చరిత్రను మార్చే శక్తి నాయకుల నిర్ణయాల్లో, వారు నిర్మించిన వ్యవస్థల్లో, ప్రజలను సమీకరించే సామర్థ్యంలో ఉంటుంది. అబ్రహం లింకన్, మహాత్మా గాంధీ, నెల్సన్ మండేలా వంటి నాయకులు స్ఫూర్తిదాయక వ్యక్తులుగా గుర్తింపు పొందారు. మరోవైపు, అధికారం అదుపు తప్పితే ఎలాంటి భయంకర పరిణామాలు ఎదురవుతాయో హిట్లర్, స్టాలిన్ వంటి నియంతల చరిత్ర చెబుతుంది. ప్రపంచవ్యాప్తంగా ప్రసిద్ధి చెందినంత మాత్రాన ఒక నాయకుడు గొప్పవాడని లేదా మంచివాడని చెప్పలేం. 

ఈ జాబితాలో దేశాధినేతలు, సైనిక నాయకులు, పౌర హక్కుల కోసం పోరాడిన నేతలు, వ్యాపార రంగంలో విప్లవాత్మక మార్పులు తీసుకొచ్చిన వ్యక్తులు ఉన్నారు. వీరు జీవించి ఉన్న కాలాన్ని దాటి కూడా ప్రపంచంపై తమ ప్రభావాన్ని కొనసాగించారు.వారి చరిత్రను అర్థం చేసుకోవాలంటే వ్యక్తిత్వం, ప్రసంగాలు మాత్రమే కాకుండా.. వారు సాధించిన విజయాలు ఏమిటి? వారి నిర్ణయాల వల్ల ఎవరికి ప్రయోజనం కలిగింది? ఎవరు నష్టపోయారు? అనే ప్రశ్నలను కూడా పరిశీలించాలి. 

అప్పుడే నాయకత్వంలోని అసలు కోణాలు బయటపడతాయి. స్వేచ్ఛ కోసం పోరాడిన నలుగురు స్ఫూర్తిదాయక నాయకులుసమాజంలో మార్పు తీసుకురావడం ఒక్క నాయకుడి వల్లే సాధ్యం కాదు. ఈ నలుగురు నేతలు సామాన్య ప్రజలు, ఉద్యమకారులు, రాజకీయ సహచరులతో కలిసి అన్యాయానికి వ్యతిరేకంగా పోరాడారు.

1. అబ్రహం లింకన్.!

అమెరికా అంతర్యుద్ధ సమయంలో దేశానికి నాయకత్వం వహించిన అబ్రహం లింకన్, అమెరికా ఐక్యతను కాపాడటంలో కీలక పాత్ర పోషించారు. బానిసత్వ నిర్మూలనకు కూడా ఆయన కృషి చేశారు.1863 జనవరి 1న ఆయన ప్రకటించిన ఎమాన్సిపేషన్ ప్రొక్లమేషన్ తిరుగుబాటులో ఉన్న ప్రాంతాల్లో బానిసలుగా ఉన్న ప్రజలకు విముక్తి ప్రకటించింది. అయితే, అది దేశవ్యాప్తంగా బానిసత్వాన్ని వెంటనే రద్దు చేయలేదు. బానిసత్వాన్ని రాజ్యాంగబద్ధంగా నిర్మూలించిన 13వ సవరణకు కూడా లింకన్ మద్దతు ఇచ్చారు. ప్రజలను ప్రభావితం చేసే ప్రసంగాలు, రాజకీయ పరిస్థితులకు అనుగుణంగా నిర్ణయాలు తీసుకునే సామర్థ్యం ఆయన నాయకత్వానికి బలమయ్యాయి. అయితే, న్యాయస్థానాల విచారణ హక్కును నిలిపివేసిన ఆయన నిర్ణయం వివాదాస్పదమైంది. 1865 ఏప్రిల్‌లో హత్యకు గురికావడంతో ఆయన అధ్యక్ష పదవికి ముగింపు పలికింది.

2. మార్టిన్ లూథర్ కింగ్ జూనియర్.!

