న్యూచండీగఢ్ వేదికగా వెస్టిండీస్‌తో జరుగుతున్న మూడో వన్డేలో టీమిండియా భారీ స్కోరు సాధించింది. వికెట్లు వరుసగా పడుతున్న వేళ క్రీజులోకి వచ్చిన కేఎల్ రాహుల్ అద్భుతమైన శతకంతో చెలరేగడంతో.. భారత్ నిర్ణీత 50 ఓవర్లలో 7 వికెట్ల నష్టానికి 351 పరుగులు చేసింది. టాస్ ఓడి తొలుత బ్యాటింగ్‌కు దిగిన టీమిండియాకు ఆరంభంలోనే ఎదురుదెబ్బ తగిలింది. కెప్టెన్ శుభ్‌మన్ గిల్ ఒక్క పరుగుకే వెనుదిరగగా.. విరాట్ కోహ్లీ గోల్డెన్ డక్‌గా పెవిలియన్ చేరాడు. దీంతో భారత్ కేవలం 4 పరుగులకే రెండు కీలక వికెట్లు కోల్పోయింది.

ఈ దశలో రోహిత్ శర్మ, రుతురాజ్ గైక్వాడ్ ఇన్నింగ్స్‌ను చక్కదిద్దారు. ఇద్దరూ కలిసి మూడో వికెట్‌కు 137 పరుగుల కీలక భాగస్వామ్యాన్ని నెలకొల్పారు. రోహిత్ శర్మ 92 పరుగులతో సెంచరీకి 8 పరుగుల దూరంలో ఔటయ్యాడు. ఆ తర్వాత రుతురాజ్ గైక్వాడ్ 57 పరుగులతో అర్థసెంచరీ పూర్తి చేసి పెవిలియన్ చేరాడు.వికెట్లు పడుతున్నప్పటికీ కేఎల్ రాహుల్ మాత్రం ఏమాత్రం ఒత్తిడికి లోనుకాలేదు. లోయర్ ఆర్డర్ బ్యాటర్లతో కలిసి ఇన్నింగ్స్‌ను ముందుకు నడిపించాడు. మొదట ఆచితూచి ఆడిన రాహుల్.. క్రీజులో కుదురుకున్న తర్వాత బౌండరీలతో ప్రత్యర్థి బౌలర్లపై విరుచుకుపడ్డాడు.

కేవలం 80 బంతుల్లోనే సెంచరీ మార్క్‌ను అందుకున్న రాహుల్.. తన ఇన్నింగ్స్‌లో 10 ఫోర్లు, 6 సిక్సర్లు బాదాడు. చివరి వరకు అజేయంగా నిలిచిన రాహుల్ 87 బంతుల్లో 129 పరుగులు చేశాడు. ముఖ్యంగా చివరి ఓవర్‌లో రెండు సిక్సర్లు, ఒక ఫోర్ బాది టీమిండియా స్కోరును 350 పరుగుల మార్క్‌ను దాటించాడు.రాహుల్‌కు నమన్ ధీర్ కూడా చక్కటి సహకారం అందించాడు. హోంగ్రౌండ్‌లో ఆడుతున్న నమన్ ధీర్ 30 పరుగులతో ఆకట్టుకున్నాడు. వెస్టిండీస్ బౌలర్లలో జైడన్ సీల్స్ మూడు వికెట్లు తీయగా.. కీమో పాల్ రెండు వికెట్లు పడగొట్టాడు.ఆరంభంలోనే రెండు కీలక వికెట్లు కోల్పోయినప్పటికీ.. రోహిత్, రుతురాజ్ భాగస్వామ్యం, ఆ తర్వాత కేఎల్ రాహుల్ విధ్వంసకర బ్యాటింగ్‌తో టీమిండియా భారీ స్కోరు నమోదు చేసింది. 351 పరుగుల లక్ష్యాన్ని వెస్టిండీస్ ఎలా ఛేదిస్తుందనేది ఆసక్తికరంగా మారింది.

 

 

[ KL Rahul century, KL Rahul 129, India vs West Indies 3rd ODI, India 351 runs, Rohit Sharma 92, Ruturaj Gaikwad 57, Team India, cricket news, BCCI, ICCI,Telugu News, Telugu One ]