2014లో హిట్టులేని స్టార్ హీరోలు
on Dec 22, 2014
ఈ సంవత్సరం టాలీవుడ్ బాక్స్ ఆఫీస్ వద్ద భారీగానే తెలుగు చిత్రాలు సందడి చేశాయి. వాటిలో థియేటర్లలో నిలిచినవి మాత్రం వేళ్ళతో లెక్కపెట్టవచ్చు. మిగిలిన సినిమాలన్నీ వరుసగా ఫ్లాప్ అవుతున్నాయి. స్టార్ హీరోల సినిమాలు కూడా ఆడియెన్స్ ను ఆకట్టుకోవడంలో విఫలమవుతున్నాయి. ఈ మధ్య వచ్చిన సినిమాలన్నీ అటూ ఇటుగా పాత చిత్రాల కథలను కాపీ కొట్టి.. కొత్త సీసాలో పాత సారాలా ఆడియెన్స్ ముందుకు వదులుతున్నారు దర్శకులు. ఈ చిత్రాలు చూసిన ప్రేక్షకులు కూడా వాటిని పట్టించుకోవడం లేదు. దీంతో ఆయా సినిమాలన్నీ భారీ డిజాస్టర్లుగా మారిపోతున్నాయి. మరి ఈ సంవత్సరం స్టార్ హీరోలు నటించిన చిత్రాల్లో ఎన్ని హిట్ కొట్టాయి? ఎన్ని ఫ్లాప్ అయ్యాయనేది ఓ సారి చూద్దాం.
2014 లో నందమూరి బాలయ్య, స్టైలిష్ స్టార్ అల్లు అర్జున్ నటించిన సినిమాలు బాక్స్ ఆఫీస్ వద్ద భారీ హిట్లుగా నిలిచాయి. 'సింహా' లాంటి భారీ హిట్ ఇచ్చిన బోయపాటి శ్రీను మరోసారి బాలకృష్ణకు అదిరిపోయే హిట్ ను ఇచ్చాడు. 'లెజెండ్' సినిమా బాలయ్య కేరియార్లోనే హైయస్ట్ కలెక్షన్లను సాధించిన చిత్రంగా నిలిచింది. అలాగే బన్నీ, సురేందర్ రెడ్డి ఫస్ట్ టైం కాంబినేషన్ లో వచ్చిన 'రేసు గుర్రం' బ్లాక్ బాస్టర్ హిట్ గా నిలిచింది. ఈ సంవత్సరం హైయస్ట్ గ్రాస్ కలెక్షన్లు సాధించిన చిత్రంగా నిలిచింది.
ఈ సంవత్సరం అక్కినేని కుటుంబం వచ్చిన మనం సినిమా గురించి ముఖ్యంగా చెప్పుకోవాలి. ఈ సినిమా అక్కినేని కుటుంబానికి ఓ తీపి జ్ఞాపకంగా, మైలురాయిగా నిలిచిపోయింది. ఒకే కుటుంబానికి చెందిన మూడు తరాల హీరోలు నాగేశ్వరరావు, నాగార్జున, నాగచైతన్య కలిసి ప్రధాన పాత్రల్లో నటించిన మొదటి తెలుగు సినిమాగా చరిత్రలో స్థానం పొందింది ‘మనం'.
ఇక మిగతా స్టార్ హీరోల విషయానికి వస్తే సూపర్ మహేష్ బాబు..ఈ సంవత్సరం అభిమానులను మరింత నిరాశపరిచిన హీరోగా చెప్పుకోవచ్చు. మహేష్ బాబు నటించిన వన్, ఆగడు చిత్రాలు డిస్ట్రిబ్యూటర్లకు భారీ లాస్ లను తీసుకువచ్చాయి.
మెగా పవర్ స్టార్ రామ్ చరణ్ నటించిన ఎవడు, గోవిందుడు అందరి వాడేలే చిత్రాలకి మంచి టాక్ వచ్చిన నిర్మాతలకు లాభాలు తెచ్చిపెట్టలేకపోయాయి. అలాగే యంగ్ టైగర్ ఎన్టీఆర్ పరిస్థితి కూడా అలాగే వుంది. ఆయన నటించిన 'రభస' ప్రేక్షకులను అలరించడంలో మరోసారి విఫలమైంది.
కామెడీ కింగ్ నరేష్, నానిలు కూడా ఈ సంవత్సరం ఒక్క హిట్ కూడా కొట్టలేకపోయారు. నరేష్ మూడు సినిమాల్లో నటించగా..ఒకటి కూడా ప్రేక్షకులను నవ్వించలేకపోయింది. నాని నటించిన పైసా, ఆహా కళ్యాణం బాక్స్ ఆఫీస్ వద్ద బోల్తాపడ్డాయి. అలాగే వరుణ్ సందేశ్, సాయికుమార్ తనయుడు ఆది నటించిన సినిమాలు ఫ్లాప్ లుగా నిలిచాయి. మరి 2015 లోనైన ఈ హీరోలు ప్రేక్షకులను అలరించే సినిమాలు తీసి హిట్లు కొట్టాలని ఆశిద్దాం.