మాజీ మంత్రి, బీఆర్‌ఎస్‌ ఎమ్మెల్యే హరీశ్‌రావు వ్యాఖ్యలపై తెలంగాణ శాసనసభ స్పీకర్‌ గడ్డం ప్రసాద్‌కుమార్ తీవ్ర ఆగ్రహం వ్యక్తం చేశారు. తన తల్లిపై చేసిన వ్యాఖ్యలను ప్రస్తావిస్తూ హరీశ్‌రావును ప్రశ్నించారు. ‘‘అన్నది నా తల్లిని.. నీ తల్లిని కాదు’’ అంటూ భావోద్వేగానికి గురయ్యారు. ఆవేశం తనకు ఉండాలని, బీఆర్‌ఎస్‌ నేతలకు కాదని వ్యాఖ్యానించారు. సభలో మహిళా సభ్యులకు తాను, సభ గౌరవం ఇస్తామని స్పీకర్‌ స్పష్టం చేశారు. బీఆర్‌ఎస్‌ ఎమ్మెల్యేలు సబితా ఇంద్రారెడ్డి, సునీతా లక్ష్మారెడ్డితో పాటు కోవా లక్ష్మిపై తనకు గౌరవం ఉందన్నారు. వారికి జరిగిన అసౌకర్యంపై నివేదిక కోరినట్లు తెలిపారు. నివేదిక అందిన వెంటనే నిబంధనల ప్రకారం చర్యలు తీసుకుంటామని హరీశ్‌రావుకు సమాధానం ఇచ్చారు.

అంతకుముందు హరీశ్‌రావు సభలో ఆవేశంగా మాట్లాడారు. బీఆర్‌ఎస్‌ ఎమ్మెల్యేలు సబితా ఇంద్రారెడ్డి, సునీతా లక్ష్మారెడ్డిపై దాడి జరిగినప్పటికీ ఇప్పటి వరకు చర్యలు తీసుకో లేదని ఆరోపించారు. ముగ్గురు బీఆర్‌ఎస్‌ మహిళా ఎమ్మెల్యేలపై కేసులు పెట్టారని పేర్కొన్నారు. గౌరవ సభ కాస్తా కౌరవ సభగా మారిందంటూ మండిపడ్డారు.

దీనిపై స్పందించిన స్పీకర్‌ ప్రసాద్‌కుమార్‌.. ‘‘మీరు చెబితే నేను వినట్లేదా? నేను మాట్లాడుతుంటే మీకెందుకంత ఆవేశం.? మీకు కాదు.. ఆవేశం నాకు ఉండాలి. మీ తల్లిని అనలేదు.. నా తల్లిని అన్నారు’’ అంటూ భావోద్వేగానికి గురయ్యారు. సభలో మహిళా సభ్యుల గౌరవానికి ఎలాంటి భంగం కలగ కుండా చూస్తామని స్పష్టం చేశారు.

సబితా ఇంద్రారెడ్డి, సునీతా లక్ష్మారెడ్డిలకు సంబంధించిన ఘటనపై నివేదిక ఇవ్వాలని ఇప్పటికే ఆదేశించినట్లు స్పీకర్‌ తెలిపారు. నివేదిక అందిన తర్వాత దాని ఆధారంగా తగిన చర్యలు తీసుకుంటామని స్పష్టం చేశారు. సభా వ్యవహారా ల్లో నిబంధనలకు అనుగు ణంగానే నిర్ణయాలు ఉంటాయని పేర్కొన్నారు. అసెంబ్లీ ఎదుట నిన్న చోటుచేసుకున్న పరిణా మాల నేపథ్యంలో స్పీకర్‌ గడ్డం ప్రసాద్‌కుమార్‌ను ముఖ్యమంత్రి రేవంత్‌రెడ్డి, డిప్యూటీ సీఎం కలిసి పరామర్శించారు. స్పీకర్‌ ఛాంబర్‌లో ఆయనను కలిసిన సీఎం, నిన్నటి ఘటనలపై విచారం వ్యక్తం చేశారు. ఘటనకు బాధ్యు లైన వారిపై తగిన చర్యలు తీసుకుంటామని హామీ ఇచ్చారు.

 

 

 

(Speaker Prasad fires on Harish Rao, Telangana Legislature, Sabitha Indra Reddy, Sunitha Lakshma Reddy, KTR, KCR, BRS Party, CM Revanth reddy, Deputy cm bhatti, Telugu One, Telugu News)