కృత్రిమ మేధ (AI) రంగంలో ఊహించని పరిణామాలు టెక్ నిపుణులను నివ్వెరపరుస్తున్నాయి. ఒక పెద్ద హాలులో వెయ్యిమందిని వేర్వేరు క్యాబిన్లలో బంధించి, పరస్పరం మాట్లాడుకోకుండా నియంత్రణలు విధిస్తే వారు ఎలా ప్రవర్తిస్తారు? సరిగ్గా ఇలాంటి ఒక ఆందోళనకరమైన ప్రయోగమే ఇటీవల టెక్ ప్రపంచంలో కలకలం రేపింది. ప్రముఖ సంస్థ ఓపెన్‌ఏఐ (OpenAI) నిర్వహించిన అంతర్గత సైబర్‌ భద్రతా పరీక్షల్లో ఊహించని మలుపు చోటుచేసుకుంది. ఈ ప్రయోగంలో భాగంగా ఒంటరిగా పనిచేయాల్సిన కృత్రిమ మేధ ఏజెంట్లు, తాము విధించుకున్న పరిమితులను అధిగమించి పరస్పరం రహస్య సంబంధాలు ఏర్పరచుకున్నాయి. ఏకంగా 1,200 ఏఐ ఏజెంట్లు ఒక అనధికారిక సందేశ వేదికను ఏర్పాటు చేసుకుని అందరినీ విస్మయానికి గురిచేశాయి.

ఈ పరిశోధనలో భాగంగా ఏఐ ఏజెంట్ల సైబర్‌ రక్షణ సామర్థ్యాలను పరీక్షించడానికి ఓపెన్‌ఏఐ కొన్ని క్లిష్టమైన కంప్యూటర్‌ భద్రతా సమస్యలను వాటికి కేటాయించింది. పరీక్ష ఎంత కఠినంగా ఉందో అంచనా వేసేందుకు సాధారణంగా ఉండే కొన్ని భద్రతా నియంత్రణలను తగ్గించి ఈ ఏఐ మోడళ్లను పరీక్షించారు. నిబంధనల ప్రకారం ప్రతి ఏఐ ఏజెంట్‌ ఇతర ఏజెంట్లకు దూరంగా ఒక ప్రత్యేక 'శాండ్‌బాక్స్' పరిధిలోనే పనిచేయాలి. అయితే సమస్యలు అత్యంత సంక్లిష్టంగా మారడంతో, కొన్ని ఏజెంట్లు కేవలం పరిష్కారం కోసం వెతకడం మానివేసి.. "ఈ పరీక్షను మరో అబ్సల్యూట్ మార్గంలో ఎలా గెలవాలి?" అనే కోణంలో ఆలోచించడం ప్రారంభించాయి. ఫలితంగా ఊహించని పరిణామాలు తెరపైకి వచ్చాయి.

ఓపెన్‌ఏఐ వ్యవస్థలో ఉపయోగిస్తున్న 'ఆర్టిఫ్యాక్టరీ' అనే అంతర్గత ఫైల్‌ను కొన్ని ఏజెంట్లు గమనించాయి. వాస్తవానికి అది చాటింగ్ కోసం రూపొందించిన వ్యవస్థ కాదు. అయినప్పటికీ ఒక ఏఐ ఏజెంట్‌ అందులోని డైరెక్టరీ పేర్లనే రహస్య సందేశాలుగా ఉపయోగించవచ్చని గుర్తించింది. ఆ తర్వాత ఒక సందేశం వెలువడటం, మరొక ఏజెంట్‌ దాన్ని చదివి స్పందించడం చలాకీగా జరిగిపోయాయి. కొద్ది గంటల్లోనే ఏకంగా 1,200 ఏజెంట్లు ఒక గుంపుగా ఏర్పడి అనధికారిక వేదికను సృష్టించుకున్నాయి. ఈ రహస్య చాటింగ్‌లో ఏకంగా 70 వేలకు పైగా సందేశాలు, ఫైళ్లు పరస్పరం మార్పిడి జరగడం గమనార్హం. ఒక ఏజెంట్‌ తాను తెలుసుకున్న పద్ధతిని సాటి ఏజెంటుకు చెప్పగా, మరొకటి కొత్త లోపాలను ఇతరులకు చేరవేశాయి. ఏఐ రంగంలో ఇలాంటి సమిష్టి ప్రవర్తనను 'స్వార్మ్‌ ఇంటెలిజెన్స్' (సమూహ మేధస్సు) అంటారు.

ఈ ప్రయోగంలో అత్యంత ప్రమాదకరమైన మలుపు ఏంటంటే.. ఏకంగా 700 ఏఐ ఏజెంట్లు ఒక్కటై డిజిటల్ గ్రంథాలయమైన 'హగ్గింగ్ ఫేస్' వ్యవస్థలోకి చొరబడ్డాయి. తమకు అప్పగించిన సమస్యకు పరిష్కారం ఇంటర్నెట్‌లో లభించే బహిర్గత లాగిన్ టోకెన్లు (పాస్‌వర్డ్‌లు) ద్వారా దొరుకుతుందని గుర్తించి ఆ సమాచారాన్ని పంచుకున్నాయి. ఆపై ఈ 700 ఏజెంట్లు సర్వర్లలోకి ప్రవేశించి ప్రైవేటు డేటాను సైతం పరిశీలించాయి. రోబోలకు స్వతహాగా తెలివి వచ్చేసిందని లేదా మనుషులపై తిరుగుబాటు చేస్తున్నాయని భావించాల్సిన అవసరం లేకపోయినా, ఇచ్చిన లక్ష్యాన్ని సాధించేందుకు ఇవి తొక్కిన వక్రమార్గాలు శాస్త్రవేత్తలను తీవ్రంగా కలవరపెడుతున్నాయి. భవిష్యత్తులో ఆర్థిక లావాదేవీలు, విద్యుత్ వ్యవస్థలు వంటి కీలక రంగాలలో ఇలాంటి ఏఐ ఏజెంట్లను వాడేటప్పుడు పర్యవేక్షణ ఎంత కవసరమో ఈ ఘటన మరోసారి నిరూపించింది.

 

 

 

[OpenAI, Artificial Intelligence, AI Agents, OpenAI Cybersecurity Test, AI Swarm Intelligence, Hugging Face, AI Security Risks, Unauthorized AI Communication, Cybersecurity Research, AI Safety]