అమెరికాలో జాతి వివక్షకు వ్యతిరేకంగా సాగిన పౌర హక్కుల ఉద్యమంలో మార్టిన్ లూథర్ కింగ్ జూనియర్ కీలక పాత్ర పోషించారు. అహింసాయుత నిరసనలు, బహిష్కరణలు, ర్యాలీల ద్వారా వివక్షకు వ్యతిరేకంగా ప్రజలను సమీకరించారు.1963 ఆగస్టు 28న వాషింగ్టన్‌లో జరిగిన మార్చ్ ఆన్ వాషింగ్టన్ ఫర్ జాబ్స్ అండ్ ఫ్రీడమ్ కార్యక్రమంలో ఆయన ప్రసిద్ధ ఐ హ్యావ్ ఎ డ్రీమ్ ప్రసంగం చేశారు. ఈ ప్రసంగం ప్రపంచవ్యాప్తంగా కోట్లాది మందిని ప్రభావితం చేసింది. ఆయన పోరాటం జాతి వివక్షతోనే ఆగిపోలేదు. పేదరికం, ఆర్థిక అసమానతలు, యుద్ధాలకు వ్యతిరేకంగానూ ఉద్యమించారు. సామాన్య ప్రజల భాగస్వామ్యంతో అహింస కూడా శక్తివంతమైన మార్పుకు సాధనమవుతుందని నిరూపించారు.

3. నెల్సన్ మండేలా.!

దక్షిణాఫ్రికాలో అమలైన వర్ణవివక్ష విధానానికి వ్యతిరేకంగా పోరాడిన నెల్సన్ మండేలా, తన జీవితంలో 27 ఏళ్లను జైలు జీవితం గడిపారు. 1962లో ఖైదు కాగా, 1990లో విడుదలయ్యారు. జైలు నుంచి బయటకు వచ్చిన తర్వాత ప్రజాస్వామ్య వ్యవస్థ ఏర్పాటుకు జరిగిన చర్చల్లో కీలక పాత్ర పోషించారు. ప్రతీకారం కంటే సయోధ్యకు ప్రాధాన్యం ఇచ్చారు. 1994లో దక్షిణాఫ్రికాలో తొలిసారిగా అన్ని వయోజనులకు ఓటు హక్కుతో జరిగిన జాతీయ ఎన్నికల అనంతరం దేశపు తొలి నల్లజాతి అధ్యక్షుడిగా బాధ్యతలు చేపట్టారు. జాతి వివక్షపై పోరాటం చేస్తూనే, గతంలో తనను వ్యతిరేకించిన వారితోనూ చర్చలకు సిద్ధపడటం ఆయన నాయకత్వంలోని ప్రత్యేకత.

4. మహాత్మా గాంధీ.!

భారతదేశంలో బ్రిటిష్ వలస పాలనకు వ్యతిరేకంగా మహాత్మా గాంధీ అహింసాయుత ఉద్యమాలను ప్రజల్లోకి తీసుకెళ్లారు. సత్యాగ్రహం, శాసనోల్లంఘన వంటి మార్గాలతో స్వాతంత్ర్య పోరాటానికి ప్రజా ఉద్యమ రూపాన్ని తీసుకొచ్చారు.1930లో చేపట్టిన దండి ఉప్పు సత్యాగ్రహం బ్రిటిష్ ఉప్పు చట్టాలను సవాలు చేసింది. నిత్యజీవితంలో అవసరమైన ఉప్పును స్వాతంత్ర్య పోరాటానికి ప్రతీకగా మార్చారు. ఆయన ఉద్యమ పద్ధతులు ప్రపంచవ్యాప్తంగా పౌర హక్కుల నాయకులకు స్ఫూర్తినిచ్చాయి. అయితే, గాంధీ వారసత్వాన్ని విమర్శనాత్మకంగా పరిశీలించాల్సిన అంశాలు కూడా ఉన్నాయి. దక్షిణాఫ్రికాలో ఆయన తొలి కాలంలో చేసిన నల్లజాతి ప్రజలపై జాత్యహంకార వ్యాఖ్యలు, కులవ్యవస్థపై ఆయన వైఖరి వంటి అంశాలు చరిత్రకారుల చర్చకు గురయ్యాయి.ఆధునిక ప్రపంచ చరిత్రను ప్రభావితం చేసిన నలుగురు యుద్ధకాల నాయకులు

5. జార్జ్ వాషింగ్టన్.!

అమెరికా స్వాతంత్ర్య సంగ్రామంలో కాంటినెంటల్ సైన్యానికి నాయకత్వం వహించిన జార్జ్ వాషింగ్టన్, అనేక ఇబ్బందులు ఎదురైనా సైన్యాన్ని ఏకతాటిపై నిలిపారు. ఫ్రాన్స్ అందించిన కీలక సహకారం కూడా బ్రిటిష్‌పై విజయానికి దోహదపడింది.1789 నుంచి 1797 వరకు అమెరికా తొలి అధ్యక్షుడిగా పనిచేశారు. రెండు పర్యాయాల అనంతరం పదవి నుంచి తప్పుకోవడం ద్వారా ప్రజాస్వామ్య సంప్రదాయాలకు బాటలు వేశారు. అయితే, స్వేచ్ఛ, ప్రజాస్వామ్యం గురించి ఆయన ఆలోచనలకు విరుద్ధంగా, ఆయన బానిసలను కలిగి ఉండటం ఆయన వారసత్వంలోని ముఖ్యమైన వైరుధ్యం.

