భారత అత్యంత ప్రజాదరణ పొందిన క్రికెట్ లీగ్ ఐపీఎల్‌కు సంబంధించి బోర్డు కీలక నిర్ణయం తీసుకుంది. ఐపీఎల్ 2027 సీజన్‌కు సంబంధించి ఆటగాళ్ల వేలం ప్రక్రియను స్వదేశంలోనే నిర్వహించాలని భారత క్రికెట్ నియంత్రణ మండలి (బీసీసీఐ) నిశ్చయించింది. గత కొన్ని సీజన్లుగా విదేశీ గడ్డపై జరుగుతూ వస్తున్న ఈ మెగా ఈవెంట్, ఈసారికల్లా మళ్లీ మన దేశానికే పరిమితం కానుంది. ఈ మేరకు బీసీసీఐ కార్యదర్శి దేవజిత్ సైకియా ఈ క్రీడా వేడుకకు సంబంధించిన వేదిక వివరాలను అధికారికంగా వెల్లడించారు.

వచ్చే డిసెంబర్ మధ్యలో ఐపీఎల్ 2027 మినీ వేలాన్ని అంగరంగ వైభవంగా నిర్వహించేందుకు ఏర్పాట్లు జరుగుతున్నాయి. ఇందుకు అందమైన పర్యాటక ప్రాంతమైన గోవాను వేదికగా బోర్డు ఖరారు చేసినట్లు సమాచారం.గత మూడు సంవత్సరాలుగా ఐపీఎల్ ఆక్షన్ ప్రక్రియ అంతా విదేశీ నగరాలకే పరిమితమైంది. దుబాయ్, జెడ్డా, అలాగే అబుదాబి వంటి విదేశీ గడ్డలపై ఫ్రాంచైజీల ఆటగాళ్ల కొనుగోలు ప్రక్రియ సాగింది.

అయితే, ఈసారి మాత్రం ఆ ట్రెండ్‌కు ఫుల్‌స్టాప్ పెడుతూ బీసీసీఐ తిరిగి మన దేశంలోనే నిర్వహించాలని నిర్ణయించడం విశేషం. ప్రతి ఏటా డిసెంబర్ నెలలో దేశంలో విపరీతమైన పెళ్లిళ్ల సీజన్ ఉండటం వల్ల తగిన హోటళ్లు, వసతి దొరకడం కష్టతరమయ్యేది.దీనివల్ల గతంలో భారత్‌లో వేలం నిర్వహించడం బోర్డుకు సవాలుగా మారింది. కానీ ఈసారి మినీ వేలం కావడంతో, తక్కువ సమయంలో ఏర్పాట్లు పూర్తి చేసుకునే వెసులుబాటు లభించింది.ఈ నిర్ణయంతో దేశీయ క్రికెట్ అభిమానులకు, ఫ్రాంచైజీ వర్గాలకు మళ్లీ సొంతగడ్డపై జరిగే ఆక్షన్ సందడి చూడటానికి అవకాశం దక్కనుంది. డిసెంబర్ 15 లేదా 16 తేదీల్లో ఈ వేలం జరిగే అవకాశాలున్నట్లు తెలుస్తోంది.

 

 

[ IPL 2027 auction venue, BCCI secretary Devajit Saikia, Goa IPL auction, IPL mini auction 2027, Indian Premier League updates ]