యునైటెడ్ కింగ్‌డమ్ రక్షణ వ్యవస్థ ప్రస్తుతం  ఆర్థిక ఒత్తిడిని ఎదుర్కొంటోంది. బ్రిటిష్ సైన్యంలో అత్యవసరం కాని సామూహిక శిక్షణలో కోతలు నమోదవడం ఇందుకు నిదర్శనమని పరిశీలకులు విశ్లేషిస్తున్నారు. బడ్జెట్ పరిమితుల కారణంగా సాయుధ దళాల ప్రత్యక్ష కాల్పుల శిక్షణతో పాటు, అపాచీ హెలికాప్టర్లకు సంబంధించిన కొన్ని ముఖ్యమైన విన్యాసాలను సైతం రద్దు చేయడం లేదా వాయిదా వేయడం జరిగిందని సమాచారం.  మోహరింపునకు పూర్తిగా సిద్ధమవుతున్న సిబ్బందికి, స్టాండ్‌బై విధుల్లో ఉన్నవారికి,  తక్షణ స్పందన పాత్రలలో కొనసాగుతున్న వారికి మాత్రమే ప్రాధాన్యతా శిక్షణ యథావిధిగా అందుతున్నదని విశ్లేషణలు పేర్కొంటున్నాయి. అయితే, దేశంలోని ఇతర యూనిట్లు తమ కార్యకలాపాలను గణనీయంగా తగ్గించుకోవాలని ఆదేశాలు జారీ అయినట్లు తెలుస్తోంది. తక్షణ సంసిద్ధతను కాపాడుకుంటూనే, మరోవైపు విస్తృత సైనిక సన్నాహాలను కుదించడం వంటి కార్యాచరణ సందిగ్ధతను ఈ పరిణామాలు స్పష్టం చేస్తున్నాయి. 

2030 నాటికి జాతీయ ఆదాయంలో రక్షణ వ్యయాన్ని మూడు శాతానికి పెంచాలనే ఒత్తిడిని ప్రభుత్వం ఎదుర్కొంటున్న తరుణంలో ఈ సమస్య ప్రాధాన్యతను సంతరించుకుంది. చారిత్రక సైనిక ప్రాభవానికి, ప్రస్తుత ఆర్థిక పరిస్థితులకు మధ్య నెలకొన్న అంతరాన్ని ఈ శిక్షణ కోతలు తేటతెల్లం చేస్తున్నాయి.  బ్రిటన్ ప్రస్తుత పరిస్థితిని అర్థం చేసుకోవాలంటే దేశ ఆర్థిక వ్యవస్థలోని విస్తృత సవాళ్లను పరిగణలోకి తీసుకోవాలని నిపుణులు సూచిస్తున్నారు. అధిక ప్రభుత్వ రుణం, బలహీనపడిన ఉత్పాదకత వృద్ధి, అలాగే గడచిన ఆర్థిక సంక్షోభాల దీర్ఘకాలిక ప్రభావాలు ప్రభుత్వ ఆర్థిక నిర్వహణపై  పరిమితులు విధిస్తున్నాయి. ప్రస్తుతం ప్రభుత్వ రుణం స్థూల దేశీయోత్పత్తిలో   94 శాతంగా కొనసాగుతుండగా, ప్రధాన ఆర్థిక వ్యవస్థలతో పోలిస్తే ఉత్పాదకత పనితీరు ఆశించిన స్థాయిలో లేదని విశ్లేషణలు వెల్లడిస్తున్నాయి. రక్షణ ఆధునీకరణ,  భారీ స్థాయి సైనిక సంసిద్ధత వంటి ప్రతిష్టాత్మక లక్ష్యాలను నిలబెట్టుకోవడంలో ఈ నిర్మాణాత్మక పరిస్థితులు ప్రభుత్వ సామర్థ్యాన్ని అడ్డుకుంటున్నాయని అంటున్నారు. .బ్రిటన్ ఒక ప్రధాన శక్తి హోదాకు తగిన వ్యూహాత్మక ఆకాంక్షలను కలిగి ఉన్నప్పటికీ, దాని ఆర్థిక స్థితి మాత్రం క్రమంగా ఒక పరిమిత మధ్యస్థ శక్తిని తలపిస్తోందన్న వాదన వినిపిస్తోంది. ఈ ఆర్థిక ఇబ్బందులను సామ్రాజ్య చారిత్రక నేపథ్యంతో ముడిపెట్టి చూడాల్సిన అవసరం ఉందని విశ్లేషకులు అభిప్రాయపడుతున్నారు. 