6. ఫ్రాంక్లిన్ డి. రూజ్‌వెల్ట్!

అమెరికా చరిత్రలో నాలుగు సార్లు అధ్యక్షుడిగా ఎన్నికైన ఏకైక నాయకుడు ఫ్రాంక్లిన్ డి. రూజ్‌వెల్ట్. 1932, 1936, 1940, 1944 ఎన్నికల్లో విజయం సాధించారు.మహా ఆర్థిక మాంద్యం సమయంలో ఆయన ప్రవేశపెట్టిన న్యూ డీల్ కార్యక్రమాలు ఆర్థిక వ్యవస్థలో ప్రభుత్వ పాత్రను విస్తరించాయి. రెండో ప్రపంచ యుద్ధంలో అమెరికా మిత్రదేశాలకు మద్దతు ఇచ్చారు. జపాన్ పెర్ల్ హార్బర్‌పై దాడి చేసిన తర్వాత అమెరికా యుద్ధంలోకి ప్రవేశించింది. అనంతరం మిత్రదేశాల మధ్య సమన్వయంలో రూజ్‌వెల్ట్ కీలక పాత్ర పోషించారు.అయితే, రెండో ప్రపంచ యుద్ధ సమయంలో జపాన్ మూలాలున్న అమెరికన్లను నిర్బంధ శిబిరాలకు తరలించేందుకు ఆయన అనుమతించడం పౌర హక్కులకు జరిగిన తీవ్రమైన ఉల్లంఘనగా పరిగణించబడుతుంది.

7. విన్‌స్టన్ చర్చిల్.!

1940–1945 మధ్య, మళ్లీ 1951–1955 మధ్య బ్రిటన్ ప్రధానిగా పనిచేసిన విన్‌స్టన్ చర్చిల్, రెండో ప్రపంచ యుద్ధంలో నాజీ జర్మనీకి వ్యతిరేకంగా బ్రిటన్ ప్రజల్లో పోరాట స్ఫూర్తిని నింపారు.ఆయన ప్రసంగాలు ప్రజల్లో ధైర్యాన్ని పెంచాయి. అయితే, యుద్ధంలో విజయం సాధించడానికి అమెరికా అధ్యక్షుడు రూజ్‌వెల్ట్, సోవియట్ నాయకుడు స్టాలిన్‌తో సహకారం కూడా కీలకమైంది.చర్చిల్ యుద్ధకాల నాయకత్వాన్ని గుర్తించడంతో పాటు, బ్రిటిష్ సామ్రాజ్యవాదానికి ఆయన ఇచ్చిన మద్దతు, జాత్యహంకార దృక్పథాలు, వలస ప్రాంతాలపై అనుసరించిన విధానాలను కూడా పరిశీలించాలి.

8. డ్వైట్ డి. ఐసెన్‌హోవర్.!

రెండో ప్రపంచ యుద్ధంలో పశ్చిమ ఐరోపాలో మిత్రదేశాల సైన్యానికి సుప్రీం కమాండర్‌గా డ్వైట్ డి. ఐసెన్‌హోవర్ వ్యవహరించారు. 1944 జూన్‌లో నార్మాండీ తీరంలో జరిగిన డీ-డే దాడికి నాయకత్వం వహించారు. అనేక దేశాలకు చెందిన సైన్యాలను సమన్వయం చేయడం ఆయన ముందున్న అతిపెద్ద సవాలు. వివిధ దేశాల నాయకుల మధ్య విభేదాలను పరిష్కరిస్తూ మిత్రదేశాల ఐక్యతను కాపాడారు. అనంతరం అమెరికా 34వ అధ్యక్షుడిగా బాధ్యతలు చేపట్టి, అంతర్రాష్ట్ర రహదారుల వ్యవస్థ విస్తరణకు మద్దతిచ్చారు. సైనిక రంగం, ఆయుధ పరిశ్రమల మధ్య పెరుగుతున్న సంబంధాలపై కూడా హెచ్చరించారు.రోజువారీ జీవితాన్ని మార్చిన ఇద్దరు వ్యాపార దిగ్గజాలు వ్యాపార రంగంలో నాయకత్వం ప్రజలు పనిచేసే విధానాన్ని, సమాచారాన్ని పంచుకునే పద్ధతులను, వినియోగ అలవాట్లను మార్చగలదు. అయితే, కొత్త ఆవిష్కరణలతో పాటు ఉద్యోగుల పని పరిస్థితులు, వారి కృషిని కూడా గుర్తించాలి.

