తెలంగాణ శాసనసభ తొలి సమావేశాలు సోమవారం ఉదయం 11 గంటలకు ప్రారంభమయ్యాయి. తెలంగాణ నుంచి ఎన్నికైన దాదాపు అందరు శాసనసభ్యులు మొదటి రోజు సమావేశాలకు ఉత్సాహంగా హాజరయ్యారు. కాంగ్రెస్ ఎమ్మెల్యే కుందూరు జానారెడ్డి తెలంగాణ అసెంబ్లీకి ప్రొటెం స్పీకర్‌గా వ్యవహరిస్తున్నారు. ప్రొటెం స్పీకర్ హోదాలో జానారెడ్డి తెలంగాణ అసెంబ్లీకి ఎన్నికైన సభ్యుల చేత ప్రమాణ స్వీకారం చేయించారు. మొదట తెలంగాణ ముఖ్యమంత్రి కె.చంద్రశేఖరరావు దైవ సాక్షిగా ఎమ్మెల్యేగా ప్రమాణ స్వీకారం చేశారు. ఆ తర్వాత సభ్యులందరూ ఒకరి తర్వాత ఒకరు ప్రమాణ స్వీకారం చేశారు. తెలంగాణ అసెంబ్లీకి ఎన్నికైన తెరాస ఎమ్మెల్యేలలో చాలామంది శాసనసభకు కొత్తవారు కావడంతో కొంతమంది ప్రమాణ స్వీకారం చేసే సమయంలో తడబడ్డారు. ప్రమాణ స్వీకారం చేసిన సభ్యులకు ప్రొటెం స్పీకర్ జానారెడ్డి అభినందనలు తెలిపారు. కొందరు టీఆర్ఎస్ ఎమ్మెల్యేలు స్పీకర్ స్థానంలో వున్న జానారెడ్డికి పాదాభివందనం చేశారు.