ఎండాకాలం తీవ్రత పెరిగినప్పుడు శరీరం త్వరగా డీహైడ్రేషన్‌కు గురవుతుంది మరియు కొందరిలో మూత్ర సంబంధిత సమస్యలు లేదా ఒంటిలో విపరీతమైన వేడి పెరుగుతుంది. ఇలాంటి సమయంలో మన వంటింటికి దొరికే కూరగాయల్లో బీరకాయ ముందుంటుంది. బీరకాయలో దాదాపు 90 శాతానికి పైగా నీటి శాతం ఉండటం వల్ల ఇది శరీరంలో హైడ్రేషన్‌ను కాపాడటంలో కీలక పాత్ర పోషిస్తుంది. 

సాధారణంగా బీరకాయను పాలు, పెసరపప్పు లేదా ఎగ్స్ వేసి వండుతుంటారు, కానీ ఎండకాలంలో ఒంటికి చలువ చేసే సరికొత్త రుచి కోసం  బీరకాయ పెరుగు కూర ను ట్రై చేయడం చాలా మంచిది. ఈ కూర తయారీ కేవలం 15 నుంచి 20 నిమిషాల్లో పూర్తవుతుంది మరియు ఇది ఆరోగ్యానికి ఎంతో మేలు చేస్తుంది.

ఈ సమ్మర్ స్పెషల్ రెసిపీ తయారీ కోసం ముందుగా తాజా బీరకాయలను తీసుకుని, పీలర్‌తో పైన ఉండే తొక్కను తొలగించి చిన్న క్యూబ్స్ లాగా కట్ చేసుకోవాలి. ఆ తర్వాత ఒక పాత్రలో కొద్దిగా నూనె వేసి, కట్ చేసుకున్న బీరకాయ ముక్కలను వేయించుకోవాలి లేదా కొద్దిగా నీళ్లు, ఉప్పు, అర టేబుల్ స్పూన్ పసుపు వేసి మెత్తగా ఉడికించి పక్కన పెట్టుకోవాలి. మరో గిన్నెలో 2 నుండి 3 కప్పుల తాజా పెరుగును తీసుకుని, తగినన్ని నీళ్లు కలిపి చిక్కటి మజ్జిగలా తయారు చేసుకోవాలి. ఈ మజ్జిగ మిశ్రమంలో ముందుగా ఉడికించి పక్కన పెట్టుకున్న బీరకాయ ముక్కలను కలపాలి.

ఇప్పుడు స్టవ్ మీద మీడియం మంట ఉంచి ఈ మిశ్రమాన్ని కొద్దిసేపు ఉడికించాలి. అయితే పెరుగును ఎక్కువసేపు మరగనిస్తే అది పగిలిపోయే అవకాశం ఉంటుంది కాబట్టి, మంటను మీడియంగా ఉంచి జాగ్రత్తగా గరిటెతో తిప్పుతూ ఉడికించుకోవాలి. కూర చిక్కబడే లోపు పోపు కోసం చిన్న కడాయిలో 2 టేబుల్ స్పూన్ల నూనె వేడి చేయాలి. ఆ తర్వాత అందులో ఆవాలు, మినపప్పు, జీలకర్ర, ఎండుమిర్చి, కరివేపాకు (10 రెబ్బలు), సన్నగా తరిగిన పచ్చిమిర్చి ముక్కలు మరియు కొద్దిగా అల్లం పేస్ట్ వేసి వేయించాలి.

ఇది కూడా చదవండి:గుమగుమలాడే, రాయలసీమ స్పెషల్, దూపుడు పోతు బిర్యానీ రెసిపీ!

ఈ పోపు దినుసులను వేడివేడిగా సిద్ధం చేసుకున్న పెరుగు కూరలో వేసి బాగా కలపాలి. చివరగా సన్నగా తరిగిన తాజా కొత్తిమీర తరుగును చల్లుకుంటే ఎంతో సువాసనతో కూడిన రుచికరమైన బీరకాయ పెరుగు కూర సిద్ధమవుతుంది. ఈ కూరను వేడి వేడి అన్నంతో కలిపి తింటే టేస్ట్ నెక్స్ట్ లెవెల్‌లో ఉంటుంది. అంతేకాకుండా ఇది అన్నంతో పాటు పూరీ, చపాతీ, రోటీల్లోకి కూడా అద్భుతమైన కాంబినేషన్‌గా నిలుస్తుంది.

బీరకాయలో ఉండే పుష్కలమైన ఫైబర్ జీర్ణక్రియను మెరుగుపరచడమే కాకుండా, శరీరంలోని విష వ్యర్థాలను బయటకు పంపడంలో సహాయపడుతుంది. అలాగే పెరుగులోని ప్రోబయోటిక్స్ కడుపుకు చల్లదనాన్ని ఇచ్చి వేసవి తాపం నుండి రక్షణ కల్పిస్తాయి. చిన్నపిల్లల నుంచి పెద్దల వరకు అందరూ ఇష్టపడే ఈ సింపుల్ అండ్ హెల్తీ వంటకాన్ని మీ ఇంట్లో కూడా ఒక్కసారి ప్రయత్నించి చూడండి. ఇది మీ శరీరాన్ని రోజంతా చల్లగా, శక్తివంతంగా ఉంచడంలో ఎంతగానో సహకరిస్తుంది

మీకు నచ్చవచ్చు: ఆల్కహాల్ మరియు నూనె పదార్థాలు, క్లోమంపై ఎలాంటి ప్రభావం చూపుతాయి?

గుండె ఆరోగ్యం నుండి, బరువు తగ్గింపు వరకు: బార్లీ వాటర్ తయారీ విధానం

 

 

Ridge Gourd Curd Curry, Beerakaya Perugu Kura, Summer Cooling Recipes, Healthy Vegetable Curries, Traditional Andhra Cooking, Yogurt And Gourd Dish, Food Articles In Telugu.