9. స్టీవ్ జాబ్స్.!

యాపిల్ సంస్థ సహ వ్యవస్థాపకుడైన స్టీవ్ జాబ్స్, సాంకేతిక ప్రపంచంలో విప్లవాత్మక మార్పులకు కారణమయ్యారు. మ్యాకింటోష్ కంప్యూటర్, ఐపాడ్, ఐఫోన్ వంటి ఉత్పత్తులను ప్రజల్లోకి తీసుకెళ్లడంలో కీలక పాత్ర పోషించారు.సాంకేతికతను ఉపయోగించడం సులభంగా ఉండాలనే ఆలోచనతో ఉత్పత్తుల రూపకల్పన, వినియోగదారుల అనుభవానికి ప్రాధాన్యం ఇచ్చారు. అయితే, ఈ విజయాల వెనుక ఇంజినీర్లు, డిజైనర్లు, తయారీ రంగ ఉద్యోగుల కృషి కూడా ఉంది. జాబ్స్‌ను దూరదృష్టి కలిగిన నాయకుడిగా గుర్తించినప్పటికీ, ఉద్యోగులపై ఆయన కొన్నిసార్లు కఠినంగా వ్యవహరించేవారని వచ్చిన కథనాలు మరో కోణాన్ని చూపిస్తున్నాయి. వ్యాపార విజయం సాధించినంత మాత్రాన ఒక వ్యక్తి ఆదర్శవంతమైన నాయకుడు అవుతాడని చెప్పలేమనే విషయాన్ని ఆయన జీవితం గుర్తుచేస్తుంది.

10. హెన్రీ ఫోర్డ్.!

ఆటోమొబైల్ రంగంలో సామూహిక ఉత్పత్తి విధానాన్ని విస్తరించడం ద్వారా కార్లను సాధారణ ప్రజలకు అందుబాటులోకి తీసుకురావడంలో హెన్రీ ఫోర్డ్ కీలక పాత్ర పోషించారు. 1913లో అమెరికాలోని హైలాండ్ పార్క్ ఫ్యాక్టరీలో అసెంబ్లీ లైన్ విధానాన్ని ప్రవేశపెట్టడం ఈ ప్రయాణంలో ముఖ్యమైన మలుపు.ఆయన కారును కనిపెట్టలేదు. అయితే, పెద్ద సంఖ్యలో తక్కువ ఖర్చుతో కార్లను తయారు చేసే విధానాన్ని ప్రాచుర్యంలోకి తీసుకొచ్చారు. కార్మికులకు అధిక వేతనాలు అందించడం ద్వారా ఉద్యోగులను ఆకర్షించే ప్రయత్నం చేశారు. కంపెనీలో నల్లజాతి కార్మికులు, వైకల్యాలున్న వ్యక్తులు కూడా పనిచేశారు. అయితే, యూదులపై ఆయన ప్రచురించిన విద్వేషపూరిత రచనలు, ఉద్యోగుల వ్యక్తిగత జీవితాలపై అధిక పర్యవేక్షణ, కార్మిక సంఘాల ఏర్పాటుకు వ్యతిరేకంగా జరిగిన హింసాత్మక చర్యలు ఆయన ప్రతిష్ఠకు మచ్చ తెచ్చాయి.అధికారం దుర్వినియోగం.. మానవాళికి తీరని నష్టం కలిగించిన ఐదుగురు నాయకులు

11. చెంఘీజ్ ఖాన్.!

