హైదరాబాద్‌లోని ఎల్బీ నగర్‌కి చెందిన ఓ మహిళకి చక్కని సంసారం వుంది. భర్త, ఇద్దరు పిల్లలు... ఆర్థిక ఇబ్బందులు లేని సంసారం. అయితే ఆమె మరో వ్యక్తితో వివాహేతర సంబంధం పెట్టుకుంది. తన వివాహేతర సంబంధానికి భర్త అడ్డుగా వున్నాడని భావించింది. కళ్ళలో జిల్లేడుపాలు పోస్తే చనిపోతారని ఎవరో చెప్పుకుంటే విన్న ఆ మహా ఇల్లాలు తన భర్త కళ్లలో జిల్లేడు పాలు పోసి చంపేయాలని నిర్ణయించుకుంది. దాంతో తాను అక్రమసంబంధం పెట్టుకున్న వ్యక్తితో కలసి పథక రచన చేసింది. ఓ గిన్నెడు జిల్లేడు పాలు సేకరించి, నిద్రపోతున్న భర్త కళ్ళలో పోసింది. అయితే ఆ జిల్లేడు పాలు కారణంగా ఆమె భర్త ప్రాణాలు అయితే పోలేదుగానీ, చూపు మాత్రం మందగించింది. సదరు భర్త లబోదిబో అంటూ పోలీసులను ఆశ్రయించాడు. పోలీసులు భర్తని చంపేయాలని నిర్ణయించుకున్న ఆ మహా ఇల్లాలి మీద, ఆమెకి సహకరించిన ప్రియుడి మీద కేసు నమోదు చేశారు. ఇద్దర్నీ రిమాండ్‌కి తరలించారు.