నాయకత్వ లోపంతో బాధపడుతున్న వైకాపా ఇటీవలకాలంలో రాజకీయంగా చాలా చురుకుగా వ్యవహరిస్తూ తెదేపాకు సవాలుగా నిలుస్తోంది. సమైక్య నినాదంతో రాజీనామాలు చేసిన తరువాత మధ్యలో కొంచెం చల్లబడినప్పటికీ, జగన్, విజయమ్మల రాజీనామాలతో మళ్ళీ ఆపార్టీ కొంచెం వేగం పుంజుకొంది. తెదేపా నిరాహార దీక్షలకు సిద్దపడుతున్నసంగతి కనిపెట్టిన ఆ పార్టీ, వారికంటే ముందుగానే ఈ నెల 19న విజయమ్మ దీక్ష మొదలుపెట్టబోతోంది. ఇక, చంద్రబాబు నాయుడు బస్సుయాత్ర గురించి మీడియాలో వార్తలు రాగానే, ఆయన కంటే ముందుగానే వైకాపా కూడా ఈనెల 22 నుండి బస్సు యాత్రలు మొదలుపెట్టబోతోంది. తెదేపా తన ఆలోచనలతో, ప్రణాళికలతో స్వయంగా ప్రయోజనం పొందలేకపోతున్నపటికీ, ఈవిధంగా వైకాపాకు మాత్రం చక్కటి మార్గదర్శనం చేయడం విశేషం. వైకాపా కూడా వ్యుహాలకోసం బుర్రలు బ్రద్దలు కొట్టుకొనే బదులు తెదేపా దగ్గర రెడీ మేడ్ గా దొరుకుతున్న వ్యూహాలను అమలు చేస్తూ తెదేపా కంటే దూసుకుపోతోంది.