భారత టెన్నిస్ రంగానికి జపాన్‌లోని ఐచి-నాగోయా (Aichi-Nagoya) వేదికగా జరిగిన 2026 ఆసియా క్రీడలు ఒక తీవ్రమైన నిరాశను మిగిల్చాయి. దశాబ్దాలుగా ఆసియా క్రీడల్లో పతకాల వర్షం కురిపించిన భారత టెన్నిస్ బృందం, ఈసారి ఒక్కటంటే ఒక్క పతకం కూడా గెలవలేక ఉత్త చేతులతో స్వదేశానికి తిరుగుముఖం పట్టింది. 1986 తర్వాత అంటే సరిగ్గా 40 ఏళ్ల సుదీర్ఘ కాలంలో భారత టెన్నిస్ జట్టు ఏ ఒక్క కేటగిరీలోనూ పతకం సాధించలేకపోవడం ఇదే మొదటిసారి. ఆసియా ఖండంలో భారత్ చూపిస్తూ వచ్చిన ఆధిపత్యం ఒక్కసారిగా కుప్పకూలడం క్రీడాభిమానులను తీవ్ర ఆందోళనలోకి నెట్టివేసింది.

గత నాలుగు దశాబ్దాలుగా ఆసియాడ్ టెన్నిస్‌‌లో భారత్ సాధించిన విజయాలు అపారం. 1986 సీయోల్ ఆసియాడ్ మినహాయిస్తే, ప్రతిసారి భారత క్రీడాకారులు దేశానికి కనీసం ఒక పతకాన్ని అందించేవారు. 1990లో బీజింగ్‌లో కాంస్యంతో మొదలైన ఈ విజయ పరంపర, 1994 హిరోషిమాలో బంగారం, 1998 బ్యాంకాక్‌లో నాలుగు పతకాలు, 2002 బుసాన్‌లో నాలుగు పతకాలు, 2006 దోహాలో నాలుగు పతకాలతో కొనసాగింది. అంతేకాక 2010 గ్వాంగ్‌జౌ క్రీడల్లో 5 పతకాలు, 2014 ఇంచియాన్‌లో 5 పతకాలు, 2018 జకార్తాలో 3 పతకాలు, చివరికి 2023లో జరిగిన హాంగ్‌జౌ ఆసియాడ్‌‌లో కూడా భారత్ 2 పతకాలను గెలుచుకుంది. ఇప్పటివరకు ఈ పోటీల చరిత్రలో మొత్తం 34 పతకాలను గెలుచుకుని ఆసియాలో మూడో అత్యంత విజయవంతమైన దేశంగా నిలిచింది. కానీ నాగోయాలో ఆ ప్రస్థానం ఘోరంగా ఆగిపోయింది.

ఈ చారిత్రాత్మక వైఫల్యానికి అనేక అంతర్గత సమస్యలు, ఆటగాళ్ల గైర్హాజరీ ప్రధాన కారణాలుగా నిలిచాయి. భారత అగ్రశ్రేణి సింగిల్స్ ఆటగాడు సుమిత్ నాగల్ (Sumit Nagal) చివరి నిమిషంలో టోర్నీ నుంచి తప్పుకోవడం జట్టును దెబ్బతీసింది. ఐటిఎఫ్ (ITF) ప్రపంచ ర్యాంకింగ్స్‌లో తన స్థానాన్ని కాపాడుకోవడానికి మరియు ప్రొఫెషనల్ టూర్లపై దృష్టి పెట్టేందుకు నాగల్ ఆసియాడ్ క్రీడలకు దూరంగా ఉన్నాడు. అదేవిధంగా డబుల్స్ విభాగంలో స్టార్ ఆటగాళ్లుగా పేరుపొందిన రోహన్ బోపన్న రిటైర్మెంట్ ప్రకటించడం, ఇతర సీనియర్ క్రీడాకారులు అందుబాటులో లేకపోవడం వల్ల అనుభవం లేని యవ క్రీడాకారులతో భారత్ రింగ్ లోకి దిగాల్సి వచ్చింది.

ఆల్ ఇండియా టెన్నిస్ అసోసియేషన్ (AITA) ఎంపిక విధానం మరియు ప్రణాళికారాహిత్యం కూడా ఈ ఓటమికి కారణమనే విమర్శలు వెల్లువెత్తుతున్నాయి. క్రీడలకు కేవలం కొద్ది రోజుల ముందు మాత్రమే తుది జట్టును ప్రకటించడం, సరైన సన్నాహకాలు లేకపోవడం వల్ల మన క్రీడాకారులు మైదానంలో ఆశించిన స్థాయిలో రాణించలేకపోయారు. గతంలో లియాండర్ పేస్, మహేష్ భూపతి, సానియా మీర్జా, సోమ్‌దేవ్ దేవ్‌వర్మన్ వంటి దిగ్గజాలు జట్టుకు రక్షణ కవచంలా నిలిచి పతకాలు సాధించిపెట్టేవారు. కానీ వారి నిష్క్రమణ తర్వాత ఆ స్థాయి ప్రతిభ కలిగిన తదుపరి తరం ఆటగాళ్లను తయారు చేయడంలో భారత టెన్నిస్ వ్యవస్థ పూర్తిగా విఫలమైందనేది ఈ ఫఫలితం ద్వారా స్పష్టమవుతోంది. ఈ 40 ఏళ్ల వైఫల్యం భారత టెన్నిస్ పాలకమండలికి ఒక హెచ్చరిక లాంటిది. తక్షణమే దిద్దుబాటు చర్యలు తీసుకోకపోతే అంతర్జాతీయ వేదికలపై భారత టెన్నిస్ భవిష్యత్తు మరింత అంధకారంలోకి వెళ్లే ప్రమాదం ఉందని విశ్లేషకులు హెచ్చరిస్తున్నారు.

 

 

 

[Asian Games 2026, Indian Tennis, Aichi Nagoya 2026, India Tennis Team, Sumit Nagal, Rohan Bopanna, AITA, Leander Paes, Mahesh Bhupathi, Sania Mirza]