బీహార్‌లో పుట్టి.. జపాన్‌ తరఫున క్రికెట్‌.. ఎవరీ అభిషేక్‌ ఆనంద్‌..?

క్రికెట్‌.. భారత్‌లో ఇది కేవలం ఒక ఆట మాత్రమే కాదు.. కోట్లాది మంది అభిమానులకు ఒక ఎమోషన్‌. దేశంలోనే కాదు.. విదేశాల్లో స్థిరపడిన భారతీయులు కూడా క్రికెట్‌తో తమ అనుబంధాన్ని కొనసాగిస్తుంటారు. అలాంటి వారిలో బీహార్‌కు చెందిన అభిషేక్‌ ఆనంద్‌ ఒకరు. రోహ్తాస్‌ నుంచి ఐఐటీ కాన్పూర్‌.. అక్కడి నుంచి జపాన్‌.. చివరకు జపాన్‌ జాతీయ క్రికెట్‌ జట్టు వరకు ఆయన ప్రయాణం సాగింది.

ప్రస్తుతం భారత్‌, జపాన్‌ జట్లు సెప్టెంబర్‌ 22న తొచిగీ ప్రిఫెక్చర్‌లోని సానో ఇంటర్నేషనల్‌ క్రికెట్‌ గ్రౌండ్‌లో తలపడనున్నాయి. ఈ నేపథ్యంలో అభిషేక్‌ ఆనంద్‌కు సంబంధించిన ఓ వీడియో సోషల్‌ మీడియాలో వైరల్‌గా మారింది. బీహార్‌కు చెందిన వ్యక్తిగా ఉండి జపాన్‌ తరఫున క్రికెట్‌ ఎందుకు ఆడుతున్నారని ప్రశ్నించగా.. ఆయన ఇచ్చిన సమాధానం నెటిజన్లను ఆకట్టుకుంటోంది. “బిహారీ ఎక్కడ లేడు భాయ్‌” అంటూ అభిషేక్‌ చెప్పిన మాటలు ప్రస్తుతం వైరల్‌గా మారాయి.

అయితే భారత్‌తో జరగనున్న ఈ మ్యాచ్‌లో అభిషేక్‌ ఆనంద్‌ మైదానంలో కనిపించే అవకాశం లేదు. ఈ మ్యాచ్‌ కోసం జపాన్‌ ప్రకటించిన 15 మంది సభ్యుల జట్టులో ఆయనకు చోటు దక్కలేదు. దీంతో భారత అభిమానులు అభిషేక్‌ను భారత్‌పై ఆడుతుండగా చూసే అవకాశం లేకుండా పోయింది. అభిషేక్‌కు జపాన్‌ వెళ్లిన తర్వాతే క్రికెట్‌పై ఆసక్తి ఏర్పడలేదు. ఐఐటీ కాన్పూర్‌లో కెమిస్ట్రీ చదువుతున్న సమయంలోనే ఆయన క్రికెట్‌ ఆడేవారు. అంతేకాదు.. అక్కడి క్రికెట్‌ జట్టుకు కెప్టెన్‌గానూ వ్యవహరించారు. చదువు పూర్తయిన తర్వాత ఉద్యోగం కోసం టోక్యో వెళ్లిన అభిషేక్‌.. అక్కడ కూడా క్రికెట్‌ను కొనసాగించారు. ఉద్యోగ బాధ్యతలను నిర్వర్తిస్తూనే క్లబ్‌ క్రికెట్‌ ఆడారు.స్థానిక క్రికెట్‌లో ఆయన చూపిన ప్రతిభతో జపాన్‌ జాతీయ జట్టులో చోటు సంపాదించారు. ఉద్యోగం, క్రికెట్‌.. రెండింటినీ సమన్వయం చేసుకుంటూ ముందుకు సాగిన అభిషేక్‌.. చివరకు అంతర్జాతీయ క్రికెటర్‌గా ఎదిగారు.

28 ఏళ్ల అభిషేక్‌ ఆనంద్‌ 2025 మే 9న కుక్‌ ఐలాండ్స్‌తో జరిగిన మ్యాచ్‌ ద్వారా జపాన్‌ తరఫున టీ20 అంతర్జాతీయ క్రికెట్‌లో అరంగేట్రం చేశారు. ఆ తర్వాత జపాన్‌ జట్టులో రెగ్యులర్‌ సభ్యుడిగా కొనసాగుతున్నారు. ఇప్పటివరకు 18 టీ20 అంతర్జాతీయ మ్యాచ్‌లు ఆడిన ఆయన 275 పరుగులు చేశారు. ఇందులో అత్యధిక వ్యక్తిగత స్కోరు 55 పరుగులు. బౌలింగ్‌లో ఒక వికెట్‌ కూడా పడగొట్టారు. క్రికెట్‌ను పూర్తిస్థాయి కెరీర్‌గా ఎంచుకోకపోయినా.. ఉద్యోగం చేస్తూనే ఆటను కొనసాగించి జాతీయ జట్టులోకి చేరడం అభిషేక్‌ ఆనంద్‌ ప్రయాణాన్ని ప్రత్యేకంగా నిలిపింది.

భారత్‌, జపాన్‌ క్రికెట్‌ జట్లు తొలిసారి అంతర్జాతీయ మ్యాచ్‌లో తలపడనున్నాయి. భారత్‌-జపాన్‌ దౌత్య సంబంధాలు 75 సంవత్సరాలు పూర్తి చేసుకున్న సందర్భంగా ఈ మ్యాచ్‌ను నిర్వహిస్తున్నారు. ఆసియా క్రీడలకు ముందు ఇరు జట్లకు ఇది సన్నాహక మ్యాచ్‌గానూ ఉపయోగపడనుంది. భారత్‌పై జపాన్‌ తరఫున ఆడే అవకాశం అభిషేక్‌కు ఈసారి దక్కకపోయినా.. రోహ్తాస్‌ నుంచి జపాన్‌ జాతీయ జట్టు వరకు ఆయన సాగించిన ప్రయాణం మాత్రం క్రికెట్‌ అభిమానులను ఆకట్టుకుంటోంది.

 

 

[ Abhishek Anand, Japan Cricketer, Bihar Cricketer, Indian Origin Cricketer, Japan Cricket Team, India vs Japan, India Japan Cricket Match, Japan T20I, Abhishek Anand Viral Video, Bihari Cricketer, IIT Kanpur, Rohitās Bihar, Japan National Cricket Team, T20 International, Cricket News ]