ప్రపంచ కుబేరుడు, టెస్లా అధినేత ఎలాన్ మస్క్‌పై మధ్యప్రదేశ్‌లోని రీవా లోక్‌సభ స్థానం నుంచి ప్రాతినిధ్యం వహిస్తున్న బీజేపీ ఎంపీ జనార్థన్ మిశ్రా చేసిన వ్యాఖ్యలు ప్రస్తుతం రాజకీయ వర్గాల్లో తీవ్ర చర్చనీయాంశంగా మారాయి. రీవాలో సంస్కృత విశ్వవిద్యాలయ ఏర్పాటు కోసం నిర్వహించిన ఒక ప్రత్యేక సభలో ఆయన మాట్లాడుతూ.. భారతదేశ సార్వభౌమత్వాన్ని, దేశ ప్రధాని నరేంద్ర మోడీ నాయకత్వాన్ని గట్టిగా సమర్థిస్తూ ఎలాన్ మస్క్‌పై తీవ్ర స్థాయిలో విమర్శలు గుప్పించారు.

 ఎలాన్ మస్క్ ఎంత గొప్ప వ్యాపారవేత్త అయినా సరే, భారత్‌లో వ్యాపారం చేయాలంటే ఇక్కడి నిబంధనలకు కచ్చితంగా తలవంచాల్సిందేనని ఆయన తేల్చిచెప్పారు. ముఖ్యంగా ఎలాన్ మస్క్‌ని ఉద్దేశించి "రెండు గుద్దులు గుద్దుతా.. దెబ్బకి పారిపోతాడు" అంటూ ఎంపీ చేసిన ఘాటైన కామెంట్స్ సోషల్ మీడియాలో తెగ వైరల్ అవుతున్నాయి. అమెరికా అధ్యక్ష ఎన్నికల సమయంలో డొనాల్డ్ ట్రంప్‌ను మస్క్ కొనుగోలు చేశారేమోనని, కానీ భారత్‌ను మాత్రం ఎవరూ కొనుగోలు చేయలేరని ఆయన స్పష్టం చేశారు. దేశ ప్రధాని మోడీ 56 అంగుళాల ఛాతీ కలిగిన బలమైన నేత అని, ఆయనను గానీ, మన దేశాన్ని గానీ ఎవరూ బెదిరించలేరని, ఎవరి గుసగుసలకూ లొంగే ప్రసక్తే లేదని ఆయన గట్టిగా చెప్పారు. 

భారత్‌లోని రూల్స్ నచ్చి బిజినెస్ చేసుకుంటామంటే మనస్ఫూర్తిగా ఆహ్వానం పలుకుతామని, లేదంటే ఎవరి దారిన వారు తిరిగి వెళ్లిపోవచ్చని మిశ్రా కుండబద్దలు కొట్టారు. భారత్‌లో శాంతి స్థాపన, దేశాభివృద్ధే ప్రధాన ధ్యేయంగా కేంద్ర ప్రభుత్వం ముందుకు సాగుతోందని ఆయన పునరుద్ఘాటించారు. ఎలాన్ మస్క్ తన స్పేస్‌ఎక్స్ సంస్థకు చెందిన 'స్టార్‌లింక్' శాటిలైట్ ఇంటర్నెట్ సేవలను భారత్‌లో ప్రవేశపెట్టేందుకు తీవ్రంగా ప్రయత్నిస్తున్న తరుణంలో ఈ పరిణామాలు ప్రాధాన్యత సంతరించుకున్నాయి. భారత్‌లో స్టార్‌లింక్ అనుమతుల విషయంలో నెలకొన్న జాప్యంపై గతంలో ఎలాన్ మస్క్ సోషల్ మీడియా వేదికగా వ్యంగ్యాస్త్రాలు విసురుతూ, రిలయన్స్ అధినేత ముకేష్ అంబానీని ఉద్దేశించి చేసిన కామెంట్స్‌కు ఎంపీ జనార్థన్ మిశ్రా తనదైన శైలిలో ఈ విధంగా ధీటుగా బదులిచ్చారు.

 జనార్థన్ మిశ్రా తన విభిన్నమైన, సూటిగా ఉండే ప్రసంగాలతో ఎప్పుడూ పాపులర్‌గా ఉంటారు. రీవా నియోజకవర్గం నుంచి ఆయన వరుసగా మూడోసారి ఎంపీగా ఘన విజయం సాధించారు. 2014, 2019 ఎన్నికలతో పాటు 2024 సార్వత్రిక ఎన్నికల్లోనూ కాంగ్రెస్ అభ్యర్థిపై లక్షకు పైగా ఓట్ల భారీ మెజారిటీతో విజయం సాధించి తన సత్తా చాటుకున్నారు. ప్రజలతో నేరుగా మమేకమయ్యే తత్త్వం, వివాదాస్పదమైనా నిష్కర్షగా ఉండే మాట తీరు తరచూ నేషనల్ మీడియా దృష్టిని ఆకర్షిస్తుంటాయి. ఈ క్రమంలోనే తాజాగా కాంట్రవర్సీ అవుతున్న స్టార్‌లింక్ విషయంలో ఎలాన్ మస్క్ పై ఎంపీ చేసిన వ్యాఖ్యలు దేశవ్యాప్తంగా రాజకీయ సంచలనం సృష్టిస్తున్నాయి.

 

 

 

[ Elon Musk, Janardan Mishra, BJP MP, Starlink India, Mukesh Ambani, PM Narendra Modi, Rahul gandhi, Telugu One News, Telug News ]