ఆకాశ మార్గంలో ఊహించని ప్రమాదం ముంచుకొచ్చినప్పుడు ఒక భారతీయ పైలట్ ప్రదర్శించిన అసాధారణ తెగువ ప్రపంచవ్యాప్తంగా ప్రశంసలు అందుకుంటోంది. దుబాయ్ నుంచి ఇజ్రాయెల్ వెళ్తున్న ఫ్లైదుబాయ్ విమానంలో కోపైలట్ చేసిన ప్రమాదకర కుట్రను తన ప్రాణాలను పణంగా పెట్టి తిప్పికొట్టిన కెప్టెన్ స్మిత్ మచ్ఛార్‌‌తో దేశ ప్రధాని నరేంద్ర మోదీ స్వయంగా ఫోన్‌లో మాట్లాడారు.ఈ సాహసోపేత ఘటన వివరాలను, ఆ సంక్షోభ సమయంలో తాను ఎదుర్కొన్న పరిస్థితులను పైలట్ స్మిత్ ప్రధానికి వివరించారు. తీవ్ర గాయాలపాలైనప్పటికీ, విమానాన్ని కాపాడుకునేందుకు తాను ఏ విధంగా తెగువ ప్రదర్శించాల్సి వచ్చిందో ఆయన పంచుకున్నారు. ఈ సందర్భంగా పైలట్ చూపిన సంయమనాన్ని, మనోధైర్యాన్ని ప్రధాని మోదీ ప్రత్యేకంగా అభినందించారు.దుబాయ్ నుంచి టెల్ అవీవ్ బయలుదేరిన ఫ్లైదుబాయ్ విమానంలో ప్రయాణిస్తున్న సమయంలో కోపైలట్ అకస్మాత్తుగా దాడికి పాల్పడటంతో తీవ్ర ఉద్రిక్తత నెలకొంది. 

విమానాన్ని కూల్చేసేందుకు కోపైలట్ యత్నించగా, తీవ్ర గాయాల బారిన పడినప్పటికీ కెప్టెన్ స్మిత్ ఏమాత్రం వెనకడుగు వేయలేదు. సమయస్ఫూర్తితో కాక్ పిట్ తలుపులు తెరిచి ప్రయాణికులకు, సిబ్బందికి సమాచారం అందించడంతో పెను ప్రమాదం తప్పింది.ఈ విపత్కర సమయంలో తనను ఏది కాపాడిందో వివరిస్తూ, కష్ట సమయాల్లో తాను నిత్యం హనుమాన్ చాలీసా పఠిస్తానని, ఆ విమాన ప్రయాణంలోనూ అదే ధైర్యంతో ఉన్నానని స్మిత్ ప్రధానితో భావోద్వేగంగా పంచుకున్నారు. ప్రధానమంత్రి తనను స్వయంగా ఫోన్ చేసి పలకరించడం తన జీవితంలో ఎప్పటికీ మరువలేని ప్రత్యేక క్షణమని, మోదీనే తన అతిపెద్ద ఆదర్శమని ఆయన పేర్కొన్నారు.భారతీయులు ఇతరుల ప్రాణాలు తీసేవారు కాదని, అవసరమైతే తమ ప్రాణాలను సైతం లెక్కచేయకుండా ఇతరులను కాపాడేవారనే సత్యాన్ని స్మిత్ మరోసారి నిరూపించారని ప్రధాని మోదీ కొనియాడారు. ఈ సాహస కృత్యం ద్వారా అతడు ప్రపంచ దేశాల ముందు దేశ కీర్తిని ఇనుమడింపజేశాడని అన్నారు. 

అంతకుముందు పైలట్ తల్లిదండ్రులతో పాటు ఆయన సతీమణికి కూడా ఫోన్ చేసి ధైర్యం చెప్పారు.ఇదే కోణంలో ఇజ్రాయెల్ ప్రధాని బెంజమిన్ నెతన్యాహు సైతం స్పందిస్తూ, ఈ భారతీయ పైలట్ చూపిన తెగువ మరో 9/11 తరహా పెను ఉగ్రవాద విషాదాన్ని అడ్డుకుందని ప్రశంసించారు. అమెరికా నాయకులు సైతం ఈ సాహసయోధుడిని హీరోగా అభివర్ణించారు. ప్రస్తుతానికి అబుదాబిలో వైద్య చికిత్స పొందుతున్న కెప్టెన్ స్మిత్ త్వరగా కోలుకోవాలని కోట్లాది మంది భారతీయులు ప్రార్థిస్తున్నారు. అంతర్జాతీయ విమానయాన రంగంలో 'ఇన్‌సైడర్ త్రెట్' (సిబ్బంది నుంచే ముప్పు) అంశంపై ఇప్పుడు తీవ్ర చర్చనీయాంశమైంది. భవిష్యత్తులో ఇలాంటి సంఘటనలు పునరావృతం కాకుండా విమానయాన సంస్థలు మరింత కఠినమైన భద్రతా నిబంధనలను, తనిఖీలను అమలు చేయాలని నిపుణులు అభిప్రాయపడుతున్నారు. దేశం గర్వించదగ్గ రీతిలో వ్యవహరించిన కెప్టెన్ స్మిత్ మచ్ఛార్‌కు ఉన్నత స్థాయి పురస్కారాలు దక్కాలని పౌర సమాజం నుంచి డిమాండ్లు వ్యక్తమవుతున్నాయి.

 

 

 

[ Captain Smit Machchaar, PM Modi, Flydubai incident, Indian pilot bravery, Israel-bound flight hijack attempt, FlyDubai, Dubai Tel Aviv flight, Hero pilot attack, Hanuman Chalisa,Telugu One, Telugu News ]