భారతదేశంలో టెలికాం రంగంలో సరికొత్త విప్లవానికి కేంద్ర ప్రభుత్వం వేదిక సిద్ధం చేస్తోంది. ఇంటర్నెట్ లేదా మొబైల్ డేటా సాయం లేకుండానే నేరుగా మొబైల్ ఫోన్లలోకి వీడియోలు, లైవ్ టీవీ ప్రసారాలను తీసుకువచ్చే 'డైరెక్ట్-టూ-మొబైల్' (D2M) టెక్నాలజీ అమలుపై కసరత్తు వేగవంతమైంది.సాధారణంగా ఎఫ్‌ఎం రేడియో ఎలా పనిచేస్తుందో, అదే పద్ధతిలో ప్రత్యేకమైన సిగ్నల్స్ ద్వారా నేరుగా స్మార్ట్‌ఫోన్ల స్క్రీన్‌పై ప్రసారాలను వీక్షించేలా ఈ టెక్నాలజీని రూపకల్పన చేస్తున్నారు. దీనివల్ల వినియోగదారులు ఎలాంటి ఇంటర్నెట్ ప్యాక్‌లు లేకపోయినా వినోదం, వార్తలను ఆస్వాదించవచ్చు.ఇటీవల కాలంలో టెజస్ నెట్‌వర్క్స్ వంటి సంస్థలు అభివృద్ధి చేసిన అత్యాధునిక పరికరాలతో నిర్వహించిన సాంకేతిక పరీక్షలు విజయవంతం కావడంతో, ప్రభుత్వం ఈ దిశగా తదుపరి చర్యలను ముమ్మరం చేసింది. దేశవ్యాప్తంగా ఈ సేవలను విస్తృత స్థాయిలో అందుబాటులోకి తెచ్చేందుకు త్వరలోనే కొన్ని నగరాల్లో ట్రయల్స్ నిర్వహించాలని ప్రణాళికలు రచిస్తున్నారు.

ప్రసార భారతికి చెందిన ఇప్పటికే ఉన్న డిజిటల్ టెరెస్ట్రియల్ ట్రాన్స్‌మిషన్ నెట్‌వర్క్‌ను ఇందుకు ఉపయోగించుకోవాలని భావిస్తున్నారు. ప్రసార రంగాన్ని మరింత బలోపేతం చేయడంతో పాటు, మొబైల్ డేటాపై పడుతున్న భారాన్ని తగ్గించడమే ఈ నూతన సాంకేతికత ప్రధాన ఉద్దేశం.ఈ టెక్నాలజీ అందుబాటులోకి వస్తే అత్యవసర సమయాల్లో ప్రభుత్వాల నుంచి వచ్చే హెచ్చరికలు, విపత్తుల సమాచారాన్ని ప్రజలకు వేగంగా చేరవేయడానికి ఎంతో వీలవుతుంది. టెలికాం నెట్‌వర్క్‌లు రద్దీగా ఉండే ప్రాంతాలలో కూడా ఎలాంటి అంతరాయం లేకుండా సమాచార ప్రసారం సాధ్యమవుతుంది.

అయితే, ఈ కొత్త విధానం అమలులో కొన్ని సవాళ్లు కూడా లేకపోలేదు. స్మార్ట్‌ఫోన్ తయారీదారులు ఈ టెక్నాలజీని సపోర్ట్ చేసే ప్రత్యేక చిప్‌సెట్లు, యాంటెన్నాలను ఫోన్లలో అమర్చాల్సి ఉంటుంది. దీనివల్ల పరికరాల తయారీ వ్యయం పెరిగే అవకాశం ఉందనే అభిప్రాయాలు వ్యక్తమవుతున్నాయి. మరోవైపు, టెలికాం ఆపరేటర్లు వీడియో స్ట్రీమింగ్ ద్వారా వచ్చే ఆదాయంపై ప్రభావం పడుతుందనే ఆందోళన వ్యక్తం చేస్తున్నప్పటికీ, ప్రభుత్వం మాత్రం స్పెక్ట్రమ్ వినియోగాన్ని మెరుగుపరచడమే లక్ష్యంగా ముందుకు సాగుతోంది. త్వరలోనే ఈ సేవలు సాకారమైతే దేశంలో మీడియా  కంటెంట్ వినియోగ సరళి పూర్తిగా మారిపోతుందని నిపుణులు అంచనా వేస్తున్నారు.

 

 

 

[ D2M technology India, Direct to Mobile broadcasting, Live TV without internet, Central Government tech initiatives, Prasar Bharati infrastructure, Telugu One, Telugu News ]