శతాబ్దాల పాటు బ్రిటన్ సాగించిన ప్రపంచవ్యాప్త ప్రభావానికి నాకాదళ శక్తి, సైనిక సంస్థలు, వలస పరిపాలనలు,  వివిధ భూభాగాల నుండి వనరులను మళ్ళించే వ్యవస్థలు బలమైన మద్దతుగా నిలిచాయి. వలస పన్నులు, ఏకస్వామ్య వాణిజ్య ఒప్పందాలు,  వనరుల వెలికితీత వంటి అంశాలు దేశానికి సంపదను సమకూర్చడంలో కీలక పాత్ర పోషించాయి.అయితే, సామ్రాజ్యం పతనం కావడంతో అంతర్లీనంగా ఉన్న దేశీయ ఆర్థిక వ్యవస్థల బలహీనతలు బయటపడ్డాయని పరిశీలకులు భావిస్తున్నారు. వనరుల వెలికితీతపై అధికంగా ఆధారపడటం వల్ల దీర్ఘకాలంలో బలమైన ఉత్పాదక సామర్థ్యాన్ని, సాంకేతిక నైపుణ్యాలను నిర్మించుకోవాల్సిన అవసరాన్ని ఆ వ్యవస్థలు విస్మరించాయని విశ్లేషణలు చెబుతున్నాయి. ఈ చారిత్రక కోణంలో వలస భారతదేశంపై ప్రత్యేక దృష్టి పెట్టడం గమనార్హం. 1765 నుంచి 1900 మధ్య కాలంలో బ్రిటన్ భారతదేశం నుండి భారీ ఎత్తున సంపదను తరలించిందని, ఆక్స్‌ఫామ్ అంచనాల ప్రకారం ఆ విలువ ట్రిలియన్లలో ఉంటుందని విశ్లేషణ ఉదహరిస్తోంది. ఈ సంపదలో సింహభాగం బ్రిటిష్ సమాజంలోని అత్యున్నత వర్గాలకు చేరిందని పరిశోధనలు సూచిస్తున్నాయి.

ఈస్ట్ ఇండియా కంపెనీ పాలనా కాలంలో ఎగుమతుల కోసం  ఇండియన్ కమ్మాడిటీస్  కొనుగోలు చేయడానికి స్థానిక ప్రజల నుంచే పన్నులు వసూలు చేశారని ఈ విశ్లేషణ స్పష్టం చేస్తోంది. అంటే వలస ప్రజలు కేవలం ఉత్పత్తిదారులుగా మాత్రమే కాకుండా, తమ స్వంత వస్తువుల కొనుగోళ్లకు తామే నిధులు సమకూర్చే దుస్థితిని ఎదుర్కొన్నారని స్పష్టమవుతోంది. కేవలం భౌతిక మౌలిక సదుపాయాలు లేదా భాషా వ్యాప్తి ఆధారంగానే వలసవాద వారసత్వాన్ని అంచనా వేయలేమని నిపుణులు వాదిస్తున్నారు. ఉత్పత్తి, వాణిజ్యం,  సంపద పంపిణీ వ్యవస్థలను పూర్తిగా మార్చివేసిన వెలికితీత యంత్రాంగం దీని వెనుక ఉంది.వలస పాలన ముగిసిన తర్వాతి కాలంలోనూ ఆ ప్రభావాలు స్థానిక పరిశ్రమలను, అభివృద్ధి అవకాశాలను దెబ్బతీశాయని విమర్శకులు పేర్కొంటున్నారు. 

