వంగవీటి రాధా హత్యకు రెక్కీ?
Published on: Sun Dec 26, 2021 3:48PM
వంగవీటి రంగా వర్ధంతి కార్యక్రమంలో మాజీ ఎమ్మెల్యే వంగవీటి రాధా సంచలన విషయం వెల్లడించారు. కొందరు తన హత్యకు కుట్ర చేశారని.. రెక్కీ కూడా నిర్వహించినట్లు చెప్పుకొచ్చారు. హత్యకు కుట్ర చేసింది ఎవరో త్వరలోనే తెలుస్తుందన్నారు. అత్యుత్సాహంతో ఏదో చేద్దామని.. కొందరు ఎదవ వేషాలు వేస్తున్నారన్నారు. తనను పొట్టన పెట్టుకుందామని చూసేవాళ్లకు చెబుతున్నా రెడీగా ఉన్నా.. రంగా కీర్తి, ఆశయ సాధనే తప్ప పదవులపై ఆశ లేదన్నారు. తాను ప్రజల మధ్యే ఉంటానని.. తనను లేకుండా చేయాలనుకుంటున్నవాళ్లను దూరంగా పెట్టాలన్నారు.
కృష్ణా జిల్లా గుడ్లవల్లేరు మండలం చిన్నగొన్నూరులో వంగవీటి రంగా విగ్రహ ఆవిష్కరణ కార్యక్రమానికి రాధా వెళ్లారు. ఈ కార్యక్రమానికి మంత్రి కొడాలి నానితో పాటూ ఎమ్మెల్యే వల్లభనేని వంశీ కూడా హాజరయ్యారు. అంతకముందు రాధా కార్యాలయంలో వల్లభనేని భేటీ అయ్యారు.. కొద్దిసేపు ఇద్దరు మాట్లాడుకున్నారు. అనంతరం రంగా విగ్రహానికి పూల మాల వేసి నివాళులు అర్పించిన రాధా, వంశీ.. వర్ధంతి సభలో పాల్గొన్నారు. చాలా రోజుల తర్వాత వల్లభవనేని వంశీ వంగవీటిని కలవడం ఆసక్తికరంగా మారింది. ఈ ఇద్దరి కలయికపై రాజకీయ వర్గాలలో చర్చ జరుగుతోంది.
వంగవీటి రాధా 2019 ఎన్నికలకు ముందు వైఎస్సార్సీపీకి గుడ్ బై చెప్పి టీడీపీలో చేరారు. రాష్ట్రవ్యాప్తంగా పార్టీ అభ్యర్థుల తరపున ప్రచారం చేశారు. ఎన్నికల ఫలితాల తర్వాత మళ్లీ పెద్దగా బయటకు రాలేదు. తర్వాత కొద్దిరోజులకు జనసేన అధినేత పవన్ కళ్యాణ్ను కలవడంతో ఆ పార్టీలోకి వెళతారనే ప్రచారం జరిగింది.ఆ తర్వాత ప్రైవేట్ కార్యక్రమాల్లో కనపడుతున్నారు కానీ రాజకీయాలకు దూరంగా ఉంటున్నారు.ఈ నేపథ్యంలో మంత్రి కొడాలి నాని, టీడీపీ రెబెల్ ఎమ్మెల్యే వల్లభనేని వంశి సమక్షంలో వంగవీటి రాధా చేసిన కామెంట్లు కలకలం రేపుతున్నాయి.


