ఆంధ్రప్రదేశ్ ప్రభుత్వం వయో వృద్ధ పెన్షనర్లకు గుడ్ న్యూస్ చెప్పింది.  ఏడు పదుల వయస్సు పైబడిన సీనియర్ సిటిజన్లకు మరింత ఆర్థిక భద్రత కల్పించే ఉద్దేశంతో కీలక నిర్ణయం తీసుకుంది. వయసు ఆధారంగా అందించే అదనపు పింఛన్ శాతాన్ని పెంచుతూ ఏపీ సర్కార్ ఉత్తర్వులు జారీ చేసింది.  ఈ తాజా నిర్ణయం  రాష్ట్రవ్యాప్తంగా ఉన్న వేలాది మంది వృద్ధ పెన్షనర్లకు  ఆర్థిక ప్రయోజనం చేకూర్చనుంది.  వయసు పెరుగుతున్న కొద్దీ వైద్య ఖర్చులు, ఇతర అవసరాలు పెరుగుతున్న నేపథ్యంలో ప్రభుత్వ ప్రకటించిన ఈ అదనపు పింఛన్ వారికి ఎంతో ఉపయుక్తంగా ఉంటుందనడంలో సందేహం లేదు. 

ప్రభుత్వం తీసుకున్న ఈ నిర్ణయం ప్రకారం.. ఇప్పటివరకు అమల్లో ఉన్న అదనపు పింఛన్ విధానాన్ని సవరించారు. గతంలో 70 సంవత్సరాలు నిండిన పెన్షనర్లకు ఇస్తున్న అదనపు పింఛన్‌ శాతాన్ని 7 శాతం నుంచి   10 శాతానికి పెంచారు. అలాగే, 75 సంవత్సరాలు దాటిన సీనియర్ సిటిజన్ల కోసం అందించే అదనపు పింఛన్‌ను గతంలో ఉన్న 12 శాతం నుంచి 15 శాతానికి పెంచుతూ  ఏపీ సర్కార్ ఉత్తర్వులు జారీ చేసింది.  

ఈ పెంపునకు సంబంధించిన ఆర్థిక ప్రయోజనాలు డిసెంబర్ నుంచి అమలులోకి రానున్నాయి. ప్రభుత్వం విడుదల చేసిన మార్గదర్శకాల ప్రకారం, ఈ పెరిగిన అదనపు పింఛన్ డిసెంబర్ నెల నుంచి అమల్లోకి వస్తుంది. దీనికి సంబంధించిన పూర్తి లబ్ధిని జనవరి మొదటి తేదీ నుంచి పెన్షనర్ల ఖాతాల్లో జమ చేయనున్నారు. ఈ నిర్ణయం వల్ల వృద్ధులకు ఆర్థికంగా తోడ్పాటు లభిస్తుందని, వారి దైనందిన అవసరాలను తీర్చుకోవడానికి ఇది చక్కగా ఉపయోగపడుతుందని ప్రభుత్వం చెబుతోంది.  

ప్రభుత్వం తీసుకున్న ఈ  నిర్ణయాన్ని రిటైర్డ్ ఉద్యోగులు,  పెన్షనర్లు స్వాగతిస్తూ హర్షం వ్యక్తం చేస్తున్నారు. జీవిత చరమాంకంలో వయసు రీత్యా వచ్చే అనారోగ్య సమస్యలను ఎదుర్కొనేందుకు ఈ అదనపు ఆర్థిక సహాయం ఎంతగానో ఉపకరిస్తుందని వారంటున్నారు.  గత కొంతకాలంగా వృద్ధాప్య పింఛన్ల క్రమబద్ధీకరణపై  ప్రత్యేక దృష్టి సారించిన ఏపీ సర్కార్.. అర్హులైన ప్రతి ఒక్కరికీ సకాలంలో పింఛన్లు అందేలా చర్యలు తీసుకోవడంతో పాటు, కాలానికి తగుట్టుగా ప్రయోజనాలను సవరిస్తూ వస్తోంది. ఇందులో భాగంగానే సీనియర్ సిటిజన్ల వయసు కేటగిరీలను పరిగణలోకి తీసుకుని ఈ అదనపు మొత్తాన్ని పెంచడం జరిగిందని అధికార వర్గాలు వెల్లడించాయి.

[AP Government Pension Increase, Additional Pension AP, Elderly Pensioners AP, AP News Telugu, Pension Hike, Telugu One]