భారతదేశంతో పాటు ఆఫ్రికాలోనూ బంగారం, వజ్రాలు,  ఖనిజాల వెలికితీత ద్వారా భారీ దోపిడీ జరిగిందని ఈ విశ్లేషణ వివరిస్తుంది. బానిసత్వం,  వలసవాద ఆర్థిక వారసత్వం నేటికీ బ్రిటన్‌లోని కొన్ని వారసత్వ సంపదలతో ముడిపడి ఉందని చారిత్రక పరిశోధనలు వెల్లడిస్తున్నాయి. నష్టపోయిన దేశాల కోణంలో చూస్తే ద్రవ్య రూపంలో ఖచ్చితమైన విలువను లెక్కించడం కష్టమైనప్పటికీ, బలవంతపు కార్మిక వ్యవస్థలు,  కోల్పోయిన అభివృద్ధి రూపంలో తీవ్ర నష్టం వాటిల్లిందని విశ్లేషకులు గుర్తుచేస్తున్నారు.బ్రిటన్ కేవలం భౌగోళిక భూభాగాన్ని మాత్రమే కాకుండా, ఒక నిర్దిష్ట ఆర్థిక నమూనాను కూడా కోల్పోయిందని ప్రస్తుత విశ్లేషణ ప్రధానంగా చెబుతోంది. సరిహద్దులకు ఆవల ఉన్న ప్రాంతాల నుండి సంపదను సమకూర్చుకోవడం ద్వారా స్వయం సమృద్ధి సాధించాల్సిన ఒత్తిడి ఆనాడు బ్రిటన్‌పై తక్కువగా ఉండేదని విమర్శకులు వివరిస్తున్నారు. కానీ సామ్రాజ్యం రద్దు అయిన తర్వాత ఆ వెసులుబాటు కోల్పోవడంతో, దేశీయ ఉత్పాదకత, ఆవిష్కరణలు,  వాణిజ్య పోటీతత్వంపై మాత్రమే ఆ దేశం ఆధారపడవలసి వచ్చింది. ప్రస్తుత రక్షణ శిక్షణ కోతలు ఈ చారిత్రక పరివర్తనకు ఒక ప్రతీకగా నిలుస్తున్నాయి. 

ఒకనాడు ప్రపంచవ్యాప్తంగా సైనిక శక్తిని ప్రదర్శించిన దేశం, నేడు సాధారణ సన్నాహాల విషయంలోనూ ఇబ్బందులను ఎదుర్కొంటోంది.అయితే, బ్రిటన్ ప్రస్తుత ఆర్థిక స్థితిని పూర్తిగా సామ్రాజ్య పతనానికి మాత్రమే ఆపాదించడం సరికాదని కొందరు నిపుణులు హెచ్చరిస్తున్నారు. పారిశ్రామిక పునర్నిర్మాణం, ఆర్థిక సేవల రంగంపై అధికంగా ఆధారపడటం, మారుతున్న జనాభా లెక్కలు మరియు అంతర్జాతీయ పోటీ వంటి అనేక ఇతర అంశాలు కూడా ప్రస్తుత పరిస్థితిని ప్రభావితం చేశాయి. ఏదేమైనప్పటికీ, ఒక దేశం తన ఆర్థిక స్థైర్యం మరియు ఉత్పాదక సామర్థ్యానికి మించి వ్యూహాత్మక ఆశయాలను కొనసాగించడం ఎంతవరకు సాధ్యమనే కీలకమైన అంశాన్ని ఈ ప్రస్తుత పరిణామాలు మరోసారి తెరపైకి తెచ్చాయి.

 -సీతారాం కంఠంనేని 

ఈ విశ్లేషణ మీకు నచ్చినట్లయితే, దయచేసి మా https://TeluguOne.com  పోర్టల్‌ను అనుసరించండి, మీ స్నేహితులతో పంచుకోండి, అలాగే మీ విలువైన అభిప్రాయాలను తెలియజేయండి.    

[Britain Defense Sector, Britain  Economic Crisis, Cuts British Military Training,   Eonomic Legacy   Colonial rule, Britain' strategic aspirations, Telugu One]