ఇండియన్ స్టార్ క్రికెటర్ విరాట్ కోహ్లీకి చెందిన పబ్ మీద బెంగళూరు పోలీసులు కేసు నమోదు చేశారు. నిర్ణీత సమయం దాటిన తర్వాత కూడా కార్యకలాపాలు నిర్వహిస్తూ వుండటంతో పోలీసులు ఈ చర్య తీసుకున్నారు. బెంగళూరులోని చిన్నస్వామి స్టేడియం సమీపంలో కోహ్లీకి చెందిన వన్8 కమ్యూన్‌తోపాటు మరికొన్ని పబ్‌లు నిర్ణీత సమయం దాటిన తర్వాత కూడా కొనసాగుతున్నాయని పోలీసులకు ఫిర్యాదులు అందాయి. అర్ధరాత్రి దాటిన తర్వాత కూడా వాటి నుంచి పెద్ద శబ్దంతో సంగీతం వస్తోందని ఫిర్యాదు చేసినవారు పేర్కొన్నారు. అర్ధరాత్రి ఒంటిగంట వరకే అనుమతి వున్నప్పటికీ, ఆ తర్వాత కూడా తెరిచే వుంచడంతో పోలీసులు కేసు నమోదు చేశారు. ప్రాథమికంగా వన్8 కమ్యూన్ పబ్ మేనేజర్ మీద కేసు నమోదు చేశారు. విరాట్ కోహ్లీకి బెంగళూరుతోపాటు ఢిల్లీ, ముంబై, పూణె, కోల్‌కతాల్లో కూడా పబ్‌లు వున్నాయి.