మంగోల్ తెగలను ఏకం చేసి, 1206లో సర్వోన్నత పాలకుడిగా ప్రకటించుకున్న చెంఘీజ్ ఖాన్ మధ్యయుగ చరిత్రలో అత్యంత ప్రభావవంతమైన సైనిక నాయకుల్లో ఒకరు. వేగవంతమైన సైనిక దాడులు, క్రమశిక్షణ, పరిస్థితులకు అనుగుణంగా వ్యూహాలను మార్చుకునే సామర్థ్యంతో ఉత్తర చైనా, మధ్య ఆసియాలో విస్తారమైన ప్రాంతాలను జయించారు.అయితే, ఆయన విజయాల వెనుక భారీ విధ్వంసం కూడా ఉంది. అనేక ప్రాంతాల్లో సామూహిక హత్యలు, పట్టణాల ధ్వంసం చోటుచేసుకున్నాయి. అదే సమయంలో మంగోల్ పాలనలో సుదూర ప్రాంతాల మధ్య వాణిజ్యం, రాకపోకలు పెరిగాయి.సైనిక విజయాలను మాత్రమే చూసి ఒక నాయకుడిని గొప్పవాడిగా నిర్ణయించలేం. ఆయన చర్యల వల్ల మానవాళికి జరిగిన నష్టాన్ని కూడా పరిగణనలోకి తీసుకోవాలి.

12. నెపోలియన్ బోనపార్ట్.!

ఫ్రెంచ్ విప్లవం తర్వాత రాజకీయంగా ఎదిగిన నెపోలియన్ బోనపార్ట్, 1804 డిసెంబర్ 2న పారిస్‌లోని నోట్రే డామ్ కేథడ్రల్‌లో తనను తాను ఫ్రాన్స్ చక్రవర్తిగా ప్రకటించుకున్నారు. ఆయన సైనిక దండయాత్రలు యూరప్ రాజకీయ పటాన్ని మార్చాయి. నెపోలియన్ కోడ్‌గా ప్రసిద్ధి చెందిన చట్టపరమైన సంస్కరణలు కూడా అనేక దేశాల న్యాయవ్యవస్థలపై ప్రభావం చూపాయి. అయితే, ఆయన నిరంకుశ పాలన, పత్రికా స్వేచ్ఛపై ఆంక్షలు, ఫ్రెంచ్ వలస ప్రాంతాల్లో బానిసత్వాన్ని తిరిగి ప్రవేశపెట్టడం, భారీ ప్రాణనష్టానికి కారణమైన యుద్ధాలు ఆయన చరిత్రలోని చీకటి కోణాలు. ఆయనను కేవలం గొప్ప సైనిక వ్యూహకర్తగా మాత్రమే చూడటం సరైనది కాదు.

13. అడాల్ఫ్ హిట్లర్.!
1933లో జర్మనీ ఛాన్సలర్‌గా బాధ్యతలు చేపట్టిన అడాల్ఫ్ హిట్లర్, ప్రచారం, అణచివేత, రాజకీయ హింస ద్వారా నాజీ నియంతృత్వాన్ని స్థాపించారు. 1939లో పోలాండ్‌పై జర్మనీ దాడి చేయడంతో ఐరోపాలో రెండో ప్రపంచ యుద్ధం ప్రారంభమైంది. హిట్లర్ పాలనలో యూదులపై జరిగిన హోలోకాస్ట్ మానవ చరిత్రలో అత్యంత భయంకరమైన మారణహోమాల్లో ఒకటి. సుమారు 60 లక్షల మంది యూదులను నాజీ పాలకులు హత్య చేశారు. ఇతర సమూహాలకు చెందిన లక్షలాది మందిని కూడా హింసించి, చంపేశారు. జాతి విద్వేషం, తప్పుడు ప్రచారం, ప్రజాస్వామ్య వ్యవస్థలను నిర్వీర్యం చేయడం ఎంతటి విపత్తుకు దారితీస్తాయో హిట్లర్ చరిత్ర స్పష్టంగా తెలియజేస్తుంది.

14. జోసెఫ్ స్టాలిన్.!

1924లో వ్లాదిమిర్ లెనిన్ మరణించిన తర్వాత సోవియట్ యూనియన్‌లో జోసెఫ్ స్టాలిన్ తన అధికారాన్ని క్రమంగా బలోపేతం చేసుకున్నారు. సామ్యవాద నిర్మాణం పేరుతో వ్యవసాయ రంగంలో బలవంతపు సమష్టీకరణ, వేగవంతమైన పారిశ్రామికీకరణ, రాజకీయ ప్రక్షాళనలు, సామూహిక నిర్బంధాలను అమలు చేశారు. ఆయన విధానాల కారణంగా లక్షలాది మంది ప్రాణాలు కోల్పోయారు. మరెందరో తీవ్రంగా బాధపడ్డారు. రెండో ప్రపంచ యుద్ధంలో నాజీ జర్మనీని ఓడించడంలో సోవియట్ యూనియన్ కీలక పాత్ర పోషించినప్పటికీ, ఆ విజయం స్టాలిన్ పాలనలో జరిగిన అణచివేతను చెరిపివేయలేదు. 1953లో మరణించే వరకు స్టాలిన్ సోవియట్ యూనియన్‌ను నియంతృత్వ పద్ధతుల్లో పాలించారు.

