛార్జీలతో పాటు పన్ను మొత్తాన్ని కూడా రీఫండ్ చేసినట్లయితే, ఎయిర్‌లైన్స్ సంస్థలు ప్రభుత్వానికి చెల్లించిన ఆ జీఎస్‌టీని తిరిగి క్లెయిమ్ చేసుకోవడానికి అర్హత కలిగి ఉంటాయని ట్రిబ్యునల్ స్పష్టం చేసింది.

కోవిడ్-19 మహమ్మారి సమయంలో విమానాలు పెద్ద ఎత్తున రద్దు కావడంతో సింగపూర్ ఎయిర్‌లైన్స్ ఎదుర్కొన్న సమస్యకు సంబంధించి ఈ తీర్పు వెలువడింది. అక్టోబర్ 2019 నుండి మార్చి 2021 మధ్యకాలంలో రద్దు చేయబడిన విమానాలకు సంబంధించి మొత్తం రూ. 45.92 లక్షల జీఎస్‌టీ రీఫండ్ క్లెయిమ్‌లను ఎర్నాకులం ట్రిబ్యునల్ పరిశీలించింది. కొవిడ్ కాలంలో ప్రయాణికులకు టికెట్ ధరలతో పాటు జీఎస్‌టీని కూడా పూర్తిగా వాపసు చేసినప్పటికీ, సంబంధిత క్రెడిట్ నోట్లను తమ అవుట్‌పుట్ ట్యాక్స్ బాధ్యతతో సర్దుబాటు చేసుకోలేకపోయినందున ఎయిర్‌లైన్స్ సంస్థ రీఫండ్ దరఖాస్తును జీఎస్‌టీ జాయింట్ కమిషనర్ అంతకుముందు తిరస్కరించారు. దీనిని సవాలు చేస్తూ సింగపూర్ ఎయిర్‌లైన్స్ ట్రిబ్యునల్‌ను ఆశ్రయించగా, అక్టోబర్ 16న వెలువడిన విచారణలో GSTAT మునుపటి ఉత్తర్వులను కొట్టేసింది.

ఈ కేసుకు సంబంధించి ట్రిబ్యునల్ ప్రధానంగా 'అన్యాయమైన సంపదన' (unjust enrichment) సూత్రంపై దృష్టి సారించింది. పన్ను భారాన్ని కస్టమర్‌పై మోపి, కంపెనీ ఆ ట్యాబ్ సొమ్మును తన వద్దే ఉంచుకుంటే దాన్ని రిఫండ్ ఇవ్వడానికి నిబంధనలు ఒప్పుకోవు. అయితే ఈ కేసుకు సంబంధించి ఎయిర్‌లైన్స్ సంస్థ సమర్పించిన ప్యాసింజర్-స్థాయి రికార్డులు, పన్ను ఇన్‌వాయిస్‌లు, క్రెడిట్ నోట్లు, రీఫండ్ వోచర్లు మరియు సెటిల్మెంట్ డేటాను పరిశీలించిన ట్రిబ్యునల్ కీలక విషయాన్ని గుర్తించింది. ఎయిర్‌లైన్స్ ఎలాంటి ట్యాక్స్ మొత్తాన్ని తన వద్ద ఉంచుకోకుండా, ప్రయాణికులకు నేరుగా రీఫండ్ అందజేసినట్లు స్పష్టమైన ఆధారాలు లభించాయని ట్రిబ్యునల్ పేర్కొంది.

సెంట్రల్ బోర్డ్ ఆఫ్ ఇన్‌డైరెక్ట్ టాక్సెస్ అండ్ కస్టమ్స్ (CBIC) 2020 ఏప్రిల్‌లో జారీ చేసిన మార్గదర్శకాల ప్రకారం, క్రెడిట్ నోట్లను అడ్జస్ట్ చేయలేనప్పుడు ఎక్సెస్ ట్యాక్స్ పేమెంట్ కింద రీఫండ్ పొందడానికి అవకాశం ఉంది. ఈ నేపథ్యంలో టెక్నికల్ కారణాలరీత్యా రిఫండ్లను నిరాకరించకుండా, పత్రాలను సమగ్రంగా పరిశీలించాలని ట్రిబ్యునల్ తేల్చిచెప్పింది. అంతేకాకుండా, సంబంధిత రెవెన్యూ శాఖ అధికారులు ఈ రీఫండ్ క్లెయిమ్‌ను కేవలం రెండు వారాల వ్యవధిలోగా వర్తించే వడ్డీతో సహా ప్రాసెస్ చేయాలని ఆదేశాలు జారీ చేశారు. రద్దయిన టికెట్లపై ప్రయాణికులకు పూర్తి మొత్తాన్ని రిఫండ్ చేసిన సంస్థలకు ఈ తీర్పు పెద్ద ఊరటగా నిలిచింది.

 

 

 

[Flight Ticket GST Refund, GSTAT Ernakulam Bench, Singapore Airlines, Cancelled Flight Refund, GST Refund Rules India, Goods and Services Tax Appellate Tribunal, CBIC GST Guidelines, Unjust Enrichment Principle, COVID-19 Flight Cancellations, Airline Tax Refund India]