సికింద్రాబాద్ బొల్లారం పరిధిలో జరిగిన సంచలనాత్మక ఆర్మీ ఆయుధాల చోరీ ఉదంతం తెలుగు రాష్ట్రాల్లో ప్రకంపనలు సృష్టిస్తోంది. దేశవ్యాప్తంగా తీవ్ర కలకలం రేపిన ఈ భద్రతా వైఫల్యం  ఆయుధాల మాయం ఘటనపై దర్యాప్తు వేగవంతం కాగా, పోలీసుల విచారణలో ఒక్కొక్కటిగా విస్తుపోయే నిజాలు బయటపడుతున్నాయి. గత ఏడాది ఆగస్టు 30వ తేదీ రాత్రి సమయంలో బొల్లారంలోని 20వ మద్రాస్ రెజిమెంట్ బెటాలియన్‌కు చెందిన ఆర్మీ ఆయుధాగారం నుంచి ఏకంగా 12 అత్యాధునిక మారణహోమ ఆయుధాలు, 1,800లకు పైగా తూటాలు, మందుగుండు సామాగ్రి అదృశ్యమవడం కలకలం రేపింది. ఈ దుర్ఘటనకు సంబంధించి మాజీ హవల్దార్ మల్లేష్‌ను ప్రధాన నిందితుడిగా గుర్తించి పోలీసులు అదుపులోకి తీసుకోవడంతో పాటు దర్యాప్తును మరింత లోతుగా కొనసాగిస్తున్నారు.

నిందితుడు మల్లేష్ అత్యంత పక్కా ప్రణాళికతో ఈ భారీ చోరీకి పాల్పడినట్లు పోలీసుల విచారణలో తేలింది. ఆగస్టు 27, 28, 29 తేదీల్లో వరుసగా మూడు రోజుల పాటు 20వ మద్రాస్ రెజిమెంట్ క్యాంపస్‌లోనే రెక్కీ నిర్వహించినట్లు దర్యాప్తులో వెల్లడైంది. ఆదివారం పూట గార్డ్ ఇన్‌ఛార్జ్‌లు, ఆర్మీ అధికారుల కదలికలు తక్కువగా ఉంటాయని ముందే అంచనా వేసిన మల్లేష్, అదే రోజు రాత్రి ఈ ఘాతుకానికి తెరలేపాడు. ముందుగా ఆగస్టు 29వ తేదీన కౌకూరులో ఒక ఇనుప రాడ్డును కొనుగోలు చేసిన నిందితుడు, సరిగ్గా ఆగస్టు 30వ తేదీ రాత్రి 11 గంటల సమయంలో స్కూటీపై రెజిమెంట్లలోకి ప్రవేశించాడు. ఆయుధాగార గదుల తాళాలను ఇనుప రాడ్డుతో పగులగొట్టి, అత్యంత ప్రమాదకరమైన నాలుగు ఏకే-203 (AK-203) అసాల్ట్ రైఫిళ్లు, ఒక ఇన్సాస్ (INSAS 1B1) రైఫిల్, ఆరు 9 ఎంఎం ఆటో 1ఏ (9 mm Auto 1A) పిస్టల్స్, మరో 6.35-బోర్ పిస్టల్‌తో పాటు భారీ ఎత్తున మందుగుండు సామాగ్రిని అపహరించాడు.

చోరీ చేసిన ఆయుధాలను రెండు మూటలుగా కట్టి మొదట స్కూటీపై సమీపంలోని ఒక గుడి వద్దకు చేర్చిన మల్లేష్, మూడో మూట కోసం వెనక్కి వెళ్లినప్పుడు ఊహించని పరిణామం ఎదురైంది. బెటాలియన్‌కు చెందిన ఒక గార్డ్ "ఎవరు మీరు?" అని ప్రశ్నించగా, తాను కూడా 20వ మద్రాస్ రెజిమెంట్‌ వాడినేనని నమ్మించి అక్కడి నుంచి తప్పించుకున్నాడు. ఆ తర్వాత తెల్లవారుజామున బాలాజీనగర్‌లోని తన ఇంటికి చేరుకున్న నిందితుడు, కారులో తిరిగి గుడి వద్దకు వచ్చి ఆ మూటలను తీసుకొని నాగర్ కర్నూల్ జిల్లా అచ్చంపేటకు తరలించినట్లు తేలింది.

ఈ కేసు తీవ్రత దృష్ట్యా కోర్టు అనుమతితో నిందితుడిని 10 రోజుల పోలీసు కస్టడీకి తీసుకుని విచారిస్తున్నారు. ఇందులో భాగంగానే పోలీసులు ఘటనా స్థలంలో క్రైమ్ రీకన్‌స్ట్రక్షన్ (జరిగిన తీరును పునశ్చరణ చేయడం) నిర్వహించి, చోరీ జరిగిన విధానాన్ని కూలంకషంగా పరిశీలించారు. ఈ కేసులో మరింత మందికి ప్రమేయం ఉందా లేదా అనే కోణంలోనూ, మిలిటరీ అధికారుల సహకారంతో దర్యాప్తును ముమ్మరం చేశారు. ఆర్మీ వంటి అత్యంత కట్టుదిట్టమైన భద్రతా వలయం ఉన్న కేంద్రంలో జరిగిన ఈ భారీ ఆయుధాల చోరీ ఉదంతం దేశవ్యాప్తంగా రక్షణ రంగంలో చర్చనీయాంశంగా మారింది.

 

 

 

 

[ Bolarum arms theft, army weapons stolen, Madras Regiment case, ex havildar mallesh, AK-203 rifles, hyderabad crime news, Former Havildar Mallesh, Nagarkurnool District, Achampeta ]