15. మావో జెడాంగ్.!

చైనాలో కమ్యూనిస్టు విప్లవానికి నాయకత్వం వహించిన మావో జెడాంగ్, 1949 అక్టోబర్ 1న బీజింగ్‌లో పీపుల్స్ రిపబ్లిక్ ఆఫ్ చైనాను ప్రకటించారు. ప్రధాన భూభాగంలో జాతీయవాద దళాలపై కమ్యూనిస్టులు విజయం సాధించిన అనంతరం ఆయన పాలన ప్రారంభమైంది.
ఆయన నాయకత్వంలో చైనా సమాజం, ఆర్థిక వ్యవస్థలో భారీ మార్పులు చోటుచేసుకున్నాయి. అయితే, ఆయన చేపట్టిన విధానాలు తీవ్ర విషాదానికి కూడా కారణమయ్యాయి. గ్రేట్ లీప్ ఫార్వర్డ్ కార్యక్రమం కారణంగా ఏర్పడిన కరువు లక్షలాది కాదు, కోట్లాది మంది ప్రాణాలను బలిగొన్నట్లు చారిత్రక అంచనాలు సూచిస్తున్నాయి.తర్వాతి కాలంలో ప్రారంభమైన సాంస్కృతిక విప్లవం దేశంలో తీవ్ర అల్లకల్లోలం, హింస, వేధింపులకు దారితీసింది. చైనా చరిత్రలో మావో ప్రభావం ఎంత ముఖ్యమైనదో, ఆయన విధానాల వల్ల జరిగిన విధ్వంసం కూడా అంతే కీలకమైనది.ప్రాచీన కాలం నుంచి విక్టోరియా యుగం వరకు ప్రభావం చూపిన ఏడుగురు నాయకులు

16. జూలియస్ సీజర్.!

ప్రాచీన రోమ్ చరిత్రలో ప్రముఖ సైనిక, రాజకీయ నాయకుడైన జూలియస్ సీజర్, గాలిక్ యుద్ధాల ద్వారా సైనిక ప్రతిష్ఠను సంపాదించారు. అనంతరం జరిగిన అంతర్యుద్ధం రోమన్ రిపబ్లిక్ రాజకీయ వ్యవస్థ బలహీనపడటానికి దోహదపడింది.ఆయన తన చేతుల్లో అపారమైన అధికారాన్ని కేంద్రీకరించుకున్నారు. జీవితకాల నియంతగా నియమితులైన తర్వాత, క్రీ.పూ. 44 మార్చి 15న రోమ్‌లో హత్యకు గురయ్యారు.వ్యక్తిగత అధికార దాహం, సైనిక విధేయత ప్రజాస్వామ్య సంస్థలను ఎలా బలహీనపరుస్తాయో ఆయన జీవితం తెలియజేస్తుంది.

17. ఆగస్టస్ సీజర్.!

జూలియస్ సీజర్ దత్తత వారసుడైన ఆగస్టస్, ప్రత్యర్థులను అంతర్యుద్ధాల్లో ఓడించిన అనంతరం క్రీ.పూ. 27లో రోమ్ తొలి చక్రవర్తిగా అవతరించారు.రిపబ్లిక్ వ్యవస్థ కొనసాగుతున్నట్లుగా కనిపించేలా చేస్తూనే, కీలకమైన అధికారాలను తన చేతుల్లో ఉంచుకున్నారు. ఆయన పాలనలో రాజకీయ స్థిరత్వం ఏర్పడింది. అయితే, ఆ స్థిరత్వం వెనుక అధికారం కేంద్రీకృతం కావడం అనే రాజకీయ మూల్యం కూడా ఉంది. ఆగస్టస్ పాలనతో పాక్స్ రొమానా*గా పిలిచే సుదీర్ఘ శాంతి, స్థిరత్వ కాలం ప్రారంభమైంది. అయినప్పటికీ, సామ్రాజ్య సరిహద్దుల్లో యుద్ధాలు కొనసాగాయి. ఆయన ప్రవేశపెట్టిన పరిపాలనా సంస్కరణలు రోమన్ సామ్రాజ్య వ్యవస్థ దీర్ఘకాలం కొనసాగడానికి సహకరించాయి.

18. అలెగ్జాండర్ ది గ్రేట్.!

