వివిధ రాష్ట్రాలకు కొత్త ఇన్‌ఛార్జీలను ప్రకటించిన కాషాయ పార్టీ..!

రాబోయే అసెంబ్లీ, సార్వత్రిక ఎన్నికల్లో విజయం లక్ష్యంగా బీజేపీ అధినాయకత్వం పార్టీ సంస్థాగత యంత్రాంగంలో భారీ మార్పులు చేపట్టింది. దేశవ్యాప్తంగా 28 రాష్ట్రాలు, 8 కేంద్రపాలిత ప్రాంతాలకు కొత్త ఇన్‌చార్జ్‌లు, సహ ఇన్‌చార్జ్‌లను నియమించింది. ఈ మేరకు బీజేపీ జాతీయ అధ్యక్షుడు నితిన్ నబీన్ అధికారికంగా జాబితాను ప్రకటించారు. ప్రాంతీయ రాజకీయ పరిస్థితులు, ఎన్నికల సమీకరణాలు, పార్టీ భవిష్యత్ వ్యూహాలను పరిగణనలోకి తీసుకుని కీలక నేతలకు ఆయా రాష్ట్రాల బాధ్యతలను అప్పగించారు. పార్టీ సంస్థాగత బలోపేతం, క్షేత్రస్థాయిలో కార్యకర్తల సమన్వయం, ఎన్నికల వ్యూహాల అమలులో కొత్త ఇన్‌చార్జ్‌లు కీలకంగా వ్యవహరించనున్నారు. రాబోయే ఎన్నికలను దృష్టిలో పెట్టుకుని రాష్ట్రాల వారీగా పార్టీ పనితీరును మరింత సమర్థవంతంగా తీర్చిదిద్దేందుకు ఈ మార్పులు చేపట్టినట్లు బీజేపీ వర్గాలు పేర్కొంటున్నాయి. బీజేపీ జాతీయ ప్రధాన కార్యదర్శిగా బాధ్యతలు నిర్వర్తిస్తున్న ప్రముఖ నాయకురాలు స్మృతి ఇరానీకి కీలకమైన బాధ్యతలు అప్పగించారు. 

ఆమెకు హర్యానా, ఛత్తీస్‌గఢ్ రాష్ట్రాల పార్టీ ఇన్‌ఛార్జి బాధ్యతలను కేటాయించారు. గత కొంతకాలంగా జాతీయ రాజకీయాల్లో క్రియాశీలకంగా వ్యవహరిస్తున్న స్మృతి ఇరానీకి రెండు ముఖ్యమైన రాష్ట్రాల బాధ్యతలు అప్పగించడం ద్వారా పార్టీలో ఆమె ప్రాధాన్యత మరింత పెరిగినట్లయింది. మరోవైపు, పార్టీలో కీలక వ్యూహకర్తగా పేరుగాంచిన సునీల్ బన్సల్‌కు తెలంగాణ, పశ్చిమ బెంగాల్ రాష్ట్రాల ఇన్‌ఛార్జి బాధ్యతలు కేటాయించారు. తెలంగాణలో పార్టీని మరింత బలోపేతం చేసే దిశగా జాతీయ నాయకత్వం ఈ నిర్ణయం తీసుకుంది. ఆంధ్రప్రదేశ్: అర్వింద్ భదౌరియా ఇంచార్జ్‌గా, తమిళనాడు మాజీ ఎమ్మెల్యే వనతి శ్రీనివాసన్ సహ-ఇంచార్జ్‌గా వ్యవహరిస్తారు.ఒడిశా: దగ్గుబాటి పురందేశ్వరి ఇంచార్జ్‌గా, డాక్టర్ స్వదేశ్ సింగ్ సహ-ఇంచార్జ్‌గా నియమితులయ్యారు. తమిళనాడు: రామ్ మాధవ్ ఇంచార్జ్‌గా ఎంపికవ్వగా, కో-ఇంచార్జ్‌లుగా డీకే అరుణ, నిర్మల్ కుమార్ సురాణా బాధ్యతలు చేపట్టనున్నారు.

ఇదే క్రమంలో మరికొద్ది మంది సీనియర్ నాయకులకు కూడా ముఖ్యమైన రాష్ట్రాల బాధ్యతలు దక్కాయి. బీజేపీ జాతీయ ఉపాధ్యక్షుడిగా ఉన్న రామ్ మాధవ్‌కు తమిళనాడు, ఉత్తరాఖండ్ రాష్ట్రాల బాధ్యతలను కేటాయించారు. అలాగే, వినోద్ తావ్డేను ఉత్తరప్రదేశ్ రాష్ట్ర ఇన్‌ఛార్జిగా, వినయ్ సహస్రబుద్ధేను ఢిల్లీ ఇన్‌ఛార్జిగా నియమించినట్లు పార్టీ వర్గాలు వెల్లడించాయి. దేశవ్యాప్తంగా మొత్తం 28 రాష్ట్రాలు మరియు 8 కేంద్రపాలిత ప్రాంతాలకు సంబంధించిన ఇన్‌ఛార్జీలు, సహ-ఇన్‌ఛార్జీల పూర్తి జాబితాను బీజేపీ జాతీయ నాయకత్వం ప్రకటించింది. క్షేత్రస్థాయిలో పార్టీ సంస్థాగత నిర్మాణాన్ని మరింత పటిష్టం చేసేందుకు, రాబోయే సవాళ్లను సమర్థవంతంగా ఎదుర్కొనేందుకు ఈ తాజా మార్పులు ఎంతగానో ఉపయోగపడతాయని రాజకీయ పరిశీలకులు అంచనా వేస్తున్నారు.

 

 

 

[ BJP state in charges, Smriti Irani, Sunil Bansal, Telangana BJP, Ram Madhav, BJP news updates, Arvind Bhadauria, Daggubati Purandeswari, DK Aruna,Ram Madhav, Nitin Nabeen ]