కార్పొరేట్ ప్రపంచంలో కృత్రిమ మేధస్సు (AI) తెస్తున్న మార్పులు రోజురోజుకూ వేగవంతమవుతున్నాయి. కేవలం సహాయక సాధనంగా మాత్రమే కాకుండా, ఏకంగా ఉద్యోగులను నిర్వహించే 'బాస్' పాత్రలోకి AI వస్తే ఎలా ఉంటుంది అనే ఆలోచన ఇప్పుడు ప్రపంచవ్యాప్తంగా తీవ్ర చర్చనీయాంశమవుతోంది. యుకేకు చెందిన కేరియర్‌మైండ్స్ నిర్వహించిన ఒక విస్తృత అధ్యయనంలో వెల్లడైన గణాంకాలు ఐటీ, కార్పొరేట్ వర్గాలను ఆశ్చర్యానికి గురిచేస్తున్నాయి. సర్వేలో పాల్గొన్న ఉద్యోగులలో దాదాపు మూడో వంతు అంటే 36.7 శాతం మంది ఉద్యోగులు ఒక హ్యూమన్ మేనేజర్ కంటే AI బాస్ లేదా కృత్రిమ మేధ పర్యవేక్షణలో పనిచేస్తే తమ పని సామర్థ్యం, ఉత్పాదకత చాలా మెరుగ్గా ఉంటుందని బలంగా విశ్వసిస్తున్నారు. మరోవైపు కేవలం 25.5 శాతం మంది మాత్రమే AI మేనేజర్ వల్ల ఉత్పాదకత తగ్గుతుందని భావించారు.

సి-సూట్ మరియు డైరెక్టర్ స్థాయిలో ఉన్న టాప్ ఎగ్జిక్యూటివ్‌లు AI మేనేజ్‌మెంట్ పట్ల మరింత సానుకూల దృక్పథంతో ఉన్నారు. దాదాపు 64 శాతం మంది బోర్డ్ డైరెక్టర్లు తమ సంస్థలలో AI బాస్‌ల నియామకం ద్వారా ప్రొడక్టివిటీ ఊహించని రీతిలో పెరుగుతుందని అంచనా వేస్తుండగా, అందులో 28 శాతం మంది తీవ్రమైన అభివృద్ధి ఉంటుందని అభిప్రాయపడ్డారు. అలాగే సీనియర్ స్టాఫ్ సభ్యులలో 42.6 శాతం మంది ఇదే రకమైన అభిప్రాయాన్ని వ్యక్తం చేశారు. అయితే, మిడిల్ మేనేజర్ల పరిస్థితి ఇందుకు పూర్తి భిన్నంగా ఉంది. సంస్థలలో మధ్యస్థాయి మేనేజర్లుగా పనిచేస్తున్న వారిలో దాదాపు 38.5 శాతం మంది AI వల్ల ఎలాంటి ఉత్పాదకత పెరుగుదల ఉండదని ఖరాకండిగా చెప్తున్నారు. AI తమ ఉద్యోగ భద్రతకు ఎక్కడ ఎసరు పెడుతుందో అనే ఆందోళన వారిలో స్పష్టంగా కనిపిస్తోంది.

అయితే ఇక్కడో ఆసక్తికరమైన మానసిక వైరుధ్యం దాగి ఉంది. AI బాస్ వల్ల పని వేగం పెరుగుతుందని 36.7 శాతం మంది భావించినప్పటికీ, అత్యధికంగా 74.2 శాతం మంది ఉద్యోగులు తమ పనితీరుపై సమీక్షలు లేదా ఫీడ్‌బ్యాక్ తీసుకునే సమయంలో మాత్రం చాట్‌బాట్‌ల కంటే మనుషులైన మేనేజర్లతోనే నేరుగా మాట్లాడటానికి మొగ్గు చూపుతున్నారు. పనితీరు అంచనా, ప్రమోషన్లు, మరియు వ్యక్తిగత సమస్యల పరిష్కారంలో మనుషుల్లో ఉండే భావోద్వేగ అవగాహన, మానవతా దృక్పథం AI కి సాధ్యం కాదని మెజారిటీ ఉద్యోగులు నమ్ముతున్నారు. ముఖ్యంగా తమ కెరీర్ ప్రారంభంలో ఉన్న యువ ఉద్యోగులు తమకు రోజువారీ పనులలో మార్గదర్శకత్వం, మానసిక ధైర్యం అందించడానికి మానవ మేనేజర్లే సరైనవారని కోరుకుంటున్నారు. AI సాంకేతికత పని ఒత్తిడిని తగ్గించడానికి మాత్రమే ఉపయోగపడాలని, మనుషులను పూర్తిగా రీప్లేస్ చేయడానికి కాదని నిపుణులు స్పష్టం చేస్తున్నారు.

 

 

 

will ai replace middle managers,ai manager vs human boss study.