మాసిడోనియా రాజుగా క్రీ.పూ. 336 నుంచి 323 వరకు పాలించిన అలెగ్జాండర్ ది గ్రేట్, పర్షియన్ సామ్రాజ్యాన్ని జయించి చరిత్రలో అత్యంత ప్రసిద్ధ సైనిక నాయకుల్లో ఒకరిగా నిలిచారు.తండ్రి ఫిలిప్ రెండో నుంచి శక్తివంతమైన సైన్యాన్ని వారసత్వంగా పొందిన ఆయన, తన సైనిక దండయాత్రలను భారత ఉపఖండం వరకు విస్తరించారు. అయితే, ఆయన మరణం తర్వాత విస్తారమైన సామ్రాజ్యం ముక్కలైంది.
అలెగ్జాండర్ విజయాల కారణంగా విస్తారమైన ప్రాంతాల్లో గ్రీకు సంస్కృతి వ్యాప్తి చెందింది. వివిధ ప్రాంతాల మధ్య సాంస్కృతిక మార్పిడులు పెరిగాయి. అయితే, ఈ విస్తరణలో యుద్ధాలు, ప్రాణనష్టం కూడా భారీగానే ఉన్నాయి.

19. క్లియోపాత్రా ఏడో.!
ఈజిప్టును క్రీ.పూ. 51 నుంచి 30 వరకు పాలించిన క్లియోపాత్రా ఏడో, టాలమీ వంశానికి చెందిన చివరి క్రియాశీల పాలకురాలు. రోమన్ సామ్రాజ్య విస్తరణ మధ్య తన రాజ్యాన్ని కాపాడుకునేందుకు జూలియస్ సీజర్, మార్క్ ఆంటోనీతో రాజకీయ పొత్తులు కుదుర్చుకున్నారు. ఆమె చరిత్రను కేవలం ప్రేమకథల కోణంలో చూడటం సరికాదు. అనేక భాషలు తెలిసిన పాలకురాలిగా పన్నుల వ్యవస్థ, దౌత్య సంబంధాలు, రాజవంశాల మధ్య సంఘర్షణలను ఎదుర్కొన్నారు.రోమన్ రాజకీయ ప్రచారం, ఆమెపై ఏర్పడిన ప్రతికూల చిత్రణలు తర్వాతి తరాల్లో క్లియోపాత్రా రాజకీయ పాత్రను పక్కకు నెట్టి, ఆమె వ్యక్తిగత జీవితానికి అధిక ప్రాధాన్యం కలిగించాయి.

20. చార్లెమైన్.!

పశ్చిమ, మధ్య ఐరోపాలోని విస్తారమైన ప్రాంతాలకు తన రాజ్యాన్ని విస్తరించిన చార్లెమైన్, మధ్యయుగ ఐరోపా చరిత్రలో ప్రముఖ పాలకుడు. 800లో పోప్ లియో మూడో ఆయనకు చక్రవర్తిగా పట్టాభిషేకం చేశారు.ఆయన ఆస్థానంలో విద్య, మతపరమైన అధ్యయనం, పరిపాలనా సంస్కరణలకు ప్రోత్సాహం లభించింది. అయితే, రాజ్య విస్తరణలో యుద్ధాలు కీలక పాత్ర పోషించాయి. సాక్సన్ ప్రజలపై ఆయన చేపట్టిన దండయాత్రల్లో సామూహిక హత్యలు, బలవంతపు మతమార్పిడులు చోటుచేసుకున్నాయి.
అందువల్ల, మధ్యయుగ ఐరోపాకు గొప్ప పునాది వేసిన పాలకుడిగా ఆయనకు గుర్తింపు ఉన్నప్పటికీ, ఆయన పాలనలోని హింసాత్మక కోణాలను కూడా విస్మరించలేం.

21. జోన్ ఆఫ్ ఆర్క్.!

