దేశ ఐటీ రాజధానిగా విరాజిల్లుతున్న సిలికాన్ వ్యాలీ బెంగళూరులో ట్రాఫిక్ సమస్య గురించి ప్రత్యేకంగా చెప్పనవసరం లేదు. ఉదయం, సాయంత్రం వేళల్లో ఆఫీసులకు వెళ్లే ఉద్యోగులు ఎదుర్కొనే నరకయాతన అంతాఇంతా కాదు. అయితే, ఈ రద్దీ కేవలం ఉద్యోగులకే పరిమితం కాకుండా పసిప్రాయంలోని స్కూల్ పిల్లలను సైతం తీవ్రంగా వేధిస్తోందని తాజా అధ్యయనాలు హెచ్చరిస్తున్నాయి. బెంగళూరు నగరంలో నెలకొన్న విపరీతమైన ట్రాఫిక్ జామ్‌ల కారణంగా చిన్నారులు తమ అమూల్యమైన కాలాన్ని రోడ్లపైనే కోల్పోతున్నారు. తాజా పరిశోధనల ప్రకారం.. నగరంలోని రద్దీ మార్గాల్లో ప్రయాణించే పాఠశాల విద్యార్థులు తమ జీవితంలో ఏటా దాదాపు 53 రోజులు (అంటే సుమారు 374 గంటలు) కేవలం ట్రాఫిక్‌‌లోనే వృథా చేస్తున్నట్లు తేలింది.

ముఖ్యంగా బెంగళూరులోని అత్యంత రద్దీగా ఉండే స్టేట్ హైవే-35 (వర్తూర్-గుంజూర్) మార్గంలో ఈ దుస్థితి మరింత స్పష్టంగా కనిపిస్తోంది. కేవలం నాలుగు నుంచి ఐదు కిలోమీటర్ల దూరం ప్రయాణించడానికి కూడా విద్యార్థులు దాదాపు రెండున్నర గంటల సమయం కేటాయించాల్సి వస్తోంది. ఉదయాన్నే స్కూల్ బస్సులు, వ్యాన్లలో ఎక్కే చిన్నారులు గంటల తరబడి ట్రాఫిక్‌లో ఇరుక్కుపోతున్నారు.ఈ దీర్ఘకాలిక ప్రయాణాల వల్ల విద్యార్థుల శారీరక, మానసిక ఆరోగ్యంపై తీవ్ర ప్రభావం పడుతోందని నిపుణులు ఆందోళన వ్యక్తం చేస్తున్నారు. సరిగ్గా నిద్రలేకపోవడం, హోంవర్క్ చేసుకోవడానికి సమయం దొరకకపోవడం, మానసిక ఒత్తిడికి గురికావడం వంటి సమస్యలను చిన్నారులు ఎదుర్కొంటున్నారు. పాఠశాలలకు వెళ్లే వయసులో విద్యపై దృష్టి పెట్టాల్సిన పిల్లలు, రోడ్లపై ట్రాఫిక్ కష్టాలతో సతమతమవ్వడం తల్లిదండ్రులను కలవరపెడుతోంది.

బెంగళూరు నగరంలో వేగంగా జరుగుతున్న పట్టణీకరణ, విపరీతంగా పెరుగుతున్న వాహనాల సంఖ్యే ఈ దయనీయ పరిస్థితికి ప్రధాన కారణమని విశ్లేషకులు భావిస్తున్నారు. ప్రత్యామ్నాయ రవాణా మార్గాలను అభివృద్ధి చేయడంలో ప్రభుత్వాలు, స్థానిక యంత్రాంగాలు మరింత వేగంగా స్పందించాల్సిన అవసరం ఉందని నిపుణులు సూచిస్తున్నారు. ఈ సమస్యను పరిష్కరించకపోతే రాబోయే రోజుల్లో విద్యార్థుల విద్యా ప్రమాణాలు మరింత దిగజారే అవకాశం ఉంది. కాబట్టి, నగరంలో పబ్లిక్ ట్రాఫిక్‌‌ను మెరుగుపరచడం, స్కూల్ బస్సుల రాకపోకలకు ప్రత్యేక కారిడార్లు లేదా ప్రత్యేక సమయాలను కేటాయించడం వంటి పటిష్టమైన చర్యలు తీసుకోవాలని నగర ప్రజలు, విద్యార్థుల తల్లిదండ్రులు తీవ్రంగా డిమాండ్ చేస్తున్నారు.

 

 

 

[ Bengaluru Traffic, Bangalore Traffic, Traffic Congestion, Bengaluru Traffic Jam, Student Life, Students Travel Time, 53 Days Wasted, Traffic Impact on Students, Bengaluru Education, Commuters, Road Traffic, Traffic Problems, Urban Mobility, Bangalore News, Karnataka News, Traffic Congestion in Bengaluru, Student Commute ]