క్రికెట్ ప్రపంచంలో ఎందరో మహామహులైన ఆటగాళ్లు వచ్చారు, వెళ్లారు. తమ అద్భుతమైన బ్యాటింగ్, సంచలన బౌలింగ్‌తో వ్యక్తిగత రికార్డులు నెలకొల్పిన వీరులు ఎందరో ఉన్నారు. కానీ, వ్యక్తిగత ఘనతలను పక్కనపెట్టి, జట్టు విజయం కోసం జోడీగా మైదానంలో అడుగుపెట్టి రికార్డుల సునామీ సృష్టించిన ఐకానిక్ పార్ట్‌నర్‌షిప్‌లు క్రికెట్ చరిత్రలోనే అత్యంత ప్రత్యేకమైనవిగా నిలిచాయి. మైదానంలో ఆటే కాదు, వారి మధ్య ఉన్న బంధం కూడా ఎంతోమంది అభిమానులను మంత్రముగ్ధులను చేసింది. భారత క్రికెట్ చరిత్రను తిరగరాసిన సచిన్ టెండూల్కర్, సౌరవ్ గంగూలీ జోడీ నుంచి నేటితరం క్రికెట్ ప్రేమికులను అలరిస్తున్న విరాట్ కోహ్లీ, రోహిత్ శర్మ జంట వరకు క్రికెట్ ప్రపంచంలో చెరగని ముద్ర వేసిన అనేక లెజెండరీ ద్వయాలు ఉన్నాయి.

భారత క్రికెట్‌కు కపిల్ దేవ్, సునీల్ గవాస్కర్ వేసిన బలమైన పునాదిని తర్వాతి కాలంలో సచిన్ టెండూల్కర్, సౌరవ్ గంగూలీలు కొత్త శిఖరాలకు చేర్చారు. 1996లో దక్షిణాఫ్రికాపై టైటాన్ కప్‌లో తొలిసారి ఓపెనింగ్ జోడీగా బరిలోకి దిగిన మాస్టర్ బ్లాస్టర్, దాదా ప్రపంచ క్రికెట్‌లోనే అత్యుత్తమ ఓపెనింగ్ జంటగా ఎదిగారు. వన్డే క్రికెట్‌లో ఏకంగా 176 ఇన్నింగ్స్‌ల్లో ఓపెనింగ్ చేసిన ఈ జోడీ 8,227 పరుగులు రాబట్టి ఎవరికీ అందని ఎత్తులో నిలిచింది. 2001 అక్టోబర్ 24న కెన్యాపై సచిన్ 146 పరుగులు, గంగూలీ 111 పరుగులతో చెలరేగి నెలకొల్పిన 258 పరుగుల భాగస్వామ్యం వీరిద్దరి కెరీర్‌లోనే అత్యుధికంగా నమోదైంది. మరోవైపు ఆస్ట్రేలియా క్రికెట్‌ను దశాబ్దాల పాటు శాసించిన మాథ్యూ హేడెన్, జస్టిన్ లాంగర్ జోడీ సుదీర్ఘ టెస్ట్ ఫార్మాట్‌లో 113 మ్యాచుల్లో 5,655 పరుగులు రాబట్టింది. ఇందులో 14 శతకాలు, 6 డబుల్ సెంచరీల భాగస్వామ్యాలు ఉండటం వీరి విధ్వంసక ఆటతీరుకు నిదర్శనం. అలాగే శ్రీలంక మిడిలార్డర్ వెన్నుముకగా నిలిచిన కుమార సంగక్కర, మహేల జయవర్ధనే ద్వయం వన్డేల్లో 148 ఇన్నింగ్స్‌ల్లో 15 శతకాలు, 35 అర్ధ శతకాలతో 5,992 పరుగులు సాధించింది. ముఖ్యంగా 2006లో దక్షిణాఫ్రికాపై ఫస్ట్ క్లాస్ క్రికెట్‌లో వీరు నెలకొల్పిన 624 పరుగుల చారిత్రాత్మక రికార్డు నేటికీ చెక్కుచెదరలేదు. ఇక ఈతరంలో టీమిండియాను విజయపథంలో నడిపిస్తున్న విరాట్ కోహ్లీ, రోహిత్ శర్మల 'రోకో' జోడీ వన్డేల్లో వందకు పైగా మ్యాచుల్లో కలిసి ఆడి 5,790 పరుగులు సాధించి ఆధునిక క్రికెట్‌లో తమ ముద్రను బలంగా వేసింది.

బ్యాటింగ్‌లోనే కాకుండా బౌలింగ్‌లోనూ ప్రత్యర్థి బ్యాటర్ల గుండెల్లో రైళ్లు పరిగెత్తించిన లెజెండరీ బౌలింగ్ జోడీలు ఎన్నో ఉన్నాయి. ఆస్ట్రేలియాకు చెందిన పేస్ దిగ్గజం గ్లెన్ మెక్‌గ్రాత్, లెగ్ స్పిన్ మాంత్రికుడు దివంగత షేన్ వార్న్ జోడీ 104 టెస్టుల్లో కలిసి ఆడి ఏకంగా 1,001 వికెట్లు పడగొట్టి చరిత్ర సృష్టించింది. మెక్‌గ్రాత్ పదునైన లైన్ అండ్ లెంగ్త్‌తో భయపెడితే, వార్న్ తన మిస్టరీ స్పిన్‌తో ప్రత్యర్థులను చుట్టేసేవాడు. పాకిస్థాన్ రివర్స్ స్వింగ్ దిగ్గజాలు వసీం అక్రమ్, వకార్ యూనిస్ జోడీ వన్డేల్లో 918 వికెట్లు, టెస్టుల్లో 916 వికెట్లతో మొత్తం దాదాపు 2,000 వికెట్లు పడగొట్టి ప్రత్యర్థి జట్లను వణికించింది. ఇంగ్లండ్ సుదీర్ఘ టెస్టు క్రికెట్ వైభవానికి ప్రతీకగా నిలిచిన జేమ్స్ అండర్సన్, స్టువార్ట్ బ్రాడ్ ద్వయం దాదాపు 350 మ్యాచుల్లో కలిసి ఆడి 1,308 వికెట్లు సాధించింది. అంతేకాకుండా టెస్టుల్లో సంయుక్తంగా 600 మంది బ్యాటర్లను అవుట్ చేసిన తొలి ఇంగ్లండ్ పేస్ జోడీగా నిలిచింది. అండర్సన్ 188 మ్యాచుల్లో 704 వికెట్లు, బ్రాడ్ 167 మ్యాచుల్లో 604 వికెట్లతో తమ కెరీర్‌లను అద్భుతంగా ముగించారు. మరోవైపు శ్రీలంక లెఫ్టార్మ్ పేసర్ చమిందా వాస్, మణికట్టు మాంత్రికుడు ముత్తయ్య మురళీధరన్ జోడీ 348 మ్యాచుల్లో ఏకంగా 2,108 వికెట్లు పడగొట్టి ఆసియా బౌలింగ్ శక్తులలో అగ్రస్థానంలో నిలిచింది. ఇలా ఆటతోనే కాకుండా రికార్డులతో క్రికెట్ చరిత్ర పుటల్లో నిలిచిపోయిన ఈ ఐకానిక్ జోడీలు ఎప్పటికీ అభిమానుల గుండెల్లో చిరస్థాయిగా నిలిచిపోతాయి.

 

 

 

[Sachin Tendulkar, Sourav Ganguly, Virat Kohli, Rohit Sharma, Matthew Hayden, Justin Langer, Kumar Sangakkara, Mahela Jayawardene, Glenn McGrath, Shane Warne]