హైదరాబాద్ నగరంలో ఎంతో చారిత్రక ప్రాధాన్యత కలిగిన మీరాలం చెరువు సరికొత్త పర్యాటక కాంతులతో మెరిసిపోయేందుకు సిద్ధమవుతోంది. సీఎం రేవంత్ రెడ్డి మీరాలం చెరువును ఆకస్మికంగా సందర్శించి అందరినీ ఆశ్చర్యపరిచారు. ముందస్తు సమాచారం లేకుండానే నేరుగా క్షేత్రస్థాయికి చేరుకున్న సీఎం, అక్కడ శరవేగంగా జరుగుతున్న వివిధ అభివృద్ధి పనులను స్వయంగా పరిశీలించి పనుల పురోగతిపై తీవ్ర స్థాయిలో సమీక్ష జరిపారు. నగరంలో పర్యాటక రంగాన్ని సరికొత్త శిఖరాలకు చేర్చడమే లక్ష్యంగా ప్రభుత్వ యంత్రాంగం అడుగులు వేస్తోంది. ప్రస్తుతం మీరాలం చెరువుపై నగరవాసులను ఆకట్టుకునేలా బృహత్తర సస్పెన్షన్ బ్రిడ్జ్ నిర్మాణ పనులు శరవేగంగా జరుగుతున్నాయి. 

మూసీ రివర్ ఫ్రంట్ డెవలప్‌మెంట్ కార్పొరేషన్ లిమిటెడ్ (MRFDCL) ఆధ్వర్యంలో రూపుదిద్దుకుంటున్న ఈ పనుల సంపూర్ణ వివరాలను, బ్లూప్రింట్‌ను సంబంధిత ఉన్నతాధికారులు ముఖ్యమంత్రికి సమగ్రంగా వివరించారు. బ్రిడ్జి నిర్మాణ శైలి, నాణ్యతా ప్రమాణాలు మరియు ప్రస్తుత పురోగతిని సీఎం స్వయంగా అడిగి తెలుసుకున్నారు. ఎట్టి పరిస్థితుల్లోనూ నిర్దేశిత గడువు లోగానే సస్పెన్షన్ బ్రిడ్జ్ నిర్మాణాన్ని పూర్తి చేసి ప్రజలకు అందుబాటులోకి తీసుకురావాలని సీఎం అధికారులను స్పష్టమైన ఆదేశాలు జారీ చేశారు. ఈ పర్యటనలో భాగంగా  రేవంత్ రెడ్డి చెరువు పరిరక్షణకు  సుందరీకరణకు సంబంధించి పలు కీలక సూచనలు చేశారు. ముఖ్యంగా చెరువులోకి ఎలాంటి మురుగు నీరు చేరకుండా పక్కాగా డ్రైనేజీ డైవర్షన్ చర్యలు తీసుకోవాలని స్పష్టం చేశారు. 

నీరు స్వచ్ఛంగా ఉంటేనే పర్యాటకుల రాక పెరుగుతుందని ఆయన అభిప్రాయపడ్డారు. దీనితో పాటు జల క్రీడల ప్రేమికులను ఆకర్షించేలా చెరువులో ప్రత్యేక వాటర్ స్పోర్ట్స్ డిజైన్ చేయాలని సూచించారు. బోటింగ్, సాహస జల క్రీడలు వంటివి ఏర్పాటు చేయడం ద్వారా యువతను, పర్యాటకులను విశేషంగా ఆకట్టుకోవచ్చని సీఎం పేర్కొన్నారు. మరొక ముఖ్యమైన అంశంగా, మీరాలం చెరువు మధ్యలో ఉన్న సహజ సిద్ధమైన ఐలాండ్‌ను అత్యంత సుందరంగా అభివృద్ధి చేయాలని సీఎం ఆదేశించారు. 

ల్యాండ్‌స్కేపింగ్, పచ్చదనం, లైటింగ్ కాంతులతో ఈ ఐలాండ్‌ను పర్యాటకులను మంత్రముగ్ధులను చేసే అద్భుత కేంద్రంగా తీర్చిదిద్దాలని చెప్పారు. పాతబస్తీ ప్రాంతంలో పర్యాటక శోభను పెంచేందుకు మీరాలం చెరువు పునరుద్ధరణ ప్రాజెక్టు ఎంతో కీలకంగా మారనుంది. పనుల్లో ఎలాంటి అలసత్వం సహించేది లేదని, సమగ్ర ప్రణాళికతో పనులు వేగవంతం చేసి హైదరాబాద్ నగరానికి మరో ల్యాండ్‌మార్క్‌ను బహుమతిగా అందించాలని సీఎం అధికారులను పురమాయించారు.

 

CM Revanth Reddy, Mir Alam Tank, Suspension Bridge Hyderabad, Musi Riverfront Development, Hyderabad Tourism, Telangana News, Telugu news ,Telugu one