ఆంధ్రప్రదేశ్ రాష్ట్రంలో పేదల సొంతింటి కలను నెరవేర్చేందుకు సంకీర్ణ ప్రభుత్వం మరో భారీ విప్లవాత్మక అడుగు ముందుకేసింది. గృహనిర్మాణ రంగాన్ని ఆధునిక పరిజ్ఞానంతో వేగవంతమైన పురోగతి వైపు తీసుకెళ్తూ, రాష్ట్రవ్యాప్తంగా లక్షలాది నిరుపేద కుటుంబాల జీవితాల్లో కొత్త వెలుగులు నింపేందుకు సిద్ధమైంది. గుంటూరు జిల్లా తెనాలి శాసనసభ నియోజకవర్గ పరిధిలోని బుర్రిపాలెం గ్రామంలో ఏకంగా 3 లక్షల కొత్త ఇళ్ల నిర్మాణ ప్రాజెక్టుకు ముఖ్యమంత్రి ఎన్. చంద్రబాబు నాయుడు, కేంద్ర గ్రామీణాభివృద్ధి శాఖ మంత్రి శివరాజ్ సింగ్ చౌహాన్‌తో కలిసి ఘనంగా శంకుస్థాపన నిర్వహించారు. ఈ భారీ గృహనిర్మాణ ప్రాజెక్టు అంచనా వ్యయం సుమారు రూ. 3,600 కోట్లుగా ఉండటం విశేషం. రాష్ట్రంలో ఇళ్ల కొరతను శాశ్వతంగా నివారించడమే కాకుండా, నిర్మాణ రంగంలో సాంకేతిక విప్లవాన్ని తీసుకరావడానికి ఇది ఒక కీలక మైలురాయిగా నిలవనుంది.

గత రెండేళ్ల కాలంలోనే ప్రభుత్వం నిర్ణీత లక్ష్యాలకు అనుగుణంగా 5.50 లక్షల ఇళ్లను లబ్ధిదారులకు విజయవంతంగా అందజేసి తన సంకల్పాన్ని చాటుకుంది. ఇందులో భాగంగా గత ఏడాది నవంబర్ నెలలో మొదటి విడత కింద 3 లక్షల ఇళ్లకు, ఈ ఏడాది మార్చి నెలలో రెండవ విడత కింద మరో 2.50 లక్షల ఇళ్లకు వైభవంగా సామూహిక గృహప్రవేశ వేడుకలను నిర్వహించింది. ఇక్కడితో ఆగిపోకుండా, రాబోయే మార్చి నాటికి మరో 4.20 లక్షల ఇళ్ల నిర్మాణాన్ని పూర్తి చేసి, లబ్ధిదారులకు ఇంటి తాళాలు అప్పగించే దిశగా పనులను తీవ్ర వేగంతో ముందుకు తీసుకెళ్తోంది. ప్రధాన మంత్రి ఆవాస్ యోజన-గ్రామీణ్ (PMAY-G) 2.0 పథకం కింద రాష్ట్రానికి పెద్ద ఎత్తున ఇళ్లను సాధించేందుకు ప్రభుత్వం కేంద్రంతో నిరంతరం సంప్రదింపులు జరిపింది. ఈ ప్రయత్నాల ఫలితంగానే కేంద్ర ప్రభుత్వం ఆంధ్రప్రదేశ్ రాష్ట్రానికి అదనంగా 3 లక్షల ఇళ్లను కేటాయించి కొండంత అండగా నిలిచింది.

ఈ ప్రాజెక్టులో మరొక విప్లవాత్మకమైన అంశం '3డీ కాంక్రీట్ ప్రింటింగ్ టెక్నాలజీ'. కేంద్ర గ్రామీణాభివృద్ధి మంత్రిత్వ శాఖ, సీఎస్ఐఆర్-సీబీఆర్ఐ (రూర్‌కీ), ఆంధ్రప్రదేశ్ ప్రభుత్వం సంయుక్తంగా భారతదేశంలోనే తొలిసారిగా ఈ అత్యాధునిక పైలట్ ప్రాజెక్టును అమలు చేస్తున్నాయి. దీని ద్వారా తెనాలి నియోజకవర్గంలోని బుర్రిపాలెం, ఓబులనాయుడుపాలెం గ్రామాలలో సుమారు రూ. 14 కోట్ల అంచనా వ్యయంతో 177 ఇళ్లను నిర్మించనున్నారు. సాంప్రదాయ నిర్మాణ పద్ధతులతో పోలిస్తే ఈ 3డీ ప్రింటింగ్ టెక్నాలజీ ద్వారా అత్యంత వేగంగా, నాణ్యమైన ఇళ్లను నిర్మించడమే కాకుండా నిర్మాణ వ్యర్థాలను, మానవ శ్రమ అవసరాలను గణనీయంగా తగ్గించవచ్చు. ఈ ఇళ్ల లేఅవుట్లలో విద్యుత్, తాగునీరు, డ్రైనేజీ మరియు బీటీ రహదారుల వంటి ప్రాథమిక మౌలిక సదుపాయాలను ప్రభుత్వం అత్యంత ప్రాధాన్యతతో కల్పిస్తోంది. ప్రతి పేద కుటుంబానికి సురక్షితమైన, స్థిరమైన మరియు ఆధునిక సదుపాయాలు కలిగిన నివాసాన్ని అందించడమే ధ్యేయంగా కేంద్ర-రాష్ట్ర ప్రభుత్వాలు ఒకటై అడుగులు వేస్తున్నాయి.

 

 

 

[Andhra Pradesh Housing, Chandrababu Naidu, Shivraj Singh Chouhan, Tenali, Burripalem, PMAY-G 2.0, 3 Lakh Houses, 3D Concrete Printing, CSIR-CBRI Roorkee, AP Government]