టెక్ దిగ్గజం ఆపిల్ సంస్థ మరోమారు ఉద్యోగుల కోతలో కొత్త పుంతలు తొక్కుతోంది. రెండు నెలల వ్యవధిలో యాపిల్ తన సంస్థ నుంచి రెండు సార్లు పెద్ద సంఖ్యలో ఉద్యోగులకు ఉద్వాసన పలికింది.  ప్రస్తుత ఆర్థిక పరిస్థితులు, సంస్థాగత మార్పుల నేపథ్యంలో ఈ రిట్రెంచ్ మెంట్ ర్యాలీకి యాపిల్ శ్రీకారం చుట్టినట్లు మార్కెట్ నిపుణులు విశ్లేషిస్తున్నారు. గ్లోబల్ మార్కెట్‌లో టెక్ కంపెనీలు వ్యయ నియంత్రణే లక్ష్యంగా ఉద్యోగులకు ఉద్వాసన పలుకుతున్న సంగతి తెలిసిందే. ఆ జాబితాలోకి ఆపిల్ కూడా చేరింది.   తాజా పరిణామాల ప్రకారం.. ఆపిల్ సంస్థకు చెందిన ప్రముఖ  ఫిట్‌నెస్ ప్లస్ సేవ విభాగంలో  ఉద్యోగులను తొలగించింది. ముఖ్యంగా ఈ సేవలకు సంబంధించిన ఆడియో ప్రొడక్షన్ విభాగాన్ని నిర్వహిస్తున్న సిబ్బందిపై ఉద్వాసన వేటు వేసింది . ఆపిల్ వాచ్ వినియోగదారులను దృష్టిలో ఉంచుకుని రూపొందించిన  టైమ్ టూ వాక్,  టైమ్ టూ రన్వంటి ప్రత్యేక ఆడియో ఫీచర్లపై పని చేస్తున్న కొందరిని విధుల నుంచి తప్పించినట్లు  తెలుస్తోంది.   

అయితే ఈ సేవలను పూర్తిగా నిలిపివేయడం లేదనీ.. కేవలం కొత్త ఆడియో కంటెంట్ విడుదల వేగాన్ని  తగ్గించే యోచనలో ఆపిల్ యాజమాన్యం ఉందని తెలుస్తోంది.  ఆపిల్ వాచ్ యూజర్లకు గైడెడ్ వర్కౌట్ కంటెంట్‌ను అందించడంలో ఈ సబ్‌స్క్రిప్షన్ ఆధారిత ఫిట్‌నెస్ సర్వీస్ కీలక పాత్ర పోషిస్తోంది. ఇతర పోటీ సంస్థల సేవలతో పోలిస్తే దీని నిర్వహణ వ్యయం భారీగా ఉండటంతో, వ్యయ నియంత్రణే లక్ష్యంగా యాపిల్ ఈ ఉద్యోగాల కోత చేపట్టిందని అంటున్నారు.    

రెండు నెలల కిందటే..  ఆపిల్ సంస్థ సిరి, విజన్ ప్రో , ఏఐ సంబంధిత సాఫ్ట్‌వేర్ ఇంజనీరింగ్ విభాగాల నుంచి   200 మందికి పైగా ఉద్యోగులను తొలగించిన విషయం తెలిసిందే. ఆ సమయంలో సంస్థ తన ప్రాధాన్యతలను మార్చుకుంటోందని, వినియోగదారులకు మరింత మెరుగైన అనుభూతిని పంచేందుకు తగినట్లుగా అంతర్గత బృందాలను నర్వ్యవస్థీకరిస్తున్నామని పేర్కొంది.  మళ్లీ ఇప్పుడు మళ్లీ ఫిట్‌నెస్ విభాగంలో ఉద్యోగులకు ఉద్వాసన పలకడం టెక్ సర్కిళ్లలో హాట్ టాపిక్ గా మారింది.  

[Apple Layoffs, Apple Fitness Plus, Tech News Telugu, Apple Job Cuts, Telugu One]