విశ్రాంత ఐపీఎస్ అధికారి  బాలసుబ్రహ్మణ్యం మృతి పట్ల ఆంధ్రప్రదేశ్ ముఖ్యమంత్రి నారా చంద్రబాబు నాయుడు తీవ్ర దిగ్భ్రాంతి, ఆవేదన వ్యక్తం చేశారు. స్వర్గస్థులైన బాలసుబ్రహ్మణ్యం పార్థివదేహాన్ని ముఖ్యమంత్రి సందర్శించి పూలమాలలు వేసి అశ్రునయనాలతో ఘన నివాళు లర్పించారు. అనంతరం ఆయన కుటుంబ సభ్యులను పరామర్శించి, తమ ప్రగాఢ సానుభూతిని తెలియజేశారు. ఈ సందర్భంగా చంద్రబాబు మాట్లాడుతూ, పోలీసు విభాగానికి వన్నె తెచ్చిన ఒక దక్షత కలిగిన అధికారిని కోల్పోవడం సమాజానికి, రాష్ట్రానికి తీరని లోటని వ్యాఖ్యానించారు.

ఉద్యోగ విరమణ పొందిన కేవలం రెండు నెలల వ్యవధిలోనే ఆయన చికిత్స పొందుతూ కన్నుమూయడం అత్యంత విచారకరమన్న చంద్రబాబు. క్యాన్సర్ వ్యాధితో బాధపడుతున్నప్పటికీ బాలసుబ్రహ్మణ్యం ధైర్యంతో పెద్ద యుద్ధమే చేశారన్నారు. ప్రాణాంతక వ్యాధికి చికిత్స పొందుతున్న సమయంలో కూడా ఆయన ధైర్యాన్ని సడలనివ్వకుండా తమ అధికార బాధ్యతలను ఎంతో సమర్ధవంతంగా, నిబద్ధతతో నిర్వహించారని కొనియాడారు. రాష్ట్ర విభజన జరిగిన సమయంలో నెలకొన్న పరిస్థితులు, ఎదురైన సవాళ్లను చూసి ఆయన ఎంతగానో బాధపడ్డారని గుర్తు చేసుకున్న చంద్రబాబు,    మూడు దశాబ్దాల పాటు ఉమ్మడి ఆంధ్రప్రదేశ్ తో పాటు నవ్యాంధ్రలో పోలీసు శాఖలో వివిధ హోదాల్లో బాలసుబ్రహ్మణ్యం అందించిన సేవలు చిరస్మరణీయమన్నారు. ఉమ్మడి రాష్ట్రంలో సమస్యాత్మక ప్రాంతమైన జగిత్యాలలో ఎస్పీగా బాధ్యతలు చేపట్టి శాంతిభద్రతల పరిరక్షణలో కీలక పాత్ర పోషించారనీ,  ఆర్టీసీ మేనేజింగ్ డైరెక్టర్, ఆ సంస్థను సమర్థవంతమైన బాటలో నడిపించడంలో తన మార్కు పరిపాలనను చూపించారని చంద్రబాబు కొనియాడారు. 

పోలీసు శాఖలో సాంకేతిక పరిజ్ఞానాన్ని ఉపయోగించడంపై బాలసుబ్రహ్మణ్యానికి ప్రత్యేక శ్రద్ధ ఉండేదని, ఈ క్రమంలోనే విభాగానికి విప్లవాత్మక మార్పులను పరిచయం చేశారని చెప్పరు. ప్రగతిశీల వ్యవస్థలను అమల్లోకి తెచ్చి, సాంకేతికత ఆధారిత పోలీసింగ్‌కు బాలసుబ్రహ్మణ్యం ఆద్యుడిగా నిలిచారని ప్రశంసించారు. తను పనిచేసిన ప్రతి విభాగంలోనూ తనదైన ముద్ర వేస్తూ అనేక సంస్కరణలు తీసుకొచ్చిన ఘనత ఆయనకే దక్కుతుందన్నారు. ఎల్లప్పుడూ ప్రజాహితం కోసమే శ్రమించిన నిష్పాక్షిక అధికారిగా నిలిచారన్నారు.

  శాంతిభద్రతల పరిరక్షణ, పరిపాలనా సంస్కరణల అమలులోనూ బాలసుబ్రహ్మణ్యం చూపిన మార్గదర్శకత్వం ఎందరో యువ అధికారులకు స్పూర్తిదాయకంగా నిలుస్తుందన్నారు.  దివంగత ఐపీఎస్ అధికారి బాలసుబ్రహ్మణ్యం ఆత్మకు శాంతి చేకూరాలని ఆ భగవంతుడిని ప్రార్థిస్తున్నట్లు ముఖ్యమంత్రి చంద్రబాబు తెలిపారు.  

[AP CM Chandrababu Tribute Balasubrahmanyam, Ex IPS Balasubrahmanyam, Andhra Pradesh, Telugu One]