వైసీపీ విషప్రచారంపై టీచర్ల నిరసన మార్చ్..!

ఏపీ మెగా DSC-2025 ఉపాధ్యాయ నియామకాలపై ప్రతిపక్ష వైసీపీ చేస్తున్న వ్యాఖ్యలు, ఆరోపణలపై కొత్తగా ఎంపికైన ఉపాధ్యాయులు తీవ్ర ఆగ్రహం వ్యక్తం చేశారు. తమ కష్టార్జితాన్ని, ప్రతిభను తక్కువ చేసి చూపిస్తూ రాజకీయ ప్రయోజనాల కోసం నిందలు వేస్తున్నారని మండిపడుతూ విశాఖపట్నంలో భారీ ఆత్మగౌరవ ర్యాలీ నిర్వహించారు.

ఉమ్మడి విశాఖ, విజయనగరం, శ్రీకాకుళం  తూర్పుగోదావరి జిల్లాల నుండి వేలాది మంది ఉపాధ్యాయులు ఈ నిరసన కార్యక్రమంలో పాల్గొన్నారు. విశాఖపట్నం సముద్ర తీరప్రాంతమైన విక్టరీ ఎట్ సీ స్మారకం నుంచి ప్రముఖ ఆర్కే బీచ్ వరకు ఈ ఆత్మగౌరవ ప్రదర్శన అత్యంత కోలాహలంగా సాగింది.

చేతుల్లో నిరసన ప్లకార్డులు పట్టుకున్న అభ్యర్థులు నినాదాలతో విశాఖ తీరాన్ని హోరెత్తించారు. రాత్రింబవళ్లు కష్టపడి, మెరిట్ ఆధారంగానే తాము పారదర్శకంగా ఉద్యోగాలు సాధించామని ఉపాధ్యాయులు స్పష్టం చేశారు. తమ కష్టాన్ని రాజకీయ రంగు పూసి అవమానించే యత్నాలను ఉపేక్షించేది లేదని తేల్చిచెప్పారు.

ర్యాలీలో పాల్గొన్న ప్రతినిధులు మాట్లాడుతూ.. ప్రతిపక్ష నేతలు తమ వ్యక్తిగత రాజకీయ స్వార్థం కోసం వేలాది మంది కొత్త ఉపాధ్యాయుల భవిష్యత్తును, ఆత్మగౌరవాన్ని దెబ్బతీసేలా అసత్య ప్రచారం చేస్తున్నారని ఆవేదన వ్యక్తం చేశారు. ప్రభుత్వ పారదర్శక నియామక ప్రక్రియను కించపరచడం సముచితం కాదని హితవు పలికారు.

మెగా DSC పై ఇప్పటికైనా అనవసరపు వివాదాలు, తప్పుడు వ్యాఖ్యలు చేయడం మానకపోతే రాబోయే స్థానిక సంస్థల ఎన్నికల్లో తగిన సమాధానం చెబుతామని నిరసనకారులు తీవ్ర హెచ్చరికలు జారీ చేశారు. ప్రజాక్షేత్రంలో ఉపాధ్యాయ లోకం శక్తి ఏమిటో చూపిస్తామని స్పష్టం చేశారు.

ఉపాధ్యాయుల ఆందోళనపై రాష్ట్రవ్యాప్తంగా వివిధ విద్యావంతుల వర్గాల నుంచి, విద్యా సంఘాల నుంచి కూడా మద్దతు వ్యక్తమవుతోంది. ఎంతో కాలంగా ఎదురుచూసి ఉద్యోగాలు సాధించిన యువత మనోధైర్యాన్ని దెబ్బతీసేలా ఏ రాజకీయ పార్టీ కూడా వ్యవహరించకూడదని విశ్లేషకులు అభిప్రాయపడుతున్నారు.

ప్రతిపక్షం తక్షణమే ఉపాధ్యాయులకు బహిరంగ క్షమాపణలు చెప్పాలని, పారదర్శకంగా జరిగిన నియామకాలపై నిందారోపణలు ఆపాలని డిమాండ్ తీవ్రమవుతోంది. ఈ వివాదంపై రానున్న రోజుల్లో రాజకీయ వేడి మరింత పెరిగే సూచనలు కనిపిస్తున్నాయి.

 

DSC 2025 Teachers Rally, Visakhapatnam Self Respect Rally, Mega DSC 2025, YSRCP Allegations on Mega DSC, AP Teachers Protest Visakhapatnam