ఇన్కమ్ టాక్స్ రిటర్న్స్ (ఐటీఆర్) దాఖలు చేసేటప్పుడు పొరపాటున ఒక రకమైన ఆదాయాన్ని మరొక విభాగంలో చూపిస్తే పన్ను నోటీసులు రావడం సర్వసాధారణం. కానీ, ఐటీఆర్‌లో చేసిన చిన్న పొరపాటు కారణంగా పన్ను పరిధిలోకి రాని నిధులను కూడా పన్ను పరిధిలోకి మార్చలేరని నిరూపించింది ఒక కీలకమైన న్యాయ పోరాటం. స్వచ్ఛంద పదవీ విరమణ (వీఆర్‌ఎస్) ద్వారా వచ్చిన కోట్ల రూపాయల పరిహారాన్ని జీతంగా తప్పుగా పేర్కొన్న ఒక మాజీ ఉద్యోగికి పూణే ఆదాయ పన్ను అప్పీలేట్ ట్రిబ్యునల్ (ఐటీఏటీ) ఊరటనిస్తూ చారిత్రాత్మక తీర్పు వెలువరించింది. రూ.65.21 లక్షల మేర లభించిన వీఆర్‌ఎస్ పరిహారం పూర్తిగా పన్ను మినహాయింపు ఉన్న క్యాపిటల్ రిసీప్ట్ అని, దానిపై పన్ను విధించడం కుదరదని స్పష్టం చేసింది.

ఈ వివాదం ఫైజర్ హెల్త్‌కేర్ ఇండియా ప్రైవేట్ లిమిటెడ్ మాజీ ఉద్యోగి ప్రకాష్ సుఖ్‌దేవ్ సోనవానే కేసుకు సంబంధించినది. ఫైజర్ సంస్థకు చెందిన ఔరంగాబాద్ తయారీ యూనిట్‌ను మూసివేసిన సమయంలో కంపెనీ 'ఫైనాన్స్ స్కీమ్ ఫర్ ఎంప్లాయీస్ ఎట్ ఔరంగాబాద్ 2019' పేరుతో ఒక స్వచ్ఛంద పదవీ విరమణ పథకాన్ని ప్రవేశపెట్టింది. ఆర్థిక సంవత్సరం 2018-19 (FY2018-19) లో ఈ పథకం కింద సదరు ఉద్యోగి రూ.65.21 లక్షల మొత్తాన్ని అందుకున్నారు. అసెస్మెంట్ ఇయర్ 2019-20 (AY2019-20) కి గాను తన ఐటీఆర్ దాఖలు చేస్తున్న సమయంలో, ఈ మొత్తాన్ని ముందస్తు జీతం (అడ్వాన్స్ శాలరీ) గా పొరపాటున పేర్కొంటూ ఇన్కమ్ టాక్స్ యాక్ట్ సెక్షన్ 89 కింద పన్ను ఉపశమనాన్ని కోరారు.

అయితే, పన్నుల శాఖ అసెసింగ్ ఆఫీసర్ ఈ సెక్షన్ 89 క్లెయిమ్‌ను తోసిపుచ్చారు. తదనంతరం, కమిషనర్ ఆఫ్ ఇన్కమ్ టాక్స్ (అప్పీల్స్) వద్దకు కేసు వెళ్లగా, వారు మరింత ముందుకు వెళ్లి ఈ రూ.65.21 లక్షల మొత్తాన్ని ఉద్యోగ ముగింపు సందర్భంగా లభించిన పరిహారంగా భావించి, సెక్షన్ 56(2)(xi) కింద 'ఇతర మూలాల ద్వారా వచ్చిన ఆదాయం' (ఇన్కమ్ ఫ్రమ్ అదర్ సోర్సెస్) గా వర్గీకరించి పన్ను విధిస్తూ ఆదేశాలు ఇచ్చారు. దీంతో పన్ను చెల్లింపుదారుడికి భారీ మొత్తంలో పన్ను భారం పడింది.

ఈ నిర్ణయాన్ని సవాలు చేస్తూ ఉద్యోగి పూణే ఐటీఏటీ ని ఆశ్రయించారు. ట్రిబ్యునల్ ఎదుట పన్ను చెల్లింపుదారుడు తన న్యాయపరమైన వాదనను స్పష్టం చేశారు. ఐటీఆర్‌లో సెక్షన్ 89 కింద క్లెయిమ్ చేయడం పొరపాటని, నిజానికి ఈ మొత్తం ఉద్యోగ తొలగింపు ద్వారా వచ్చింది కాదని, వీఆర్‌ఎస్ పథకం కింద అందిన క్యాపిటల్ రిసీప్ట్ కాబట్టి దీనిపై ఎలాంటి పన్ను విధించకూడదని వాదించారు. జూన్ 8, 2026 నాటి తన ఉత్తర్వుల్లో పూణే ఐటీఏటీ ట్రిబ్యునల్ ఈ వాదనలతో సంపూర్ణంగా ఏకీభవించింది.

reported vrs as salary itr tax exemption,pune itat 65 lakh vrs tax case.