కొండల్లో క్వారీ లీజులు రద్దు చేసిన ప్రభుత్వం.. హర్షం వ్యక్తం చేస్తున్న పర్యావరణవేత్తలు..!

ఆంధ్రప్రదేశ్ లోని ప్రముఖ ఆధ్యాత్మిక, చారిత్రక ధామమైన అనకాపల్లి జిల్లాలోని పంచదార్ల కొండల పరిరక్షణ దిశగా రాష్ట్ర ప్రభుత్వం ఒక సంచలనాత్మక నిర్ణయం తీసుకుంది. పర్యావరణ పరిరక్షణతో పాటు స్థానిక సాంస్కృతిక వైభవాన్ని కాపాడేందుకు పంచదార్ల కొండల ప్రాంతాన్ని అధికారికంగా ‘నో మైనింగ్ జోన్’గా ప్రకటించింది.

ఈ నిర్ణయంతో సదరు కొండల పరిసర ప్రాంతాలలో ఎలాంటి తవ్వకాలు, క్వారీయింగ్ పనులకు తావులేకుండా పూర్తి స్థాయిలో నిషేధం అమలులోకి వచ్చింది. ఈ మేరకు కూటమి ప్రభుత్వం ప్రత్యేక ఉత్తర్వులు జారీ చేసింది.

పంచదార్ల కొండల్లో కొన్నేళ్లుగా సాగుతున్న క్వారీ తవ్వకాల వల్ల అక్కడి సహజసిద్ధ జీవవైవిధ్యానికి తీవ్ర నష్టం వాటిల్లుతోందని స్థానికులు ఆందోళన వ్యక్తం చేస్తున్నారు. ముఖ్యంగా ప్రాచీన పుణ్యక్షేత్రమైన శ్రీ ఉమా ధర్మలింగేశ్వర స్వామి దేవాలయ ప్రాంగణంతో పాటు సహజంగా ప్రవహించే పుణ్యతీర్థ జలధారలు దెబ్బతినే ప్రమాదం ఏర్పడిందని ఫిర్యాదులు వెల్లువెత్తాయి.

ఈ వినతులపై తక్షణమే స్పందించిన ప్రభుత్వం ఉన్నతాధికారుల ఆధ్వర్యంలో సమగ్ర విచారణకు ఆదేశించింది. అధికారుల పరిశీలనలో మైనింగ్ కార్యకలాపాల వల్ల చారిత్రక నిర్మాణాలకు, పర్యావరణ సమతుల్యతకు పెద్ద ఎత్తున విఘాతం కలుగుతోందని స్పష్టమైంది.

దీంతో తక్షణ చర్యల్లో భాగంగా గతంలో కేటాయించిన దాదాపు 2.153 హెక్టార్ల క్వారీ లీజు అనుమతులను ప్రభుత్వం రద్దు చేస్తూ కఠిన నిర్ణయం తీసుకుంది. ప్రాచీన సంపదను, ప్రకృతి సమతుల్యతను కాపాడటమే తమ ప్రాధాన్యత అని స్పష్టం చేసింది.

ప్రభుత్వం తీసుకున్న ఈ చారిత్రాత్మక నిర్ణయం పట్ల స్థానిక భక్తులు, పర్యావరణ ప్రేమికులు తీవ్ర హర్షం వ్యక్తం చేస్తున్నారు. శ్రీ ఉమా ధర్మలింగేశ్వర స్వామి ఆలయ భద్రతకు, పంచదార్ల కొండల సహజ సౌందర్యానికి ఊరట లభించిందని వారు కొనియాడారు.

ముందుముందు కూడా ఇలాంటి ఆధ్యాత్మిక ప్రాంతాలలో అక్రమ తవ్వకాలపై ప్రభుత్వం కఠినంగా వ్యవహరిస్తుందని, ఈ నిబంధనలు కచ్చితంగా అమలు జరిగేలా యంత్రాంగం నిరంతరం పర్యవేక్షిస్తుందని భావిస్తున్నారు.

 

Anakapalli Panchadarla Hills, AP Government No Mining Zone, Sri Uma Dharmalingeswara Swamy Temple, Anakapalli Mining Prohibition, AP Environment News,Telugug News, Telugu One