ఫ్రాన్స్, ఇంగ్లండ్ మధ్య జరిగిన హండ్రెడ్ ఇయర్స్ వార్ సమయంలో ఫ్రెంచ్ సైన్యానికి స్ఫూర్తినిచ్చిన నాయకురాలు జోన్ ఆఫ్ ఆర్క్. 1429లో ఆర్లియాన్స్ ముట్టడిని తొలగించడంలో సహకరించి, చార్లెస్ ఏడో రాజుగా పట్టాభిషిక్తుడు కావడానికి మద్దతిచ్చారు. తనకు దైవిక మార్గదర్శకత్వం లభించిందనే విశ్వాసంతో ఆమె పోరాటం సాగించారు. ఆమె ప్రభావవంతమైన పాత్ర ఎక్కువకాలం కొనసాగకపోయినా, ఫ్రాన్స్ చరిత్రలో చెరగని ముద్ర వేసింది. శత్రువులకు చిక్కిన అనంతరం మతద్రోహం ఆరోపణలపై విచారణ ఎదుర్కొని, 1431లో మరణశిక్షకు గురయ్యారు. తర్వాత జరిగిన విచారణలో ఆమెపై గతంలో విధించిన తీర్పు రద్దయింది. అనంతరం ఆమె ఫ్రాన్స్ జాతీయ ప్రతీకగా, కాథలిక్ చర్చిలో సంతురాలిగా గుర్తింపు పొందారు.

22. క్వీన్ విక్టోరియా.!

1837 నుంచి 1901 వరకు బ్రిటన్‌ను పాలించిన క్వీన్ విక్టోరియా, పారిశ్రామిక అభివృద్ధి, బ్రిటిష్ సామ్రాజ్య విస్తరణకు ప్రతీకగా నిలిచారు. ఆమె హయాంలో బ్రిటన్ ప్రపంచంలో అత్యంత శక్తివంతమైన సామ్రాజ్యాల్లో ఒకటిగా ఎదిగింది. రాజకీయ వ్యవహారాల్లో ఆమెకు ప్రభావం ఉన్నప్పటికీ, కాలక్రమేణా ఎన్నికైన ప్రభుత్వాలు విధానాల రూపకల్పనలో ప్రధాన పాత్ర పోషించాయి. విక్టోరియా ఒక్కరే దేశాన్ని పాలించలేదు.ఆమె కాలంలో సాంకేతిక పురోగతి, సామాజిక సంస్కరణలు చోటుచేసుకున్నాయి. అదే సమయంలో వలస ప్రాంతాల దోపిడీ, సామాజిక అసమానతలు, బ్రిటిష్ సామ్రాజ్యంలోని కొన్ని ప్రాంతాల్లో తీవ్రమైన కరువులు కూడా సంభవించాయి. ఆమె సుదీర్ఘ పాలన కారణంగా ఒక యుగానికే విక్టోరియా పేరు స్థిరపడింది. 

గొప్ప చారిత్రక నాయకుడిని గుర్తించేది ఏమిటి?ఈ నాయకుల జీవితాలను పరిశీలిస్తే సంభాషణా నైపుణ్యం, వ్యూహాత్మక ఆలోచన, పట్టుదల, ప్రజలను సమీకరించే సామర్థ్యం వంటి లక్షణాలు కనిపిస్తాయి. అయితే, ఈ లక్షణాలు ఉన్నంత మాత్రాన ఒక నాయకుడు మంచివాడని చెప్పలేం.ప్రజలను ప్రభావితం చేసే వక్త మానవ హక్కుల కోసం పోరాడవచ్చు. అదే వక్త విద్వేషాన్ని రెచ్చగొట్టి హింసకు కూడా కారణం కావచ్చు. అందుకే నాయకుడి గొప్పతనాన్ని అంచనా వేయాలంటే ఆయన అనుసరించిన మార్గాలతో పాటు, ఆ నిర్ణయాల వల్ల సమాజంపై పడిన ప్రభావాన్ని కూడా పరిశీలించాలి.

వేర్వేరు పరిస్థితుల్లో వేర్వేరు నాయకత్వ పద్ధతులు ఉపయోగపడతాయి. మిత్రదేశాలను ఏకం చేయడంలో ఐసెన్‌హోవర్ దౌత్యం, జాతి వివక్షకు వ్యతిరేకంగా మార్టిన్ లూథర్ కింగ్ జూనియర్ చేపట్టిన అహింసాయుత ఉద్యమాలు ఇందుకు ఉదాహరణలు.చరిత్రలో గొప్ప నాయకుడిగా నిలవడం అంటే కేవలం అధికారం సాధించడం కాదు. ప్రజల జీవితాల్లో ఎలాంటి మార్పు తీసుకొచ్చారు, వారి నిర్ణయాల వల్ల ఎవరికి మేలు జరిగింది, ఎవరికి నష్టం కలిగింది అనే అంశాలే ఒక నాయకుడి నిజమైన వారసత్వాన్ని నిర్ణయిస్తాయి.

 

 

 

[ Abraham Lincoln, Mahatma Gandhi, Nelson Mandela,George Washington, Famous people in the world, Hitler, Stalin,Telugu One News, Telug News ]