భారత క్రికెట్ నియంత్రణ మండలి (బీసీసీఐ) క్రికెటర్ల ఫిట్‌నెస్ మరియు జాతీయ జట్టు సెలెక్షన్ విధానంలో ఒక చారిత్రాత్మక నిర్ణయం తీసుకుంది. గత కొంతకాలంగా గాయపడిన ఆటగాళ్లను త్వరితగతిన జట్టులోకి తీసుకురావడం, వారు సిరీస్ మధ్యలోనే లేదా కొన్ని మ్యాచ్‌ల వ్యవధిలోనే మళ్లీ గాయపడి టోర్నీలకు దూరం కావడంపై తీవ్ర స్థాయిలో విమర్శలు వెల్లువెత్తాయి. హర్షిత్ రాణా 5 నెలల లాంగ్ బ్రేక్ తర్వాత పునరాగమనం చేసి రెండు వారాల వ్యవధిలోనే మళ్లీ గాయపడటం, అలాగే జస్ప్రీత్ బుమ్రా, నితీశ్ కుమార్ రెడ్డి, వాషింగ్టన్ సుందర్ వంటి ఆటగాళ్లు ఫిట్‌నెస్ సమస్యలతో వరుసగా ఇబ్బంది పడటం క్రికెట్ వర్గాల్లో పెద్ద ఎత్తున చర్చకు దారితీసింది. ఈ క్రమంలో బెంగళూరులోని బీసీసీఐ సెంటర్ ఆఫ్ ఎక్సలెన్స్ (CoE) పనితీరుపై కూడా అనేక ప్రశ్నలు తలెత్తాయి.

ఈ తీవ్ర విమర్శలను పరిగణనలోకి తీసుకున్న బీసీసీఐ, సెలెక్షన్ కమిటీ మరియు CoE అధిపతి వివిఎస్ లక్ష్మణ్ కాంబినేషన్ ఇకపై కఠినమైన సెలెక్షన్ నిబంధనలను అమలు చేయాలని నిర్ణయించారు. కొత్త పాలసీ ప్రకారం, ఏ ఆటగాడినైనా జాతీయ జట్టుకు ఎంపిక చేసే ముందు వారి ఫిట్‌నెస్‌పై కేవలం 100 శాతం మాత్రమే కాదు, ఏకంగా 200 శాతం పూర్తి నమ్మకం మరియు స్పష్టత వచ్చిన తర్వాతే మైదానంలోకి దింపాలని నిర్ణయించారు. తొందరపడి ఆటగాళ్లను జట్టులోకి తీసుకొచ్చి అంతర్జాతీయ సిరీస్‌లలో మధ్యలోనే జట్టును మార్చాల్సిన దుస్థితికి ఇకపై చెక్ పెట్టడమే ఈ నిర్ణయం యొక్క ప్రధాన ఉద్దేశం.

తాజాగా సెప్టెంబర్ 13 నుంచి ప్రారంభం కానున్న అఫ్గానిస్థాన్‌తో 3 మ్యాచ్‌ల టీ20 సిరీస్ కోసం 15 మంది సభ్యులతో కూడిన భారత జట్టును ప్రకటించినప్పుడు ఈ కొత్త విధానం స్పష్టంగా కనిపించింది. జట్టులోని జస్ప్రీత్ బుమ్రా, నితీశ్ కుమార్ రెడ్డి, వాషింగ్టన్ సుందర్, హర్షిత్ రాణా వంటి 4 కీలక ఆటగాళ్ల పేర్ల పక్కన అస్టరిస్క్ (*) మార్క్ ఉంచి 'సబ్జెక్ట్ టు ఫిట్‌నెస్' అనే షరతును విధించారు. అంతర్జాతీయ సిరీస్‌లకు 21 నుంచి 28 రోజుల ముందే (3 నుండి 4 వారాలు) జట్టును ఎంపిక చేయాల్సి వస్తుందని, సెలెక్షన్ రోజున ప్లేయర్ కొద్దిగా అన్‌ఫిట్‌గా ఉన్నప్పటికీ, మ్యాచ్ సమయానికి అంటే ఆ 21 లేదా 28 రోజుల వ్యవధిలో 100 శాతం కోలుకునే అవకాశం ఉంటుందని బీసీసీఐ కార్యదర్శి దేవజిత్ సైకియా స్పష్టం చేశారు. అందువల్ల ఫిట్‌నెస్ పరీక్షలో సదరు ఆటగాడు 200 శాతం నిరూపించుకుంటేనే తుది జట్టులో ఆడటానికి అనుమతిస్తారు. ఒకవేళ ఎంపికైన ప్లేయర్ ఫిట్‌నెస్ టెస్ట్ దాటలేకపోతే ప్రత్యామ్నాయ ఆటగాడిని సిద్ధంగా ఉంచేలా పూర్తి పారదర్శకతతో ఈ నయా రూల్‌ను రూపొందించారు.

 

 

 

 

bcci changes selection rules for injured players,team india selection bcci strict fitness rule.